Kamran Əsədov: “Həmin məktəblər insanların kəndə bağlılığını təmin edən əsas vasitələrdən biridir”
“Məktəblərdə ixtisarlar prosesi davam edəcək. Bizim yanaşmamızla bu ixtisar deyil, səmərəlilik yanaşmasıdır”. Bunu Milli Məclisdə keçirilən Aqrar siyasət, Ailə, qadın və uşaq məsələləri, Elm və təhsil komitələrinin birgə iclasında millət vəkillərinin suallarını və təkliflərini cavablandırarkən elm və təhsil naziri Emin Əmrullayev deyib.
O qeyd edib ki, 5 və ya 10 şagirdi olan məktəbdə həqiqətən keyfiyyətli təhsil vermək mümkün deyil: “Bir sinifdə yox, bütün məktəbdə 10 şagird və hər sinifdə 2 uşaq varsa, biz bu uşaqlara musiqi dərsində xorla birgə oxumağı və ya kollektiv oyunu necə öyrədəcəyik? Bu uşaq məktəbi bitirəndə neçə sinif yoldaşı, neçə dostu olacaq? Ümumiyyətlə, 10 nəfərlik məktəb onun gələcək həyatına necə təsir edəcək? Başa düşürəm ki, orada 10 nəfər təhsil alanda bəlkə 20 nəfərin işi yerində olur, amma bizim işimiz təhsildir və biz çalışırıq ki, keyfiyyət baxımından təhsili yüksəldək”.
Maraqlıdır, şagird sayı az olan məktəblərin bağlanması çıxış yoludurmu?
“Şagird sayı az olan məktəblərin bağlanması əvəzinə, onların maddi-texniki bazası gücləndirilməli, savadlı müəllimlər yüksək maaşla həmin məktəblərə cəlb edilməlidir”
Təhsil eksperti Kamran Əsədov “Bakı-Xəbər”ə şərhində bildirdi ki, şagird sayı az olan məktəblərin bağlanması düzgün deyil: “Alternativ yollar araşdırılmalıdır. Hər bir kənd məktəbi bir növ mədəniyyət mərkəzi rolunu oynayır. Həmin məktəblər insanların kəndə bağlılığını təmin edən əsas vasitələrdən biridir. Hazırda şagird sayı az olan məktəblər əsasən Quba, Qusar, Lerik kimi rayonlarda yerləşir. Bəzi kəndlərdə cəmi 5-6 ev qalıb. Əgər bu məktəblər bağlansa, həmin kəndlər tam boşalacaq. Təhsil sahəsinə kifayət qədər vəsait ayrılsa da, dağlıq və dağətəyi ərazilərdə məktəblərin bağlanması düzgün addım deyil. Biz yalnız imtahan üçün deyil, vətəndaş yetişdirmək üçün çalışmalıyıq. Nazirlik düşünür ki, 10 şagirdi olan məktəblə 200 şagirdi olan məktəbə eyni məbləğdə vəsait ayrılır. Amma dövlətin öhdəliyi var və təhsilə ayrılan maliyyə vəsaitinin çoxluğundan çəkinmək olmaz. Necə ki, futbol üçün vəsait ayrılır, amma nəticə yoxdur. Əsas məqsəd savadlı, cəmiyyətə faydalı şəxsiyyətlər yetişdirmək olmalıdır. Şagird sayı az olan məktəblərin bağlanması əvəzinə onların maddi-texniki bazası gücləndirilməli, savadlı müəllimlər yüksək maaşla həmin məktəblərə cəlb edilməlidir. Bu, həm tədrisin keyfiyyətini artırar, həm də bölgələrin boşalmasının qarşısını alar”.
Günel CƏLİLOVA
