Bakıda keçirilən “Formula 1” sərbəst yürüşünün ilk günündə Böyük Britaniyanın “Williams” komandasının pilotu Corc Rassellin bolidinin təkərinin tarsdakı kanalizasiya “lyuk”una düşməsi ətrafında müxtəlif müzakirələr aparılır. Qeyd edək ki, aprelin 26-da keçirilən Formula 1 Azərbaycan Qran-Prisinin birinci sərbəst yürüşü sessiyası “lyuk” qapağının yerindən tərpənməsi nəticəsində ləğv olunub. Bakı Şəhər Halqasından verilən açıqlamada qeyd olunub ki, 300-dən çox lyuk təkrar yoxlanılacaq.
Buna siyası motivlər qatıb sevinənlər də oldu, hadisəni ətraflı araşdıranlar da. Məsələyə obyektiv yanaşdıqda məlum olur ki, analoji hadisələr sürətin hakim olduğu ralli tarixində ilk dəfə deyil baş verir. Ancaq hər halda, bu hadisə həmin yolun və infrastrukturun hansı qurum tərəfindən qurulduğunu gündəmə gətirmiş oldu. Mövzu kanalizasiya “lyuk”u ilə bağlı olduğu üçün məsələyə ilk münasibət bildirənlərdən biri də “Azərsu” ASC olub. Qurumun İctimaiyyətlə əlaqələr şöbəsinin müdiri Anar Cəbrayıllı bildirib ki, ərazidəki “lyuk”lara “Azərsu” cavabdeh deyil: “Yarışların keçirildiyi küçələrdə bütün infrastruktura “Azvirt MMC” şirkəti cavabdehdir”. Biz həmin sahədəki işlərin sözügedn MMC tərəfindən hansı keyfiyyətlə icra olunduğu barədə nəsə deyə bilmərik. Ancaq maraqlı olan budur ki, son vaxtlar dövlət əhəmiyyətli böyük layihələrin əksəriyyətinin hansısa MMC-lər tərəfindən icra edildiyinin şahidi oluruq. Bu cür mühüm işləri niyə dövlət qurumları deyil, məhz MMC-lər həyata keçirir?
İqtisadçı Elşən Əliyev “Bakı-Xəbər”ə bildirdi ki, hansısa böyük layihələrin MMC və özəl iri şirkətlər tərəfindən həyata keçirilməsi müasir dövrün tələblərindən irəli gəlir: “Planlı iqtisadiyyatda bu başqa cür idi. Bütün sifarişlər dövlət qurumları tərəfindən həyata keçirilirdi . Müasir bazar iqtisadiyyatı və sərbəst tənzimlənən iqtisadiyyatda isə bunu uyğun sahələr üzrə ixtisaslaşmış şirkət və ya MMC-lər həyata keçirir. Dövlət qurumlarının bu cür layihələrin hamısını öz resursları hesabına icra etməyə heç gücü da yetə bilməz. Hansısa işin özəl şirkətə tapşırılması heç də o anlama gəlmir ki, həmin iş məsuliyyətsiz icra olunmalıdır. Mexanizm belədir ki, böyük layihəni həyata keçirilməli olan dövlət qurumu həmin layihə ilə bağlı tender elan edir. Tenderin qalibi olan şirkət işin icrasını üzərinə götürür. Burada da bir sıra vacib parametrlər nəzərə alınır. Yəni şəffaf keçirilən tenderlərdə əsas şərt kimi həmin şirkətin dövlət qurumunun rəhbərliyinə yaxınlığı deyil, həmin sahə üzrə peşəkar olub-olmaması, reputasiyası əsas götürülür. Biz şahidi olmuşuq ki, ölkəmizdə bəzi iri layələri hətta əcnəbi şirkətlər həyata keçirib və uğurlu da alınıb. Bu işlərin yerli şirkətlər tərəfindən görülməsinin müsbət tərəfləri də var. Çünki bu zaman həmin layihələrin icrasında daha çox yerli işçi qüvvəsindən istfadə edilir. Yəni mənfəəti öz vətəndaşlarımız götürür. İstənilən halda, sifarişçi dövlət şirkəti işi qəbul edəndə də kefiyyətə tam nəzarət etməlidir. Burda onun da ciddi məsuliyyəti olur. Yəni bəzi layihələrin özəl şirkətlər tərəfindən icra olunması heç də onun keyfiyyətsiz icra olunacağına dəlalət edə bilməz. Sizin bəhs etdiyiniz hadisədə iş icraçısının ciddi məsuliyyətinin olduğu qənaətində deyiləm. Çünki analoji hadisələrin rallilərdə baş verməsi normal haldır. Şükür ki, ölüm-itim olmayıb”.
Məhəmmədəli QƏRİBLİ
