Tahir Kərimli: "Bütün çətinliklərə rəğmən, hüquqpozmalarla bağlı məlumat verən şəxslərin təhlükəsizliyinin təmin olunması..."
Azərbaycanda korrupsiya halları barəsində müvafiq qurumlara məlumat verən şəxslər dövlət tərəfindən qorunacaq. Milli Məclisdən verilən məlumata görə, bu əlavə "Korrupsiyaya qarşı mübarizə haqqında" Qanuna təklif edilən yeni maddədə öz əksini tapıb. Belə ki, "Korrupsiyaya qarşı mübarizə haqqında" Qanuna 11-2-ci maddənin (Korrupsiya ilə əlaqədar hüquqpozmalarla bağlı məlumat verən şəxsin dövlət müdafiəsi) əlavə edilməsi təklif edilir.
Bu maddəyə əsasən, korrupsiya ilə əlaqədar hüquqpozmalarla bağlı məlumat verən şəxs özü barədə məlumatın açıqlanmasını istəmədiyi halda, səlahiyyətli struktur bölmə, idarə, müəssisə və ya təşkilatın rəhbəri və korrupsiyaya qarşı mübarizə sahəsində ixtisaslaşmış orqanlar onun konfidensiallığını təmin etməlidir. Bu məlumat korrupsiya ilə əlaqədar hüquqpozmalarla bağlı məlumat verən şəxsin yazılı razılığı olduqda açıqlanır. Şəxsin konfidensiallığının pozulmasında təqsirli olanlar qanunla müəyyən edilmiş qaydada məsuliyyət daşıyır.
Həmin maddəyə görə, korrupsiya ilə əlaqədar hüquqpozmalarla bağlı məlumat verən şəxsə və ya onun yaxın qohumuna hədə-qorxu gəlmək, onları təzyiqlərə məruz qoymaq, maddi və ya mənəvi ziyan vurmaq, təhqir və təhdid etmək, şərəf və ləyaqətini alçaltmaq qanunla müəyyən edilmiş qaydada məsuliyyətə səbəb olur.
Bu əlavə Milli Məclisin gələn həftə keçiriləcək plenar iclasında gündəliyə çıxarılacaq.
Bütün hallarda, sözügedən dəyişikliklər korrupsiyaya qarşı mübarizədə nə kimi effekt verə bilər?
Sözügedən məsələni dəyərləndirən millət vəkili Tahir Kərimli buna müsbət prizmadan yanaşır. Onun fikrincə, "Korrupsiyaya qarşı mübarizə haqqında" Qanuna təklif edilən əlavələr kifayət qədər faydalıdır: "Eyni zamanda, bu dəyişikliklər ölkədə korrupsiyaya qarşı mübarizənin gücləndirilməsinə hesablanıb. Ancaq mən komitənin iclasında da bu məsələyə toxunmuşam ki, kiçik büdcə təşkilatlarında belə bir komissiyanın yaradılması bir o qədər də effektli olmayacaq. Bu cür vəzifələr ancaq baş idarələrdə müəyyənləşdirilməlidir. Amerikada marşal xidməti var. Hüquqpozmalarla bağlı məlumat verən insanların hətta üzləri də dəyişdirilərək başqa ünvanlara köçürülür ki, korrupsionerlərin təqiblərindən kənarda qalsınlar. Amma Azərbaycan böyük dövlət olmadığı üçün müəyyən çətinliklər olacaq. Bütün çətinliklərə rəğmən, hüquqpozmalarla bağlı məlumat verən şəxslərin təhlükəsizliyinin təmin olunması dövlət strukturlarında çalışan insanlar üçün stimul rolunu oynayacaq. O mənada ki, onlar rastlaşdığı korrupsiya halları ilə bağlı aidiyyəti qurumları məlumatlandırsın. Sözsüz ki, burada ən çox məsuliyyət subyektlərin üzərinə düşəcək. Çünki qanunda nəzərdə tutulub ki, qəsdən hüquqpozmalarla bağlı yalan məlumatlar verən şəxslər məsuliyyətə cəlb olunacaq. Ona görə də sözügedən əlavələrin effektiv olması üçün vətəndaşların qanuna hörmət hissinin olması və hüquqpozmalarla bağlı məlumat verən şəxslərin müraciətlərinin nəzərə alınması və onların təhlükəsizliyinin təmini mexanizmi dəqiq işlənib hazırlanmalıdır".
Vidadi ORDAHALLI
