Bir müddət əvvəl Azərbaycanı onun starteji tərəfdaşı, qonşusu olan Gürcüstanla süni qarşıdurmaya çəkmək kimi meyllər özünü aydın göstərdi. Söhbət iki ölkənin sərhədində olan Keşikçi dağla bağlı yaşanan hadisələrdən gedir. Lakin hər iki ölkə rəsmilərinin, ictimaiyyətinin həssaslığı nəticəsində bunu istəyən qüvvələrin niyyətləri ürəklərində qaldı.
Bugünlərdə isə ölkəmizi başqa bir təxribata çəkmək kimi cəhdlər müşahidə edilir. Budəfəki istiqamət Rusiyadır. İddia olundu ki, güya Rusiyadan gələn bir qrup dindar Qax rayonunda olan Hacı Murad adlı tarixi şəxsiyyətin məzarını qazıb, qalıqlarını oğurlayaraq aparıb Dağıstanda yenidən dəfn ediblər. Maraqlıdır ki, bu məlumatla bağlı hətta sosial mediada paylaşımlar da edilib. Lakin Azərbaycanın rəsmi dairələri bu məlumatın yalan olduğuna dair açıqlamalar verdi. Sonra ölkəmizdən olan bir qrup fəal gedib həmin məzarın fotosunu çəkib paylaşdı və göründü ki, məzar olduğu kimi yerindədir. Aydın oldu ki, ölkədə ciddi rezonansa səbəb olan bu hadisə açıq təxribat xarakterli imiş. Keşikçi dağın ardınca Hacı Murad olayının ortaya atılmasında məqsəd Azərbaycanın yaxın qonşuları ilə münasibətlərini gərginləşdirmək ola bilərmi və burda kimin barmağı görünür?
Politoloq Yeganə Hacıyeva qəzetimizə bildirdi ki, Azərbaycan-Gürcüstan dövlət sərhədinin keçdiyi təpələr sırası boyunca, təxminən 25 kilometr məsafədə səpələnmiş tarixi, memarlıq və dini obyektlərdən ibarət olan Keşikçi Dağı Alban Məbəd Kompleksinin ətrafında qonşu ölkənin şübhəli siyasi qruplarının “operator”luğunda hibrid texnologiyası və ənənəvi təbliğat üsulları ilə hər iki cəmiyyətlərə yönəlmiş ölkələrarası gərginlik yaratma cəhdlərinin şahidi olduq: “Bu cəhdlər hər iki dövlət, strateji tərəfdaşlar -Azərabaycan və Gürcüstan rəsmilərinin təmkinli yanaşması ilə “zərərsizləşdirildi”. İki ölkənin rəsmilərindən kənarda dini rəhbərlər və nüfüzlu şəxslər Azərbaycan və Gürcüstan arasında ciddi problemin yaranmasına çalışan kənar qüvvələrin mövcudliğu haqqında fikirlər bildirdilər. Qonşu Gürcüstanın patriarxı II İlyanın Keşikçi Dağı Məbəd Kompleksi ilə bağlı fikirləri buna nümunədir. Bu günlərdə isə ölkə mediasının diqqətini Azərbaycanın Qax rayonunun Tanqıt kəndində kimliyi məlum olmayan bir qrupun XIX əsrin ortalarında Qafqaz müharibəsində dağlıların liderlərindən olmuş Şeyx Şamilin naibi Hacı Muradın güman edilən qalıqlarının icazəsiz şəkildə Azərbaycandan çıxarılaraq Dağıstanın Xunzax rayonunda dəfn edilməsi haqqında məlumatlar cəlb etdi. Mövzunu xronologiyası ilə ardıcıl qeyd etsək, bir neçə gün öncə qonşu dövlətin bir sıra kütləvi informasiya vasitələrində iyunun 2-də Hacı Muradın qalıqlarının onun doğma kəndində – Dağıstanın Xunzax kəndində yenidən dəfn ediləcəyi haqqında məlumatlar getdi. İlk gündən bu mövzuda diqqət çəkən və düşündürən əsas məqam mövzunu birinci məhz Rusiyada ənənəvi anti-Azərbaycan mövqeyi ilə seçilən və ermənipərəst dairələrə bağlı media orqanlarının gündəmə gətirməsi və yenə də eyni dairələrə mənsub medianın bu məlumatların tirajlanmasında rolu və xüsusi cənfəşanlığı oldu. Bir gün sonra isə Azərbaycan tərəfindən mediada Qax rayonunun ictimai fəallarının Hacı Muradın qəbrinin sinə daşının sökülməsinə şahid olmaları haqqında məlumatlar getdi. Eyni gündə Dağıstanda lokal mediada, xüsusilə internet versiyası sosial media üzərindən populyar olan saytda Dağıstanın Xunzax rayonunun başçısının müavini və mətbuat katibinə istinadən naibin qalıqlarının Dağıstanda yenidən dəfn ediləcəyi ilə bağlı məlumat, həmçinin rayonun rəsmi şəxslərinin dəfndə iştirak etməsi təkzib olundu. Rayon administrasiyasının mətbuat xidməti dəfni həyata keçirən adamların kimliyi haqqında məlumatlara malik olmamaları ilə bağlı fikirlər söylədi”. Politoloqun sözlərinə görə, bütün bunları kəskinləşən Rusiya - İran - Qərb münasibətləri fonunda mürəkkəb regional çağırışlarının Qərbin yüz milyardlarla dollarlıq ticarətinin, həmçinin ABŞ prezidenti Donald Trampın məktubunda qeyd edildiyi kimi, Orta Asiya enerjidaşıyıclarınının da yalnız bir real marşrutu olan Azərbaycanın adı ətrafında təhlükəsiz və stabil tərəfdaş imicinin pozulmasına yönələn uğursuz cəhdlərindən daha biri adlandıra bilərik.
Məhəmmədəli QƏRİBLİ
