“Vaqner” hərbi qruplaşması artıq Rusiyanın siyasi gündəmi üçün ən aktual və tapmaca mövzuya çevrilib. Rusiya hərbi rəhbərliyi ilə açıq düşmənçilikdən sonra “qiyamçı” obrazına girib bir neçə saatın içində burax Rusiyanı, bütün dünyanı şoka salan bu hərbi şirkət, bir neçə saatlıq “barıtdan” sonra Aleksandr Lukaşenko ilə hələ də təfsilatı gizli qalan danışıqlar aparıb yollandılar Belarus torpaqlarına. Həmin Belarus torpaqlarına ki, “Vaqnerçilər” ki, neçə il bundan əvvəl A.Lukaşenko ilə Vladimir Putin arasında gərginlik olanda oraya yollanıb “batka”nı devirmək istəyirdilər. Hər halda rəsmi və qeyri rəsmi məlumatlarda belə deyilir. Həyatın istehzasına bir bax: İndi A.Lukaşenko olub "Vaqner"in əsas "ağsaqqalı", “Vaqnerçilər”lə bağlı ən etibarlı məlumatları onun ağzından dinləyirlər. Hər sözü, hər kəlməsi yüz dəfə çək-çevir edilir. A.Lukaşenko Vladimir Putinlə son görüşündə də əməllicə səs-küy yaradan fikirlər səsləndirib.
Belarus Prezidenti Kreml sahibi ilə son görüşündə bəyan edib ki, "Vaqner” üzvləri Varşavaya getmək istədiklərini ona çatdırıblar: "Bəlkə deməməli idim, amma deyəcəm. "Vaqnerçilər" bizi gərginləşdirməyə başladılar. Mənə “biz Qərbə getmək istəyirik. İcazə verin" Dedilər. Deyirəm, niyə Qərbə gedirsən? sonra da “yaxşı, Varşavaya, Zheshuvaya ekskursiyaya gedin" dedim.” Bu nə anlama gəlir?. V.Putinə qarşı şübhəli “qiyam” qaldırasan, A.Lukaşenko səni Minskdə əzizləyib, yedizdirib-içizdirsin. Sonra da ürəyin darıxsın, denən Varşavaya getmək istəyirik. Nədir, Polşa ikinci Ukrayna cəbhəsi deyil ki, ağlın hər əsdiyində əlinə silah alıb V.Putin kimi NATO-nu da təhdid edəsən, tələblər qoyasan. Guya “Vaqnerçilər” bilmirlərmi ki, onları Polşada, bu NATO ölkəsində nələr gözləyir?. Bəyəm NATO çətiri altında olan Polşa Ukraynada olduğu kimi xaos və özbaşınalıq içindədirmi ki, istədiyin vaxt əlinə silah alıb Varşavaya cumasan, kimlərisə hədələyəsən, öldürəsən, pul qazanasan? Həm də kim belə canlı bombanı öz qoynuna alar ki?-HEÇ KİM!
Məgər üzü Afrikadan başlamış indi müharibə odunda alışıb yanan Ukraynaya qədər bir çox yerdə pul müqabilində günahsız insanların başını kəsən, körpə, qoca bilmədən insanları qanına qəltan edən, ən əsas da V.Putinin qanlı əmrlərini icra edən bu caniləri Qərbdə böyük intizarlamı gözləyirlər?. Guya qərbdəkilər bilmirlərmi şübhəli “üsyançılar” hara getsələr əli qanlı bomba kimi hamı üçün təhlükəlidirlər?. (onları həm də bütün dünyada V.Putinin tapşırıqlarını icra edən pullu muzdlu qatillər kimi tanıyırlar) Polşa bunlara niyə siyasi sığınacaq versin ki? Bəyəm Varşavadakılar özləri özlərinin düşmənidir ki? - qətiyyən!.
Deməli A.Lukaşenkonun açıqlamalarında ciddi məsələlər var. Məlum məsələdir ki, ağlı başında olan heç bir Qərb dairəsi “Vaqnerçilər”dən Moskvaya qarşı istifadə etməyi ağlına belə gətirmir. Çünki deşifrə olmuş, hələ də Kremlə, birbaşa V.Putinə bağlı olduqları heç kimdə şübhə doğurmayan bu qanlı killerlərdən Rusiyaya qarşı istifadə etmək mümkünsüzdür. Heç kəs dünənə qədər Moskvanın qanlı muzdluları kimi rol alan bu canilərə bir anlıq da olsa güvənməz. Deməli A.Lukaşenko gizli bir anonsla kimlərisə bu əliqanlı qruplaşma ilə hədələyir. Bəs A.Lukaşenko kimi təhdid edir?- Rusiya cəmiyyətinin özünümü, yoxsa V.Putinə qarşı Ukraynada milyardlıq silahları ilə qanlı müharibə aparan Qərbimi? – aydın deyil. Amma aydın olan odur ki, bu təhlükəli “Vaqner oyunu” mütləq gec, ya tez kimlərinsə əlində “partlayacaq.” Mətləb Salahov
