Dünya Bankı 190 ölkədə qadınların iqtisadi imkanları, bu sahədə gender bərabərliyinə nə dərəcədə əməl olunması, qanunların qadınlara hansı həddə hüquqlar verməsinə dair illik hesabatını açıqlayıb. Təhlillər əsasında Dünya Bankı 100 ballıq sistemlə ölkələrin reytinqini də tərtib edib.
Reytinq cədvəlinin başında 14 ölkə durur: Almaniya, Belçika, Danimarka, Fransa, İspaniya, Yunanıstan, Latviya, Lüksemburq, Portuqaliya, İsveç, Niderland, İslandiya, İrlandiya, Kanada.
Dünya Bankının rəyinə görə, hər biri 100 bal toplamış bu ölkələrdə qadınlarla kişilərə bərabər iqtisadi imkanlar yaradılıb, gender bərabərliyinə əməl olunub, qanunvericilikdə qadınlara kişilərlə eyni hüquqlar verib. Azərbaycan ötən illə müqayisədə 1 pillə geriləyərək 101-ci sırada qərarlaşıb.
Maraqlıdır, gender bərabərliyi üzrə Azərbaycan niyə geriləyib?
Mehriban Zeynalova: “Bu hesabatda Azərbaycanın bir pillə geriləməsi siyasi məsələ də ola bilər”
“Təmiz Dünya” Qadınlar Birliyinin sədri Mehriban Zeynalova bildirdi ki, bu hesabatda Azərbaycanın geriləməsi siyasi məsələ də ola bilər: “Qadınların gender məsələlərində bərabərlik hüququ üzrə müyyən addımlar atılıb və atılır. Maarifləndirmə işlərindən sonra bizə çoxlu müraciətlər daxil olur və bizə elə gəlir ki, hüquqların pozulması çoxalıb. Əslində isə bu, maarifləndirmənin nəticəsidir. İnsanlar qanunlarla maraqlanır və hüquqlarını bərpa etməyə çalışır. Bu istiqamətdə formalaşma tam icra olunmayıb. Hesab edirəm ki, mexanizmlər daha da güclü olmalıdır”.
Fatimə Hacıbəyli: “Bu gün də bir sıra cəmiyyətlərdə qadınların haqları, hüquqları tapdalanır, lakin Azərbaycan qadına münasibətdə öz fərqliliyi ilə seçilir”
“Vəfa” Sosial İctimai Birliyinin sədri Fatimə Hacıbəyli qeyd etdi ki, hesabatda Azərbaycanın məlum mövzu ilə bağl geriləməsi qərəzlidir: “Nəzərə almaq lazımdır ki, ölkəmizdə gender bərabərliyi siyasəti uğurla həyata keçirilir. Azərbaycan Respublikasının Prezidenti cəmiyyətdə qadının rolunun yüksəldilməsinə yönəlmiş dövlət siyasətini ardıcıl surətdə uğurla davam etdirir, respublikamızın inkişafına töhfələrini verən qadınların əməyi həmişə layiqincə qiymətləndirilir. Bu gün də, bir sıra cəmiyyətlərdə qadınların haqları, hüquqları tapdalanır. Bəzən bu münasibəti din, məzhəb adı altında həyata keçirirlər. Lakin, Azərbaycan xalqı dünyanın işıqlı toplumlarından biri olaraq qadına münasibətdə öz fərqliliyi ilə seçilib. Bu isə ölkəmizin, xalqımızın dünyadakı nüfuzunu şərtləndirən amillərdən biridir. Biz hər yerdə fəxrlə deyirik ki, hələ bir sıra Qərb ölkələrində qadınlara səsvermə hüququ verilmədiyi dövrdə, Azərbaycanda bu hüquq tanınıb”.
Həmsöhbətimiz onu da əlavə etdi ki, müstəqil Azərbaycan Respublikasında gender məsələsinə olduqca həssas yanaşılır, ölkəmizdə Ailə, Qadın və Uşaq Problemləri üzrə Dövlət Komitəsi fəaliyyət göstərir. Azərbaycan qadınlara münasibətdə ayrıseçkiliyin bütün formalarının ləğv olunması haqqında beynəlxalq Konvensiyaya qoşulub. "Gender bərabərliyinin təminatları haqqında” Qanun 2006-cı ildə qəbul edilib. Cəmiyyətin ictimai-siyasi həyatında və idarəetmə sistemində fəal mövqe tutan qadınlar müstəqil respublikamızın daha da inkişafı naminə əzmlə çalışırlar.
Günel CƏLİLOVA
