Milli Məclisin payız sessiyasının bu gün ilk iclası başlayıb. İclasın gündəliyinə 31 məsələ daxil edilib. İclası açıq elan edən spikeri Oqtay Əsədov bildirib ki, sentyabrın 26-da Azərbaycan Konstitusiyasına dəyişikliklərlə bağlı ümumxalq səsverməsi demokratik və şəffaf şəraitdə keçib. O.Əsədov bildirib ki, bu referendum Azərbaycan Prezidenti İlham Əliyevin uzaqgörən siyasətinə xalqın güclü dəstəyini nümayiş etdirdi.
Milli Məclisin payız sessiyasının ilk iclasında Avropa Parlamenti ilə Azərbaycan Milli Məclisi arasında əməkdaşlıq məsələləri haqqında məsələ də müzakirəyə çıxarılıb. Oqtay Əsədov bildirib ki, 2015-ci ildə Avropa Parlamentinin Milli Məclisə qarşı qəbul etdiyi qərəzli qətnaməyə görə Milli Məclis öz qərarını vermişdi və o dövrdən Avropa İttifaqı Parlament Əməkdaşlıq Təşkilatı və eləcə də AvroNest-də öz iştirakını dayandırmışdı: “Bu bir il ərzində biz onların heç bir tədbirində iştirak etməmişdik. İl ərzində dəfələrlə Azərbaycan Parlamentinə müraciətlər olunub, şəxsi səfərlər olub, bu məsələləri qaydaya qoymaq üçün cəhdlər olub. Sentyabrın 19-20-də Avropa Parlamentinin qərarı ilə 15 nəfərdən ibarət nümayəndə heyəti Azərbaycana gəldi. Prezident İlham Əliyev bu nümayəndə heyətini qəbul etdi və heyətə qəti iradlarını bildirdi. Əgər münasibətlərimizi bərpa edəcəyiksə, dövlət başçısı hansı istiqamətdə bərabərhüquqlu səviyyədə əlaqələrimizi davam etdirməyimiz barədə münasibətini bildirdi”.
İclasda “Avropa Parlamenti ilə Azərbaycan Respublikasının Milli Məclisi arasında əməkdaşlıq məsələləri haqqında” qərar layihəsi də müzakirəyə çıxarılıb. Layihəni təqdim edən MM-in Beynəlxalq münasibətlər və parlamentlərarası əlaqələr komitəsinin sədri Səməd Seyidov bildirib ki, Avropa Parlamenti ötən il Azərbaycanla bağlı qərəzli qərar qəbul etdikdən sonra ötən 1 il ərzində avroparlamentarilər rəsmi və qeyri-rəsmi şəkildə bu münasibəti bərpa etməyə çalışıblar, amma Azərbaycan deputatlarından heç kim onlarla ünsiyyətdə olmayıb: "Onlara bir fikir çatdırılıb ki, Azərbaycanla bağlı öz münasibətlərində çox ciddi dəyişiklik etməlidirlər. Biz dedik ki, Azərbaycanla ikitərəfli münasibətlərin bərpasını istəyirlərsə, Avropa Parlamentinin rəhbərliyi tərəfindən mandat əldə etmiş nümayəndə heyəti göndərməlidirlər. Belə də oldu və bu il sentyabrın 19-da Azərbaycana geniş tərkibdə nümayəndə heyəti gəldi. Avropa Parlamenti belə geniş tərkibdə hələ heç bir ölkəyə nümayəndə heyəti göndərməyib.
Onlar Azərbaycan prezidenti tərəfindən qəbul olundu, bütün söhbət mətbuatda da geniş işıqlandırıldı. Çox konkret, obyektiv və Avropa Parlamentinin qeyri-obyektivliyini sənədlər əsasında əks etdirən görüş oldu. Bu görüş dönüş nöqtəsi idi. Azərbaycan prezidenti faktları ortaya qoydu və onlar anladılar ki, Avropa Parlamenti Azərbaycanla ikitərəfli münasibəti qorumaq istəyirsə, hər hansı məsələni yalnız sözlə yox, sənədlə ortaya qoymalıdır.
Azərbaycan heç bir beynəlxalq təşkilatla əməkdaşlıqdan imtina etməyib, etmək fikrində olmayıb. Biz Avropa Birliyi ilə də ən yüksək səviyyədə münasibətlər qurmaq istəyirik. Amma qarşıqlıqlı maraqlar qorunmalıdır".
Spiker Oqtay Əsədov isə bildirib ki, bir çox avroparlamentarilər təklikdə görüşdə ötən il qəbul etdikləri qərara görə üzr istəyiblər.
O, həmçinin qeyd edib ki, qrup yaradılıb və bu qrup Avronestlə bağlı qərar üzərində də işləyəcək.
Layihə səsə qoyularaq qəbul olunub.
