Məlumdur ki, ictimai nəqliyyatla məşğul olanlar gündəlik tibbi müayinədən keçməlidir. Bu qayda daha çox avtobus sürücülərinə şamil olunur. Avtobus sürücüləri hər səhər bir qayda olaraq tibbi müayinədən keçir. Ancaq taksi sürücüləri isə heç bir tibbi yoxlanışdan keçmir.
Xatırladaq ki, ölkə başçısı İlham Əliyev 2020-ci ildə Nəqliyyat, Rabitə və Yüksək Texnologiyalar nazirini qəbul edərkən məlum məsələyə toxunmuşdu. Prezident qeyd etmişdi ki, taksi sürücülərinin tibbi müayinədən keçməsi təşkil olunmalıdır.
Ancaq bu məsələyə elə də diqqət yetirilmədi. Məlumdur ki, son zamanlar taksi sürücüləri ilə bağlı xoşagəlməz hallar yaşanır. Narkotik və psixatrop maddələrin təsiri altında sürücülərin saxlanması bir daha sübut edir ki¸ bu sahədə boşluq var. Bu səbəbdən də ekspertlər hesab edir ki, taksi fəaliyyəti ilə məşğul olanlar mütləq qaydada tibbi yoxlanışdan keçməlidir.
Pərvanə Mustafayeva: “Yol-nəqliyyat hadisələrinin çoxu məhz tibbi yoxlanışların həyata keçirilməməsi ilə bağlı baş verir”
Həkim ekspert Pərvanə Mustafayeva bildirdi ki, yol-nəqliyyat hadisələrinin çoxu məhz tibbi yoxlanışların həyata keçirilməməsi ilə bağlı baş verir: "Belə bir məsələnin həlli bütün dünyada necə aparılırsa, bizdə də o cür qoyulmalıdır. Avtobus sürücüləri kimi taksi fəaiyyəti ilə məşğul olanlar da hər gün tibbi sınaqlardan keçirilməlidir. Bu zərurətdir. Yoxlama nəticəsində aşkar olunsa ki, bu adamın qanında alkoqol var, müxtəlif vasitələrdən istifadə edir və s. , bu halda sürücü işdən uzaqlaşdırılsa, o zaman düşünürəm ki, bu kimi problemlər azalar”.
Həkimin sözlərinə görə, taksi sürücüləri işə onlayn qaydada qəbul edilir. Belə olan halda onlar heç bir tibbi müayinədən keçirilmir. Nəticədə xoşagəlməz mənzərələr yaşanır.
Elxan Əliyev: “Taksi fəaliyyəti ilə məşğul olanlar tibbi müayinədən keçərsə...”
Sosial sahə üzrə ekspert Elxan Əliyev bildirdi ki, Azərbaycanda taksi fəaliyyətini tənzimləyən Nazirlər Kabinetinin xüsusi reqlamenti və tələbləri mövcuddur: “Həmin tələblərə əsasən həm ictimai nəqliyyat sürücüləri, həm də kommersiya məqsədilə yükdaşıma həyata keçirən şəxslər reys qabağı tibbi müayinədən keçməlidirlər. Sürücülərin hər gün ürək kardioqramı çıxarılmalı, daha sonra şəxsin ürək döyüntüsü, nəbzi və qan təzyiqi yoxlanılmalıdır. Ən əsası sürücünün qanında alkoqol və narkotik maddənin olub-olmaması müəyyən edilməlidir. Danılmaz faktdır ki, son zamanlar taksi sürücülərinin bir qismi narkotik qəbul edib sükan arxasına keçdiyi üçün xoş olmayan mənzələlər yaşanır. Sürücülər qadın, qız sərnişinlərə əxlaqsız təkliflər edir, özlərini apara bilmirlər. Taksi fəaliyyəti ilə məşğul olanlar tibbi müayinədən keçərsə bu kimi problemlər azalar”.
Günel CƏLİLOVA
