“Bakı Baş Səhiyyə Mərkəzi” Publik Hüquqi Şəxsin müraciəti əsasında Nüvə və Radioloji Fəaliyyətin Tənzimlənməsi üzrə Dövlət Agentliyi tərəfindən ionlaşdırıcı şüa mənbələri hesab edilən qurğuların mövcud olduğu tibb müəssisələrində nəzarət-yoxlama tədbirləri keçirilib.
Fövqəladə Hallar Nazirliyinin yaydığı məlumata əsasən, keçirilən tədbirlər nəticəsində Bakı şəhərində yerləşən 5 və 39 nömrəli Şəhər poliklinikalarında, 1 və 2 nömrəli Uşaq Stomatoloji poliklinikalarında, 1 nömrəli Tələbə Poliklinikasında və Müharibə Veteranları Respublika Xəstəxanasında radiasiya təhlükəsizliyi tələblərinə riayət edilmədən və “xüsusi icazə”si olmadan rentgen kabinetlərinin fəaliyyət göstərdiyi müəyyən edilib.
Qeyd edək ki, qanunvericiliyin tələblərinə uyğun olaraq görülmüş tədbirlər nəticəsində yuxarıda göstərilən tibb müəssisələrinin rentgen kabinetlərinin fəaliyyəti dayandırılıb.
Onu da bildirək ki, respublikada və paytaxt ərazisində fəaliyyət göstərən tibb müəssisələrinin sayı kifayət qədər çoxdur. Maraqlıdır, digər poliklinika və xəstəxanalarda radiasiya təhlükəsizliyi tələbləri normativlərə uyğun həyata keçirilibmi? Ümumiyyətlə, nöqsanlar aşkarlanan və rentgen müayinəsi göstərilən müəssisələrə müraciət edən pasiyentlər, eləcə də tibb personalının məruz qaldığı şüalanma onların sağlamlıqlarına nə kimi ziyan vurub?
Rəşad Mahmudov: “Şüalarla bağlı zərər tək poliklinikalarda olan rentgen müayinəsinə deyil, həm də…”
Millət vəkili Rəşad Mahmudov bildirdi ki, bir sıra tibb müəssisəsində rentgen müayinə kabinetlərinin standartlara cavab vermədiyi üçün bağlanması müsbət haldır: “Normativ qaydalara uyğun olmayan rentgen otaqlarının mövcudluğu ionlaşdırıcı rentgen şüalarının ətrafa yayılmasına və insanlara mənfi təsir etməsinə zəmin yaradır. Bu kimi müəssisələrin qısa müddətdə aşkarlanması və potensial təhlükənin qarşısının alınması yaxşı haldır. Ümid edək ki, həmin müəssisələr yol verilən nöqsanları qısa müddətdə standartlara uyğunlaşdırıb, yenidən fəaliyyətə başlaya bilərlər. Bu kimi nöqsanlar səbəbindən bugünə qədər, bəlkə də, ziyan görənlər arasında tibb işçilərini xüsusi vurğulamaq istəyirəm. Gündəlik hər hansı müayinə zamanı rentgen kabinetlərinə müraciət edən insanlar bir o qədər də təhlükə ilə üz-üzə qalmırlar. Çünki tibb müəssisələrindəki rentgen aparatlarının ətrafa yaydığı bir günlük şüa dozaları o qədər də güclü deyil. Amma gecə-gündüz eyni ortamda xidmət aparan tibb işçiləri bu şüaların ziyanlarına açıq şəkildə məruz qalırlar. Hətta onu deyim ki, miqdardan artıq rentgen şüaları xərçəng xəstəliyinin yaranmasının ən birinci səbəblərindən biridir və bu, sübuta ehtiyacı olmayan həqiqətdir”.
Millət vəkili hesab edir ki, aidiyyəti qurumlar monitorinqləri davam etdirməlidir: “Şüalarla bağlı zərər tək poliklinikalarda olan rentgen müayinəsinə deyil, həm də kompüter tomoqrafiyası, angioqrafiya, mammoqrafiya kimi müayinələrdə istifadə edilən cihazlarla işləyən şəxslərə də aiddir. Bu yerlərdə işləyənlər xüsusi qurğuşundan hazırlanan geyimlərdən istifadə edirlər. Həmin geyimlərin üzərində tibbi heyətin günlük, aylıq aldığı zərərli şüanın miqdarını ölçən cihaz isə mütləq olmalıdır. Həmin şüanın miqdarına görə müəyyən edilir ki, həmin tibb işçisi təhlükə səviyyəsini keçib, ya yox”.
Qeyrət Nəsirov: “Belə hallara daha çox dövlət müəssisələrində rast gəlinir, çünki…”
Radioloq Qeyrət Nəsirov bildirdi ki, rentgen avadanlıqları və komputer tomoqrafiyası yerləşdirilən otaqlar izolyasiya edilməlidir: “Belə hallara daha çox dövlət müəssislərində rast gəlinir. Çünki uzun müddət təmir edilməyən səhiyyə müəssisələrində rentgen otaqlarının qapıları qurğuşundan deyil. Üstəlik, otaqların divarları da izolyasiya edilməyib və şüa keçirir. Bu da həm orda işləyən, həm də müayinə olunan xəstələr üçün həyati təhlükə yaradır. Hələ də bəzi rentgen və kompüter-tomoqrafiya müayinə otaqları xüsusi icazə əsasında fəaliyyət göstərmir və onların heç biri müasir tələblərə cavab vermir. Bu çox təhlükəli haldır”.
Günel CƏLİLOVA
