Hüseyn Axundov: “Zərərçəkmiş şəxslər belə əməlləri törədən şəxslərə qarşı mülki qaydada iddia qaldırmaq hüququna malikdir”
Hazırda ölkədəki əksər iri şadlıq sarayları və yeməkxanaları təhlükə mənbəyinə çevrilib. Bu məkanlarda hazırlanan qidaların tamına baxanlar vəziyyətdən şikayətçidirlər. Söz yox ki, etirazların çoxu ət məhsulu ilə bişirilmiş yeməklərlə əlaqəlidir.
Artıq vəziyyət o həddə çatıb ki, toy və nişan mərasimlərinə dəvət almış qonaqlar ətdən hazırlanan qidalardan dadmırlar. Həmin xörəklərin ciddi xəstəliklər və fəsadlara yol aça biləcəyindən ehtiyatlanırlar. Çərəz və salatlarla özlərini doydurmağa çalışırlar. Ətin keyfiyyətsizliyi elə görüntüsündən özünü aydınca büruzə verir. Bu günlərdə Azərbaycan Qida Təhlükəsizliyi Agentliyinin əməkdaşları Bakı şəhəri, Xətai rayonu, R.Bağırov küçəsi, ev 58 ünvanında fiziki şəxs Firdovsi Mülkü oğlu Quliyevə məxsus “Ramin Nur” şadlıq sarayında yoxlama aparıblar. Agentliyin məlumatına görə, yoxlama zamanı istehlakçı hüquqlarının, sanitariya norma və qaydalarının tələblərinin pozulduğu məlum olub. Belə ki, camış ətinin istehlaka dana əti adı ilə təqdim edildiyi məlum olub. Buna baxmayaraq, camış əti müvafiq baytarlıq sənədi və idxal sağlamlıq aktı ilə müşayiət edilib.
Qeyd edək ki, bu kimi hallar əksər şadlıq evləri, iaşə obyektlərində müşahidə edilib. Maraqlıdır, bu kimi fəaliyyətlə məşğul olanların cəzası nədir?
“Qanunun tələblərinə zidd hər hansı bir qida məhsulu satılırsa, bu, həmin şəxsə qarşı inzibati və cinayət məsuliyyəti yaradır”
Hüquqşunas Hüseyn Axundov “Bakı-Xəbər”ə şərhində bildirdi ki, iaşə obyektlərində bu kimi halların baş verməsi istehlakçı hüquqlarının pozulması deməkdir: “Bəzi iaşə obyektlərində yararsız və ya camış ətindən istifadə edilir. Bu hal dəfələrlə müşahidə olunub.
Məhsulun yararsız olması ekspertiza ilə müəyyən olunmayıbsa, bu zaman market sahibi məsuliyyət daşımır. Obyekt və şadlıq evi sahibinin vəzifəsi malların yararlılıq müddətinə nəzarət etməkdir. Əgər məhsulun yararlılıq müddəti keçməyib lakin məhsul yararsızdırsa, artıq birbaşa məsuliyyət istehsalçının üzərindədir. Məhsulun hansısa səbəbdən yararsız olması və qanunla icazə verilməyən məhsul üçün rəhbərlik birbaşa məsuliyyət daşıyır. Qanunvericiliyin tələbinə uyğun olaraq ictamai iaşə obyektlərdə yararsız ət və ya camış əti verənlər müəyyən məbləğdə cərimələnir. Qanunun tələblərinə zidd hər hansı bir qida məhsulu satılırsa, bu, həmin şəxsə qarşı inzibati və cinayət məsuliyyəti yaradır. Əgər istehlakçının sağlamlığına zərər vurularsa, bununla bağlı istehlakçının mülki iddia qaldırmaq hüququ da var. Zərərçəkmiş şəxslər belə əməlləri törədən şəxslərə qarşı mülki qaydada iddia qaldırmaq hüququna malikdir. Çünki onlara maddi və mənəvi ziyan dəyir”.
Günel CƏLİLOVA
