Rusiya XİN başçısı Lavrov Afrikanın Niger dövlətində 26 iyul tarixli dövlət çevrilişinə maraqlı reaksiya verib. Lavrov da eynilə ABŞ, Fransa, İngiltərə və BMT kimi hadisəni dövlət çevrilişi adlandırıb, ölkədə tezliklə konstitusiya quruluşunu bərpa etməyə çağırıb.
Bunu “Bakı-Xəbər” Media Qrupunun rəhbəri, politoloq Aydın Quliyev öz Facebook səhifəsində yazıb.
A.Quliyev daha sonra yazır:
Nigerdə həqiqətən dövlət çevrilişi baş verib. Prezident qvardiyasının lideri general Titsi çevriliş edərək Prezident Bazumu və DİN başçısını həbs edib. Xatırladım ki, devrilmiş prezident Fransa yönümlü hakimiyyət olaraq tanınırdı. Çevrilişdən sonra Fransanın 1500-dən çox əsgərini ölkənin paytaxtındakı mənzillərdən bayıra töküblər. Baş verən çevriliş ilk gündən Rusiya kəşfiyyatının əl izi kimi nəzərdən keçirilir...
İndi də gəlirəm Lavrovun hadisələrə verdiyi reaksiyanın ən maraqlı və düşündürücü hissəsinə... Lavrov deyir ki, 2014-cü ilin fevralında da Ukraynada dövlət çevrilişi baş vermişdi, Qərb onu dəstəklədi və "demokratik inkişaf yollarında bəzən belə də olur" dedi. İzah verim ki, Lavrov 2014-cü ilin fevralında Ukraynada Rusiya yönümlü Yanukoviçin hakimiyyətdən getməsini və Qərb yönümlü Poroşenkonun hakimiyyətə gəlişini şərtləndirmiş məşhur "Maydan"ı nəzərdə tutur..
Bu o deməkdir ki, "Siz Ukraynada çevriliş etdiniz, biz də sizə Nigerdə eyni üsulla cavab verdik"... Ancaq Lavrov deməyi unudub ki, Ukraynadan fərqli olaraq Nigerdə çevriliş yox, hərbi çevriliş baş verib. Bunlar fərqli şeylərdir.
Nigerdə hərbi çevrilişi Rusiya edib. Yeni hakimiyyətin nə qədər duruş gətirəcəyini zaman göstərəcək...
Tahir TAĞIYEV