Sənəddə bildirilir ki, Avropa Parlamentinin 2015-ci il sentyabrın 10-da Azərbaycana dair qəbul etdiyi ədalətsiz və qeyri-obyektiv qətnamə bu parlament təşkilatı ilə Azərbaycan arasında münasibətlərin inkişafına ciddi zərbə vurub.
“Ölkəmizlə Avropa İttifaqı və onun üzvü olan dövlətlər arasında tərəfdaşlığı sarsıtmağa, Azərbaycanın beynəlxalq nüfuzuna xələl gətirməyə yönələn bu qərəzli siyasi aksiyanın cavabında Milli Məclis 2015-ci il sentyabrın 14-də müvafiq qərar qəbul edib.
Həmin qərara əsasən, Milli Məclis Avronest Parlament Assambleyasında üzvlüyə xitam verilməsi barədə prosedur qaydalarının icrasına başlanılmasını və prosedur dövründə Milli Məclisin nümayəndə heyətinin Avronest PA-nın tədbirlərin qatılmaması qərara alınıb. Eyni zamanda həmin qərarla Avropa İttifaqı-Azərbaycan Parlament Əməkdaşlığı Komitəsinin mövcud formatda fəaliyyətində Milli Məclisin iştirakına son qoyulub.
Bu il sentyabrın 19-21-də Avropa Parlamentinin 15 nəfərdən ibarət nümayəndə heyəti Azərbaycanda olub və əlaqələrin bərpa edilməsi məsələsini müzakirə edib.
Səfərin yekunlarına uyğun olaraq qarşılıqlı münasibətlərin qırılmasına gətirib çıxara biləcək hər hansı halların gələcəkdə baş verməməsi üçün zəruri tədbirlərin görüləcəyi əminliklə qeyd edilib. Milli Məclis bunları nəzərə alaraq, Avropa Parlamenti ilə əlaqələri yenidən bərpa etmək üçün parlamentin 2015-ci ilin 14 sentyabr tarixli qərarı 10-cu və 11-ci maddələri qüvvədən düşmüş sayır”.
Millət vəkili Bəxtiyar Əliyev Böyük isə Britaniya parlamentinin üzvü baronessa Kerolayn Koksun Ermənistan-Azərbaycan münaqişəsinə dini don geyindirmək haqqında fikirlərini tənqid edib. B.Əliyev deyib ki, hər zaman ermənipərəst mövqeyi ilə seçilən Koks Dağlıq Qarabağa gələrək işğalçı ordunun əsgərləri qarşısında çıxış edərək bildirib ki, “siz burada xristianlığı müdafiə edirsiniz”: “Bakıda keçirilən V Beynəlxalq Humanitar Forumda da qeyd edilmişdir ki, Qərbdə müsəlmanlarla xristianları qarşı-qarşıya qoyurlar, ayrı-seçkilik edirlər. Bu, təhlükəli tendensiyadır. Hesab edirəm ki, onun dini ədavət çağırışı Britaniya parlamentində müzakirə edilməlidir. Çünki dini ədavətə çağırış yolverilməz haldır”.
Milli Məclis sədri Oqtay Əsədov isə bildirib ki, artıq ermənilər Ermənistan-Azərbaycan, Dağlıq Qarabağ münaqişəsini yeni formada dünya ictimaiyyətinə çatdırmağa çalışır və bu istiqamətdə iş aparır: “Bu da ondan ibarətdir ki, ermənilər Ermənistan-Azərbaycan münaqişəsinə dini don geyindirərək təqdim etməyə çalışırlar. Mən bu barədə bu yaxınlarda AŞPA-ya üzv ölkələrin parlament sədrlərinin toplantısında da çıxış edərək, Ermənistanın bu siyasəti haqqında məlumat verdim. Bildirdim ki, bəzi qüvvələr Ermənistan-Azərbaycan münaqişəsinə dini don geyindirməyə çalışır”.
Britaniyalı parlamentarinin Azərbaycanının işğal edilmiş ərazisində səsləndirdiyi fikirlərə gəldikdə isə, O.Əsədov bildirib ki, “Baronessa Koks heç bilmir ki, atası kimdir. O, atasını da tanımır”.
Milli Məclisinin iclasında elektron mediaya maliyyə dəstəyi göstərilməsi barədə təklif də səslənib (APA). Bu təşəbbüslə Mətbuat Şurasının sədri, deputat Əflatun Amaşov çıxış edib. O qeyd edib ki, hökumət yazılı mətbuata dəstək verir və bu dəstəyini KİVDF vasitəsi ilə həyata keçirir: “Amma bu gün cəmiyyətimizdə internet –onlayn media sürətlə inkişaf edir. İnternet mediasının cəmiyyətdə rolunun artmasına baxmayaraq, bu media resursu da maliyyə çətinlikləri ilə üzləşir. Bu baxımdan internet medianın statusunu müəyyənləşdirərək, maliyyə dəstəyinin göstərilməsinə diqqət yetirmək lazımdır”.
