Əmrah Həsənli: "Mövcud bağçalarda qrup sayı və pedaqoji heyətin çatışmazlığı yerlərin məhdud olmasına gətirib çıxarır"
Artıq iki aydır ki, yeni tədris ili başlayıb. Yeni tədris ilinin başlanması ilə bir çox valideynlər üçün uşaq bağçası problemi aktuallaşır. Böyük uşağını məktəbə qoyan ailələr yaşca kiçikləri bağçaya yerləşdirmək üçün cəhdlər edərkən ciddi problemlə üzləşirlər. Çünki dövlət bağçalarına, xüsusən də nisbətən təmirli, normal şərtləri olan bağçalara uşaq yazdırmaq ciddi problemə çevrilib.
Bəzən evinin yaxınlığında yerləşən uşaq bağçasına müraciət edəndə yer olmaması ilə qarşılaşırlar. Ümumiyyətlə, son günlər uşaq bağçalarında yerlərin çatışmaması ilə bağlı valideynlərin narazılıqları artıb. Xüsusilə paytaxt və böyük şəhərlərdə valideynlər övladlarını bağçaya yerləşdirməkdə ciddi çətinlik çəkirlər. Məktəbəqədər və Ümumi Təhsil üzrə Dövlət Agentliyinin məlumatına görə, hazırda ölkə ərazisində 1 669 dövlət, 177 özəl məktəbəqədər təhsil müəssisəsi fəaliyyət göstərir. Dövlət bağçalarının tutumu təxminən 119 min nəfərlikdir. Məktəbəqədər təhsil müəssisələrinin Elm və Təhsil Nazirliyinin tabeliyinə verildiyi tarixdən indiyədək 18 yeni bağça istifadəyə verilib. Mövcud müəssisələrin 334-ü Bakıda fəaliyyət göstərir, digərləri regionların payına düşür.
Qeyd edək ki, bağçalarda yerlərin məhdud olması səbəbindən bir çox ailə növbə gözləməli olur və ya özəl müəssisələrə yönəlməyə məcbur qalır. Maraqlıdır, paytaxtda bağçaların sayı niyə artırılmır? Bağçalarda yer çatışmazlığı həlli yolunu necə tapacaq?
"Bu problem yalnız dövlətin üzərinə qoyulmamalı, həm özəl sektor, həm də yerli icra strukturları məsuliyyət daşımalıdır"
Təhsil eksperti Əmrah Həsənli "Bakı-Xəbər"ə şərhində bildirdi ki, bağçalarda yer çatışmazlığı probleminin bir neçə səbəbi var: “İlk olaraq qeyd etmək lazımdır ki, demoqrafik artım, xüsusilə də paytaxt və iri şəhərlərdə əhalinin sıxlaşması mövcud infrastrukturun tələbatı qarşılaya bilməməsinə səbəb olur. Digər tərəfdən, bir çox hallarda yeni yaşayış massivləri sürətlə tikilsə də, paralel olaraq məktəbəqədər təhsil müəssisələrinin inşası həmin sürəti tutmur. Nəticədə yeni yaranmış məhəllələrdə ailələr bağça problemi ilə üz-üzə qalır. Mövcud bağçalarda isə qrup sayı və pedaqoji heyətin çatışmazlığı yerlərin məhdud olmasına gətirib çıxarır".
Ekspertin dediyinə görə, hər il minlərlə uşaq bağçaya qəbul ola bilmir və bu, təbii olaraq valideynlərdə narazılıq yaradır. Belə olan halda uşaqlar erkən sosiallaşma və təhsil imkanlarından məhrum qalır, digər tərəfdən valideynlər, xüsusilə işləyən analar üçün ciddi sosial çətinliklər yaranır: "Bu məsələnin qarşısını almaq üçün müəyyən işlər görülməlidir. İlk növbədə, dövlət investisiyalarının yönəldildiyi layihələrdə hər yeni yaşayış kompleksinə paralel bağça və ibtidai məktəb tikintisinin məcburi şərt kimi tətbiq olunması vacibdir. Bununla yanaşı, özəl sektorun prosesə daha çox cəlb olunması zəruridir. Xarici təcrübəyə nəzər salsaq görərik ki, bağçaların bir hissəsi özəl müəssisələrin, bələdiyyələrin və hətta işəgötürənlərin üzərinə götürülür. Bu problem yalnız dövlətin üzərinə qoyulmamalı, həm özəl sektor, həm də yerli icra strukturları məsuliyyət daşımalıdır. Azərbaycanda da belə bir model tətbiq olunarsa, həm valideyn narazılığı azalacaq, həm də məktəbəqədər təhsilin keyfiyyəti yüksələcək”.
Günel CƏLİLOVA
