Elşən Manafov: “Rəsmi Bakının coxvektorlu xarici siyasəti uğurla davam etdirməsi, müstəqil mövqe...”
Prezident İlham Əliyevin Albaniyanın paytaxtı Tiranada keçirilən “Avropa Siyasi Birliyi”nin VI zirvə toplantısında iştirakı ölkəmizin Avropa ilə siyasi və iqtisadi əlaqələrinin genişlənməsinin növbəti göstəricisi oldu. Bu iştirak Azərbaycanın Avropanın siyasi platformalarında söz sahibi olma istəyini və regional inteqrasiyada fəallığını göstərir.
Azərbaycanın Avropa İttifaqı ilə münasibətlərində əvvəllər mövcud olan soyuqluq isə artıq keçmişdə qalıb. Aİ-nin əvvəlki rəhbərliyi dövründə Azərbaycanla bağlı qərəzli və birtərəfli qərarlar qəbul edilsə də, rəsmi Bakının qətiyyətli siyasəti bu neqativ yanaşmanı aradan qaldırdı. Tiranada keçirilən sammit də bunun təsdiqi oldu. Zirvə toplantısına Azərbaycan Prezidentinin dəvət edilməsi Avropanın rəsmi Bakının mövqeyini diqqətə aldığını və regionda Azərbaycanın artan əhəmiyyətini qəbul etdiyini göstərdi. Sammit çərçivəsində Prezident İlham Əliyev Avropa İttifaqı Şurasının Prezidenti Antonio Koşta və Avropa Komissiyasının Prezidenti Ursula von der Leyen ilə görüşlər keçirdi.
Maraqlıdır, Azərbaycanla Avroittifaqın yenidən siyasi yaxınlaşması Avropada müəyyən qərəzli qüvvələri ölkəmizə qarşı yeni addımlar atmağa sövq edə bilərmi? Ümumən hansı addımlar atılacaq və yaxud da atıla bilər?
“Zəngəzur” neftdaşıyan tankerinə münasibətdə tətbiq edilən sanksiya da bu qəbildən olan təzyiqlərdəndir”
Sözügedən məsələ ilə bağlı fikirlərini “Bakı-Xəbər”lə bölüşən politoloq Elşən Manafov buna bir neçə aspektdən yanaşdı: “Avropa Siyasi Birliyi Avropa İttifaqının uzun illərdir ki, təşviq etdiyi platformalardan biridir. Prezident Əliyevin növbəti dəfə Tiranada keçirilən 6-cı zirvə toplantısına dəvət edilməsi dövlətimizin beynəlxalq aləmdə artan nüfuzundan xəbər verir. Azərbaycan Prezidenti İttifaqın əvvəllər də təşkil etdiyi bu siyasi tədbirlərə dəvət alıb və iştirak edib. Sevindirici haldır ki, Azərbaycan təkcə üzvi olduğu mötəbər beynəlxalq təşkilatların deyil, üzvi olmadığı qurumların da keçirdiyi beynəlxalq əhəmiyyətli tədbirlərə dəvət alır. Bu isə onun təmsil olunduğu regionun təhlükəsizlik problemlərinin həllinə ciddi təsir imkanlarının olması, habelə adıçəkilən təşkilatla münasibətləri qarşılıqlı faydalı əməkdaşlıq müstəvisi üzərində genişləndirmək üçün ardıcıl siyasətindən irəli gəlir. Avropa İttifaqının siyasi rəhbərliyindəki qlobalist dairələrin Azərbaycanı regionun geosiyasi konfiqurasiyasının dəyişdirilməsi oyunlarına cəlb etmək üzrə davamlı təkliflərinə baxmayaraq, rəsmi Bakı mövcud problemlərə özünün təhlükəsizlik qayğıları konteksindən yanaşaraq anti-Rusiya tədbirlərinə qatılmır. Rəsmi Bakının coxvektorlu xarici siyasəti uğurla davam etdirməsi, müstəqil mövqe və siyasi iradə nümayiş etdirməsi qlobalistləri geri çəkilməyə məcbur edib. Təbii ki, rəsmi Bakının qətiyyətli mövqeyi nəticəsində. Lakin siyasətdə əbədi maraqlar və konkret zaman konteksində srtateji hədəflərin, maraqların üst-üstə düşməsi bu gün rəsmi Bakı və Aİ arasında qarşılıqlı anlaşma və konstruktiv əməkdaşlıq üçün yeni imkan, perspektivlər vəd edir. Cənubi Qafqazda nüfuz dairəsi uğrunda mübarizə aparan və bu gün geosiyasi qütbləşmənin əks qütblərində dayanan tərəflər loqistika, dəhlizlərlə bağlı məsələlərdə rəsmi Bakının maraq və şərtlərini nəzərə almaq məcburiyyətindədirlər. Bunu rəsmi Bakı da gözəl başa düşür. O da bəllidir ki, qlobalistlər Azərbaycanla Cənubi Qafqaz qaz dəhlizi ətrafında enerji təhlükəsizliyi sahəsində əməkdaşlıq edən dövlətlərin siyasi elitalarına son vaxtlar təzyiqləri gücləndiriblər. Serbiya və Macarıstana bu qəbildən olan təzyiqlər göz qabağındadır. Azərbaycana məxsus “Zəngəzur” neftdaşıyan tankerinə münasibətdə tətbiq edilən sanksiya da bu qəbildən olan təzyiqlərdəndir. Azərbaycan bayrağı altında üzən bu tankerin guya ki, rus neftini daşıması ilə bağlı iradlar ona qarşı sanksiyalar üçün bəhanə olub. Gerçəkdə isə Rusiya ilə ticari münasibətlərdə dövriyyənin keçən illə müqayisədə artması Ukrayna müharibəsi ilə bağlı Avropada bəlli dairələrdə anti-Rusiya ovqatının güclənməsi ilə müşayiət olunur. Bu, Rusiya ilə faydalı qarşılıqlı münasibətlərə malik ölkələr üzərinə siyasi transferin səbəblərindəndir”.
Vidadi ORDAHALLI