Deputat medianın sosial-iqtisadi vəziyyətinin yaxşılaşdırılması məqsədi ilə medianın reklam problemindən danışıb: “Bu gün ölkə mediasında reklamın azlığı mətbuatın çətin durumunu bir az da çətinləşdirir. Çünki medianın durumu reklamdan asılıdır. Media özünü reklamla yaşatmalıdır. Ancaq bu sahədə problemlər var. Reklam məsələsində balans qorunmalıdır. Çünki hökumət mediaya uzun müddət maliyyə dəstəyi göstərə bilməz. Mediada reklam bazarı inkişaf etdirilməli və buna şərait yaradılmalıdır”.
Ə. Amaşov “Diffamasiya haqqında” qanunun qəbulunu da təklif edib.
Müdafiə, təhlükəsizlik və korrupsiya ilə mübarizə komitəsinin sədr müavini Aydın Mirzəzadə isə bildirib ki, Azərbaycanda tələbələrə kreditlərin ayrılması ilə bağlı problemlər mövcuddur.
YAP-çı deputat deyib ki, bir müddət əvvəl Azərbaycanda Tələbə Kredit Fondu yaradılsa da, ancaq təəssüflər olsun ki, bu quruma cəmi 11 universitet üzv olub: “Bu da müəyyən problemlər yaradır. Bu sahədə problemlər tam həllini tapmayıb. Valideynlər narazılıq edirlər, universitetlərin bir hissəsi Tələbə Kredit Fonduna üzv olmayıb. Düşünürəm ki, tələbələrin bu problemi həll edilməlidir”.
Əli Məsimli isə bankları manipulyasiya edib insanları aldatmaqda ittiham edib. Manatın ölkədə yeganə ödəniş vasitəsi olduğunu xatırladan millət vəkili dollar ifadəsində ödənişi düzgün saymır: "Kimsə toyla əlaqədar mebel alıbsa, devalvasiyadan sonra niyə onun ödənişi artmalıdır? Mebelin dəyərinin manatla nəzərdə tutulmasına baxmayaraq, devalvasiyadan sonra ödənişi çoxaldırlar. Mən başa düşmürəm ki, mebel niyə dollarla alınmalıdır? Buna görə də əhali uzun müddət banklara borclu qalır. Və ya banklar müqavilədə ödənişlə bağlı öz xeyirlərinə müddəalar əlavə edirlər. Dünyanın heç bir yerində bankların belə soyğunçuluğu yoxdur. Vaxtında bu problem həll olmasa, vəziyyət daha da acınacaqlı hal alacaq".
Millət vəkili Qənirə Paşayeva 1-ci qrup əlillərin ödənişli ali təhsildən azad edilməsini təklif edib. Həmkarı Məlahət İbrahimqızının təklifini dəstəkləyərək 1-ci qrup əlillərin ödənişli ali təhsildən azad edilməsi, onların təhsil haqqının dövlət vəsaiti hesabına ödənilməsi təklifi ilə çıxış edib.
O deyib ki, bu adamların sayı çox deyil: "Yaxşı olar ki, onların təhsil haqqını dövlət ödəsin. Onların təhsil haqqından azad edilməsi məsələsinə baxılmalıdır".
"Banklar maliyyə hesabatlarını vaxtında açıqlamalıdır. Vətəndaş da bu məlumatlarla tanış olmalıdır. Çünki, vətəndaşlar pullarını banklara qoyur, sonradan banklar bağlananda vətəndaşlar əziyyət çəkir". "APA-Economics" xəbər verir ki, bunu isə Qüdrət Həsənquliyev bildirib.
Onun sözlərinə görə, bankların məlumatları açıqlaması təmin olunmalıdır ki, vətəndaş pulunu etibar etdiyi maliyyə təşkilatının vəziyyətini qiymətləndirə bilsin.
Q. Həsənquliyev əlavə edib ki, sığorta şirkətləri də insanları həddindən çox incidir: "Sığorta şirkətləri avtomobili qəzaya uğrayan vətəndaşlara ödəniş etməkdən yayınır. Mənə bununla bağlı vətəndaşlardan çox sayda şikayətlər daxil olur. Mən özüm də bir neçə dəfə sığorta şirkətlərinin nümayəndələri ilə telefonla danışmışam. Ödənişin olunmamasının səbəbini soruşuram. Cavab verirlər ki, avtomobil köhnədir və sairə. İnsanları bu qədər incitmək olmaz. Hesab edirəm ki, sığorta şirkətlərinin bu cür fəaliyyətinin qarşısı alınmalıdır".
