Rusiya-Ukrayna müharibəsində son günlərdə yeni bir mərhələnin başlanması müşahidə olunur. Buna səbəb Ukraynaının əks-hücum əməliyyatlarının yeni və əsas mərhələsinə başlamasını bəyan etməsidir. Elə ABŞ-ın “The New York Times” qəzeti də Pentaqondakı mənbələrə istinadən Ukrayna ordusunun ölkənin cənubunda əks-hücum əməliyyatının əsas mərhələsinə başladığını yazır.
Məlumatlarda həm də ABŞ və digər ölkələrdə təlim keçən və Qərb texnikası ilə təchiz olunan bölmələrin əksəriyyətinin artıq döyüşlərdə iştirak etdiyi vurğulanır. İddialara görə, 150-yə qədər müasir tank və yüzlərlə piyadaların döyüş maşını ilə təmin edilmiş belə hərbçilərin sayı 63 minə yaxındır. Nəşrin yazdığına görə, Ukrayna Silahlı Qüvvələrinin hazırkı mərhələdə əsas məqsədi işğal olunmuş Krıma quru dəhlizini kəsməkdir. Ölkənin cənubunda genişmiqyaslı əks-hücum əməliyyatının başlaması barədə “Bloomberg” və bir sıra digər Qərb KİV-ləri də məlumatlar yazırlar. “The Washington Post” qəzeti isə Ukrayna ordusunun Zaporojye vilayətinə yeni zərbələr endirdiyini və Orexovo kəndinin cənubuna doğru irəlilədiyini yazır. Hər iki nəşr anonim Amerika rəsmilərinə istinad edir. Hərbi ekspert, “Aydar” batalyonunun veteranı Yevgeni Dikiy bir qədər fərqli vəziyyətin olduğunu vurğulayır. O, jurnalistlərin məsələni görmək istədikləri kimi yazdıqlarını bildirir. Yevgeni Dikiy deyir ki, Ukrayna ordusu eşelonlaşdırılmış müdafiənin üç xəttinin birincisini deyil, kifayət qədər geniş cəbhə boyunca ikinci xəttə keçməyə və eyni zamanda ehtiyatları məhv etməyə çalışır. Onun sözlərinə görə, Rusiyanın da öz strategiyası var. Onların vəzifəsi maksimum sayda Ukrayna əsgərini və Ukrayna texnikasını məhv etməklə, irəliləyən Ukrayna tərəfini mümkün qədər tükəndirmək, hətta birinci müdafiə xəttindən uzaqlaşdırmaqdır: “Hər iki tərəf bütün günü böyük əsəb gərginliyi, çox böyük sursat ehtiyatı tələb edən dəhşətli işlərlə məşğuldur. Artıq ay yarımdır ki, belədir. Əslində, dəyişikliklər var, lakin çox ləng gedir. Amma bu kilometrlərlə deyil, həmin gün hər tərəfin nə qədər insan və texnika itirdiyi ilə ifadə olunur. Və bu nisbət tədricən tərəzinin hansı istiqamətə əyiləcəyini müəyyənləşdirir. Mən başa düşürəm ki, bunu hər dəfə təsvir etmək çox darıxdırıcıdır, buna görə də çox əhəmiyyətli olacaq bir şey tapmağa çalışırlar”. Üstünlüyün az da olsa kimin tərəfində olmasına gəlincə, “Aydar” veteranı bu barədə danışmağın hələ tez olduğunu bildirir: “Qol güləşindəki kimi, iki əlin çox uzun müddət sadəcə hərəkətsiz göründüyü vəziyyətlər yaranır. Amma əslində, hər iki tərəf var gücü ilə bir-birini pressinq edir. Yəni biz hələ də bu mərhələdəyik, sonra kiminsə əli düşəcək. Yəni bu halda bu o demək olacaq ki, ya biz xətti hardasa keçəcəyik, sonra o dağılacaq, ya da hücum dayanacaq”. Hərbi ekspertə görə, misal üçün, Rabotino bölgəsində indiyə qədər nisbət 50:50, bəzən Ukrayna tərəfinin xeyrinə 55:45 nisbətindədir: “Sadəcə yeni mərhələ haqqında yazmağa səbəb olan döyüşlər, əslində, ikinci müdafiə xəttinə çıxışdır. Rabotino bölgəsində birinci müdafiə xəttini tamamilə aşmaq və tam olaraq ikinciyə çatmaq mümkün olub. İndi döyüşlər ikinci müdafiə xəttində gedir”. Yevgeni Dikiy deyir ki, ilk dəfə müdafiə xəttinə yaxınlaşanda əvvəlcə zirehli texnikanın itkiləri ilə çox qızğın, amma uğurlu döyüşlər olub: “İndi biz yenə belə parlaq, olduqca möhtəşəm döyüşlərlə başlayan ikinci xəttə çıxış görürük. Amma bir neçə gündən sonra orada da vəziyyət eyni şəkildə sakitləşəcək, lakin bu heç də nəyinsə dayanacağı anlamına gəlmir, əksinə, davam edəcək. Bu, arxa cəbhədə çox vaxt gözə dəyməyən bir şeydir”.
Hərbi eksprertin sözlərinə görə, hazırda “Surovıkin xətti” adlanan ikinci müdafiə xətti mərhələsi başlayıb. Amma Yevgeni Dikiy bu arada tərəflərin hərbi sayı ilə bağlı müqayisəyə də diqqət çəkilməli olduğunu deyir. Onun sözlərinə görə, Qərb mətbuatının yazdığı kimi, Qərb təlimatçıları tərəfindən hazırlanan 63 min Ukrayna döyüşçüsü, hazırlığı olmasa belə, hərbi komissarlıqdan birbaşa döyüş zonasına göndərilən, 300 mini birbaşa ön xətdə, 100 mini arxa xətdə olan 400 minlik Rusiya ordusu... Bu şəraitdə hadisələrin inkişafı daha qanlı xaraker almaqdadır. Ukrayna Silahlı Qüvvələri Şərq qruplaşması qoşununun sözçüsü Sergey Çerevatı bildirir ki, indi Rusiyanın itkiləri Əfqanıstan müharibəsi zamanı sovet ordusunun itkilərindən daha çoxdur. O qeyd edib ki, düşmən bütün qüvvələrini Donetsk vilayətinin Baxmut şəhərinə cəlb edib: “Rusiya buradakı mövqelərini qorumağa çalışır. Çünki Baxmut Rusiya üçün hərbi əhəmiyyətlidir”. S.Çerevatının sözlərinə görə, Ukrayna torpaqları metr-metr azad edir. Ukrayna prezidenti Vladimir Zelenski isə qeyd edir ki, rus hərbçilər bu qışda da Ukraynanın enerji infrastrukturuna zərbələr endirməyə davam edə bilər: "Rusiyanın təcavüzü döyüş meydanında iflasa uğradı. Bu gün Rusiya rəhbərliyinin bir-iki həftə davam edəcəyini gözlədiyi "xüsusi hərbi əməliyyat"ın başlanmasından il yarım ötür. Ukrayna güclənir. Tədricən müharibə Rusiya ərazisinə, onun simvolik mərkəzlərinə və hərbi bazalarına geri qayıdır. Bu, qaçılmaz təbii və tamamilə ədalətli prosesdir. Lakin biz şüurlu olmalıyıq, çünki keçən il olduğu kimi, bu qış da rusiyalı terrorçular bizim enerji sektorumuzu vura, kritik obyektlərə zərbə endirə bilərlər”.
Tahir TAĞIYEV
