Adil Qeybulla: "Şəkərli diabet və onkoloji xəstəliklər də icbari sığortaya şamil edilsə daha yaxşı olar"
Artıq bir neçə ildir ki, ölkədə tibbi xidmətlər hər kəs üçün əlçatandır. 7 il əvvəl bir neçə rayonda pilot layihə kimi tətbiqinə başlanılan İcbari Tibbi Sığorta 2021-ci ildən bütün ölkə ərazisini əhatə edir. Ölkə vətəndaşları İcbari Tibbi Sığorta ilə Xidmətlər Zərfinə daxil olan tibbi xidmətlərdən ödənişsiz istifadə edə bilirlər. Bu xidmətin daha da əlçatan olması üçün İcbari Tibbi Sığorta Fondunun büdcəsi artır. Məlumat üçün bildirək ki, Fondun gəlir və xərcləri bərabər olaraq 38,9 milyon manat (1,4 %) artırılır. Beləliklə, Fondun büdcəsi 2 milyard 850,3 milyon manat təşkil edəcək.
Maraqlıdır, artırılan vəsait kifayətdirmi? Məlumdur ki, İcbari Tibbi Sığorta zərfinə salınmayan xəstəliklər var. Büdcənin artması siyahıya salınmayan xəstəliklər üçün ümid işığı ola bilərmi? Ümumiyyətlə, icbari sığorta hansı sahələrə ayrılsa daha yaxşı olar?
"İcbari Tibbi Sığortanın büdcəsi nə qədər artsa da, yenə də çatışmazlıqlar olur, istənilən halda icbari tibbi sığorta büdcəsinin artması alqışlanmalıdır"
Professor, tibbi ekspert Adil Qeybulla baki-xeber.com-a açıqlamasında bildirdi ki, dünyanın əksər inkişaf etmiş ölkəsində, Amerika, Almaniya, Yaponiya və İngiltərədə İcbari Tibbi Sığortaya çox böyük vəsait ayrılır. Ancaq yenə də vəsait tam yetərli olmur: "Səhiyyə xərc aparan sahədir. İcbari Tibbi Sığortanın büdcəsi nə qədər artsa da yenə də çatışmazlıqlar olur. İstənilən halda, İcbari Tibbi Sığorta büdcəsinin artması alqışlanmalıdır".
Tibbi ekspert ümid edir ki, zamanla şəkərli diabet və onkoloji xəstəliklər də icbari sığortaya şamil ediləcək: "Bütün xidmətlərin birdən-birə paketə daxil olması imkan xaricindədir. Tibb xidmətlərinə, xidmət zərfinə diaqnostika, müalicə prosedurlarının daxil edilməsi büdcədən asılıdır. İcbari Tibbi Sığorta büdcəsinin həcminə görə bu müəyyən edilməlidir. Nəzərə almaq lazımdır ki, burada həkimlərin, tibb işçilərinin gəlirləri nəzərə alınmalıdır. Bu, sadəcə olaraq, həkimlərin fədakarlığı hesabına həyata keçirilə bilməz. Burada maraqlar təmin edilməlidir. Dünyanın hər yerində hansı nisbət - həkimin, ümumiyyətlə, bütün tibb personalının maaşı, müalicə profilaktika müəssisələrində amortizasiya xərcləri, digər texniki xərclər və yanaşı olaraq da sərfiyyat materialları, onların nisbəti nəzərə alınmaqla hesablanmalıdır. Əvvəlcədən bunun iqtisadi tərəfləri həll edilməli, həmin iqtisadi imkanlar çərçivəsində daha vacib xidmət zərfləri önə çəkilməlidir. Proses yavaş-yavaş öz həllini tapmalıdır".
Günel CƏLİLOVA
