Narkomaniya yaşı gəncləşir – Masallıda tədbir keçirildi
Təhlükəli və sosial əhəmiyyətli sağalmaz xəstəlik olan narkomaniya get-gedə öz əhatə dairəsini genişləndirir. Ən çox gənclərin meyl etdiyi bu bəşəri faciə öz ağır fəsadlarını yaratmaqla, sanki dünyaya meydan oxuyur. O heç bir sərhəd tanımır, insan cəmiyyətin mənəvi və əxlaqi dəyərlərinə böyük zərbə vurur, sosial-iqtisadi inkişafa mənfi təsir göstərir.
Daha bir dəhşətli fakt odur ki, artıq respublikamızda narkotik maddə qəbul edənlər arasında 12-13 yaşlı uşaqlara da rast gəlinir. Həyatımızı məhv edən ən rəzil pislik bizimlə gələcəyə gedir. Belə bir vəziyyətdə "ağ ölüm" kimi tarixə düşən narkomaniyaya aman olmamalıdır. Dövlət orqanları ilə yanaşı, ictimai təşkilatlar, həmçinin bu dövlətdə yaşayan hər bir fərd bu bəlaya qarşı barışmaz mövqe tutmalıdır. Ən əsası da təhsil ocaqlarında yeniyetmə və gənclərə narkomaniyanın insan həyatına vurduğu ağılasığmaz yaralardan ətraflı məlumat verməli, onları "ağ ölümün" pəncəsindən vaxtında uzaqlaşdırmaq lazımdır.
Astara rayon Heydər Əliyev Mərkəzində "Narkomaniya bəşəriyyətin faciəsidir" mövzusunda keçirilən tədbir də məhz bu məqsəddən irəli gəlirdi.
Tədbirdə rayonda fəaliyyət göstərən M.Ə.Sabir adına şəhər 1 saylı, C.Cabbarlı adına Kakalos kənd tam orta məktəblərinin müəllim və şagirdləri iştirak edirdilər. Əvvəlcə Vətən naminə, xoşbəxt gələcəyimiz üçün özlərini qurban verən şəhidlərin əziz xatirəsi bir dəqiqəlik sükutla yad edildi, Dövlət Himni oxundu.
Çıxışlarda narkotiklərin yaratdığı problemlərin cəmiyyətin maddi-texniki və intellektual potensialının aşağı düşməsinə, genefondun son dərəcə pisləşməsinə və bir çox mənfi hallara gətirilməsindən əhatəli şəkildə danışıldı. Bildirildi ki, indiki bu çətin zamanda narkomaniya ilə mübarizə yeni istiqamətlərin və metodların tətbiqini zəruri edir. Zərərli vərdişlərə meyllənməsinin qarşısının alınmasında maarifləndirmənin, təbliğat kampaniyalarının gücləndirilməsi ən aktual məsələ olmalıdır. Burada da əsas iş mədəniyyət müəssisələrin, təhsil ocaqlarının, yaradıcı insanların, eləcə medianın üzərinə düşür. Bir də uşaqların, gənclərin asudə vaxtını və əyləncə sistemini maraqlı qurmaqla narkomanlığın yayılmasını səngitmək olar.
Çıxışlar bitdikdən sonra "Narkomaniyaya "yox" deyək" mövzusunda maarifləndirici video-çarxın nümayişi tədbirin yüksək səviyyədə alınmasında yerinə düşdü. Şagirdləri mövzu ilə bağlı düşündürən suallarda dolğun cavablandırıldı.
Yekunda tədbir iştirakçıların Heydər Əliyev Mərkəzinin "Rəssamlıq" dərnəyi üzvlərinin əl işlərindən və elektron kitabxanasında saxlanılan kitablardan təşkil olunmuş sərgiyə baxış keçirildi.
Zəfər ORUCOĞLU
Azərbaycan Jurnalistlər Birliyinin üzvü
