Bakıda fəaliyyət göstərən əyləncə məkanlarının birinin sosial şəbəkə hesabında paylaşdığı elan müzakirələrə səbəb olub. Müştərilərə ünvanlanan müraciətdə məkana yalnız zəngin oğlanlar və gözəl xanımların buraxılacağı bildirilib, maddi baxımdan imkansız insanların isə girişinə icazə verilməyəcəyi qeyd olunub.
Həmçinin, elanda məkana gələn bəylərin avtomobilinin qiymətinin 200 min manatdan az olmaması, qızların isə çox gözəl olması şərt kimi qoyulub. Əyləncə məkanının bu addımı sosial şəbəkə istifadəçiləri tərəfindən sərt tənqid edilib.
“Əyləncə məkanlarının belə şərtlər irəli sürməsi o deməkdir ki, bizim ölkədə sosial problemlərin həlli ilə bağlı lazımi səviyyədə işlər görülmür”
Əyləncə məkanının “irqçi” elanına fikir bildirən sosioloq Əhməd Qəşəmoğlu “Bakı-Xəbər”ə açıqlamasında qeyd etdi ki, bu cür elanların yayılmasının bəlli məqsədi var. Məqsəd odur ki, pullu oğlanlar ora yaraşıqlı qızlar vasitəsilə cəlb edilsin, sonrası da aydındır: “Ümumiyyətlə, bu kimi məsələlərə qarşı diqqəli olmaq lazımdır. Nəzərə almaq lazımdır ki, bizim ölkəmiz elə də böyük deyil. Bu səbəbdən də mənəviyyat sahəsində gedən hər hansı bir dəyişmə ölkənin tərəqqisinə təsir edir. Maddiyyatla mənəviyyat arasında ahəngdar münasibət olmalıdır. Ümumən maddiyyat mənəviyyata kömək etməlidir. Maddiyyat mənəviyyatı məhv etməməlidir. Ancaq biz bu gün əksini müşahidə edirik. Bu cür elanların yayılması, əyləncə məkanlarının belə şərtlər irəli sürməsi o deməkdir ki, bizim ölkədə sosial problemlərin həlli ilə lazımi səviyyədə işlər görülmür. Humanitar siyasətdə zəiflik var. Bu kimi problemlərin həlli ilə məşğul olacaq qurumlar olduqca ləng işləyir. Aidiyyəti qurumlara görüləcək işlərlə bağlı təkliflər irəli sürürəm, ancaq reaksiya verən yoxdur. Nəticədə belə hallar yaşanır. Təəssüf ki, gələcəkdə bundan daha pis mənzərə ilə qarşılaşacağıq”.
Günel CƏLİLOVA
