Böyük Britaniya parlamenti baş nazir Tereza Meyin Avropa İttifaqı ilə razılaşdırdığı “Brexit” sazişini üçüncü dəfə rədd edib.
Baki-xeber.com xarici mediaya istinadən xəbər verir ki, Britaniyanın Aİ-dən çıxış tarixi kimi təyin edilən 12 aprelə 2 həftə qalmış T.Meyin “Brexit” razılaşması növbəti dəfə parlamentdən dəstək ala bilməyib. Parlamentin 286 deputatı sazişin lehinə, 344 deputatı isə əleyhinə səs verib.
Bu nəticə ilə T.Meyin “Brexit” siyasəti çökməklə yanaşı, İngiltərə, Şotlandiya, Uels və Şimali İrlandiyadan ibarət Birləşmiş Krallığın ən azından yaxın gələcəyi üçün böyük bir qeyri-müəyyənlik yaranıb.
Üçüncü məğlubiyyəti alan və çox məyus olan T.Mey bunun çox ciddi nəticələrinin olacağını bildirib. Mühafizəkar Partiya lideri, ölkənin 12 apreldə "hüquqi öhdəlik" olaraq Aİ-dən ayrılacağını və bunun da, razılaşmasız “Brexit”i önləmək məqsədilə yeni addımların atılması üçün kifayət qədər vaxtın olmadığı anlamına gəldiyini deyib.
Müxalifətdəki İşçi Partiyası lideri isə Meyi istefa verməyə çağırıb: “Tereze Mey getməlidir, gələcəkdə, qeyri-müəyyən tarixdə deyil indi getməlidir”.
Böyük Britaniya parlamentinin anlaşmanı üçüncü dəfə rədd etməsinin ardından, Avropa İttifaqı Şurasının prezidenti Donald Tusk Twitter hesabından aprelin 10-da “Brexit”lə bağlı Şuranın iclasını çağırdığını bəyan edib.
Əvvəlcədən, Avropa İttifaqı, razılaşma parlamentdən keçməyəcəyi halda, Britaniyanın 12 apreldə ittifaqdan ayrılmasını, əks halda “Brexit”in mayın 22-ə kimi ertələnəcəyini açıqlamışdı.
Hazırkı vəziyyətdə, Britaniya ya, Aİ-dən “Brexit”in daha bir müddət ertələnməsini istəyərək may ayında Avropa Parlamentinə keçiriləcək seçkilərə qatılacaq, ya da Aİ-nin anlaşmasız tərk edəcək.
Bununla belə, Londonun Brüsseldən “Brexit”i 22 maydan sonrakı bir tarixə ertələnməsini tələb edəcəyi halda, Birlik üzvü 27 dövlətin bunu təsdiq etməsi lazım gələcək.
