“Bu cür şişirdilmiş ştat vahidlərinin çoxluğu, eyni zamanda da Rəyasət Heyətinin tərkibinin gərəksiz yerə artıq olması bizə müsbət heç nə vəd etmir və bu bizim özümüzü aldatmağımızdan başqa bir şey deyil”
Dekabrın 28-də Azərbaycan Milli Elmlər Akademiyasının (AMEA) ümumi yığıncağı keçirilib.
AMEA-nın ümumi yığıncağının keçirilməsinin əslində Akademiya sistemdə həyata keçiriləcək islahatlarla bağlı olduğu açıqlanıb. Qurum rəhbərliyi tərəfindən, açıq şəkildə olmasa da, üstüörtülü şəkildə dəfələrlə bəyan edilib ki, Akademiyada şişirdilmiş statlar, heç bir fəaliyyəti olmayan şöbələr, yalnız adı olan “laboratoriya”lar, mərkəzlər fəaliyyət göstərir. Adı olub fəaliyyəti olmayan bu təsisatların ştatında isə saysız insanlar var, onların adına maaş kartları açılıb və həmin hesablara büdcədən vəsait ödənilir. AMEA-da “ölü canlar” ordusunun mövcud olduğu dəfələrlə gündəmə gətirilib.
Məlumatımıza görə, AMEA-nın ümumi yığncağında müzakirə edilən əsas məsələlərdən biri Akademiyanın Rəyasət Heyəti üzvlərinin sayının azaldılması ilə bağlıdır. Əldə etdiyimiz məlumata görə, son 5-6 ildə AMEA-nın Rəyasət Heyəti üzvlərinin sayı 70 nəfərdən 200-ə çatdırılıb və bu da son zamanlar AMEA-da ciddi narazılıqlar yaaradıb. Qeyd edilənə görə, AMEA-nın Rəyasət Heyəti üzvlərinin sayının azaldılması gündəliyə çıxarılıb. Belə ki, Rəyasət Heyətinin üzvlərinin sayının 200-dən təxminən 70-100-ə endiriləcəyi bildirilir.
Tarixçi alim, professor Məhərrəm Zülfüqarlı baki-xeber.com-a bildirdi ki, Rəyasət Heyəti üzvlərinin sayının azaldılması olduqca vacibdir. M.Zülfüqarlının sözlərinə görə, AMEA-da aparılacaq islahatlar ilk növbədə sayı süni surətdə şişirdilən Rəyasət Heyətinin tərkibindən və adı ştatda olub, özü işə gəlməyənlərdən başlamalıdır:”Ümumiyyətlə, son illər Akademiyada vaş verənlər, ştatların süni şəkildə şişirdilməsi, Rəyasət Heyətinin tərkibinin bir neçə qat artırılması müzakirə edilirdi. Hətta bəzi fikirlər də vardı ki, Elmlər Akademiyası və onun strukturları ləğv olunmalı, elmi-tədiqiqat institutlarının səlahiyyətləri universitetlərə verilməlidir. Dünyanın əksər ölkələrində belədir. Elmlər Akademiyasında bu cür bürokratik, üzvlərinin sayı şişirdilmiş bir aparatın olmasına zərurət yoxdur, Rəyasət Heyətinin tərkibi azaldılmalıdır. Mən elmi işlərlə əlaqədar Elmlər Akademiyasına gedirəm, kiçik bir otaqda 30-40 nəfər ştatdadır, onlar işə belə gəlmirlər. Ştatda olanların hamısı bir gündə işə gəlsə nəinki otağa, heç dəhlizə də sığışa bilməzlər. Bu cür şişirdilmiş ştat vahidlərinin çoxluğu, eyni zamanda da Rəyasət Heyətinin tərkibinin gərəksiz yerə artıq olması bizə müsbət heç nə vəd etmir və bu bizim özümüzü aldatmağımızdan başqa bir şey deyil. Əgər elmin inkişafını istəyiriksə, Rəyasət Heyətinin tərkibi azaldılmalı, elmi fəaliyyətlə məşğul olmaq istəyənlərə şərait yaradılmalıdır. Bu gün AMEA-da ciddi elmi-tədqiqat işləri ilə məşğul olmaq istəyən alimlərin ən çox ehtiyacı olduğu şey kompyuterdi, onlara otaq, kompyuter verilməlidir ki, oturub işləsinlər. Neçə illərdir ki, bu problem var. Amma problemi həll edən yoxdur”.
M.Zülfüqarlının qeyd etdiyinə görə, AMEA-da elə yaşlı alimlər var ki, bura sadəcə maaş almağa gəlirlər, heç bir elmi nəticələri yoxdur. M.Zülfüqarlı hesab edir ki, AMEA prezidenti, akademik Ramiz Mehdiyev alimlərin Akademiyadakı problemlərlə bağlı səsləndirdiyi problemlərin həlli ilə də bağlı addım atmalıdır. “Rəyasət Heyətinin tərkibinin şişirdilmiş sayda olmasına ehtiyac yoxdur və onların sayının azaldılması daha doğru qərar olardı. Hesab edirəm ki, Akademiya rəhbərliyi bizim tənqidi qeydlərimizi də nəzərə alar və bu istiqamətdə də islahatlar aparar”-deyə M.Zülfüqarlı qeyd etdi.
İradə SARIYEVA
