Bayramları çox sevirəm, istər rəsmi dövlət bayramları olsun, istərsə də adət-ənənələrimizi yaşadan milli bayramlar, fərq etməz. Əsas odur ki, bu bayramlar məndə nostalji hisslər oyadır və bütün bayramlarda uşaqlığıma qayıdaraq o illərdə yaşadığım bayram ovqatını bir də yaşayıram. Lakin Qurban bayramı istisnadır. Niyə? Deyəcəyəm.
Mən uşaq olanda Qurban bayramı kimi milli bayramlar sovet rejimi tərəfindən qadağan olunmuşdu. Lakin buna baxmayaraq, sadə xalq, bütün milli bayramları kimi, bu bayramı da özünün milli ruhunun diqtəsilə bacardığı şəkildə qeyd edirdi və imkanı olan qurbanlığını kəsib, azı yeddi kasıb qonşusuna pay ayırırdı. Amma bu nümayişkaranə şəkildə deyil, sıradan məişət hadisəsi kimi həyata keçirilirdi və müqəddəslərimizin də buyurduğu kimi, “sağ əlin verdiyindən sol əlin xəbəri” olmurdu. Bir də nişanlı qızların qapısına qurbanlıq qoç göndərilirdi. Bər-bəzəyi isə indikilərdən kəskin şəkildə fərqlənirdi – belinin ortasında bir əlçim yuna xına yaxılırdı və buynuzuna qırmızı lent bağlanırdı ki, bilinsin gəlin qapısına gedir. Bu gün isə...
Son illərin ən geniş diapazonlu trendi sayılan sosial şəbəkələrin məişətimizin ayrılmaz hissəsinə çevrildiyi faktdır. Bu şəbəkələr istər elmi, istər məişət səviyyəsində olsun, bütün mövzulara açıqdır və o üzdən də gündəmin mövzusundan xəbərdar olmaq üçün səhər-səhər bu şəbəkələrə daxil olub səhifəni vizual şəkildə nəzərdən keçirmək yetərlidir. Təbii, güllü-çiçəkli doğum günləri, bayram təbrikləri bu xəbərləşmə şəbəkəsinin ürəkaçan olmazsa-olmazıdır. Amma yaşadığımız günlərdə qeyd olunan Qurban təsvirləri heç də ürək açmır, hətta əksinə, böyük məyusluq yaşadır. İstər-istəməz düşünürsən ki, görəsən qurbanlıq qoyunlara bər-bəzəkli paltarlar (!) geyindirmək kimin ağlının məhsuludur ki, bütöv bir nəsli də arxasınca apara bilib? Özü də artıq neçə ildir qurbanlıq qoyunlar qırmızı geyindirildiyi halda, bu il onların da “qarderobunda” dəyişiklik edilib. Belə ki, builki qurbanlıqlardan birinə ağ gəlinlik geyindirilib, başına isə bəzəkli fata qoyularaq sosial şəbəkələrdə nümayiş olunub! Hər bir gənc qızın arzusu olan bu geyimin qoyuna geyindirilməsini hansı q...n düşünüb, mənə çox maraqlıdır. Şəklə baxdıqda isə istər-istəməz sual vermək istəyirsən ki, bu "gəlinin" “bəyi” kimdir? Bəlkə bu novatorluğu edən fərqində deyil, amma bilməlidir ki, bu, müqəddəslərimizdən bizə miras qalan bayramı təhqir etməkdir! Ya dini bayramlarımızı onların qoyduğu kurallara uyğun qeyd edin, ya da klounluğunuzu başqa sahələrdə göstərin, insanların hisslərilə oynamayın!
Məsələnin başqa tərəfi də var ki, bu şəbəkələr düşmənlərimizin də üzünə açıqdır və o üzdən sabah erməni saytları dini bayramı sirk tamaşasına döndərməyimizdən yazsa heç təəccüblənmərəm. Üstəlik, onlara deyəsi sözümüz də olmaz – bu hərəkətlərə necə bəraət qazandıra bilərsən?
Düşündürücüdür... Düşünməliyik...
SAMİRƏ
P.S. Telefonumuz “votsap”ına təbrik mesajı gəlib, lakin nömrə siyahımda olmadığından ad düşməyib. Cavab yazıb minnətdarlıq etmək üçün öncə profil şəklini açıb kimliyilə maraqlandım: qırmızı lentli bir qoyun məlul-məlul mənə baxırdı... Heç nə yazmadım – bıçağa gedən heyvana nə arzulayım ki?..
