Bakının Bayıl qəsəbəsində jurnalistlər üçün inşa olunmuş binaların idarəetməsi ilə bağlı problem yaranıb. Binanın idarəetməsi ilə məşğul olan "Jurnalist Evi" MMC iyunun 1-dən etibarən fəaliyyətinə son qoymağı planlaşdırır. Səbəb kimi yığımın olmaması və kütləvi borcun yaranması göstərilir.
Binanın komendantı Orxan Mehdiyev media nümayəndələrinə açıqlamasında deyib ki, bina sakinləri müntəzəm olaraq göstərilən xidmətlərlə bağlı tələb olunan borcları ödəmir. Belə olan təqdirdə lift, xadimə və mühafizə xidməti dayandırılacaq.
Qeyd edək ki, məlum problem iki gündür sosial şəbəkədə geniş müzakirə olunur. Məlum olur ki, sakinlərin böyük əksəriyyəti kommunal xərcləri ödəmir. Bina sakini olan jurnalistlərin bir qismi hesab edir ki, evi onlara dövlət verib, buna görə də xidmət haqqı ödəməməlidirlər. Kommunal ödəniş ödənilməyəndə binada olan xidmət səviyyəsi də zəifləyir.
Şakir Ağayev: "Bəzi jurnalistlər elə bilir ki, mənzil hədiyyə olunubsa, onlar bütün kommunal xərclərdən azaddır, xeyr, bu belə deyil"
"Novoye vremya" qəzetinin baş redaktoru Şakir Ağayev "Bakı-Xəbər"ə açıqlamasında bildirdi ki, cəmiyyətə qanunları öyrədən, haqq-ədalət tələb edən jurnalistlərin MEDİA Agentliyi ilə belə bir problemi yaranıb: "Borc yaranıb, ödənilməlidir. Burda MEDİA neyləsin? Bu binanı Prezident İlham Əliyev jurnalistlərə verib, evlər də özəlləşdirilib. Evlər o binada yaşayan sakinlərin mülküdür. Binanın kommunal xərcləri sakinlər tərəfindən ödənilməlidir. Bəzi jurnalistlər elə bilir ki, mənzil hədiyyə olunubsa, onlar bütün kommunal xərclərdən azaddır. Xeyr, binanın kommunal xərcləri üçün nəzərdə tutulan vəsait ödənilməlidir. Ilk növbədə öz rahatlıqları üçün bu ödənişi etməlidirlər. Ödəniş edən sakin ödəniş etməyənə görə niyə piyada yuxarı mərtəbəyə qalxmalıdır, hansı səbəbdən əziyyət çəkməlidir? Ödəniş etməyənlərin hesabına ödəyənlərin hüquqları tapdalanır".
Ramil Qasımzadə: "İstənilən halda mənzil sahibi ödənişləri etməlidir, əks halda kommunal imkanlardan məhrum olması gözləniləndir"
Əmlak eksperti Ramil Qasımzadə hesab edir ki, çoxmənzilli binaların idarə edilməsi üzrə üç forma mövcuddur. Bu formadan biri də Mənzil Mülkiyyətçilərinin Müştərək Cəmiyyətinin (MMMC) yaradılması və sakinlər tərəfindən sədrin seçilməsidir: "Həmin sədr binanın kommunal ödənişlərini və idarəetmə xərclərini müəyyən edərək payçılar arasında bərabər şəkildə bölür. Bölgü zamanı hər mənzilə düşən paya uyğun müəyyən miqdarda vəsait təyin olunur və sakin həmin aylıq ödənişləri ödəyir. Əgər hansısa sakin ödənişi etməkdən yayınırsa, cəmiyyətin üzvləri ona qarşı müəyyən tədbirlər görə bilirlər. Məsələn, bəzi Mənzil-Tikinti Kooperativlərində (MTK) sakinin kartı bloklanır və ya ödəniş etmədiyi kommunal xidmət dayandırılır. "Jurnalistlər Evi" ilə bağlı yaranan problemin həlli üçün sakinlər tərəfindən Mənzil Mülkiyyətçilərinin Müştərək Cəmiyyəti (MMMC) yaradılmalı və ortaq qərar verilməlidi. İstənilən halda mənzil sahibi ödənişləri etməlidir. Əks halda kommunal imkanlardan məhrum olması gözləniləndir".
Elnur Məmmədli: "Bina sakinlərinin 70 faizi kommunalı ödənişi ödəməkdən imtina edib, səbəb nə olursa-olsun, bu düzgün deyil"
"Jurnalistlər Binası"nın sakini, tanınmış jurnalist Elnur Məmmədli "Bakı-Xəbər"ə açıqlamasında bildirdi ki, bina sakinlərinin 70 faizi kommunal ödənişi ödəməkdən imtina edib. Səbəb nə olursa-olsun, bu düzgün deyil: "Nəzərə almaq lazımdır ki, binanın həyəti, bloklar təmizlənir, xidmət göstərilir. Bununla yanaşı, jurnalistlər binasının həyəti işıqlandırılır, zibil vaxtında daşınır. Göstərilən xidmətin qarşılığı verilməlidir. Heç kimin borcu yoxdur ki, gəlib pulsuz haranısa süpürüb təmizləsin. Bu səbəbdən də ödənişdən imtina edənlərin mövqeyini qəbul etmirəm".
E.Məmmədli təklif edir ki, kommunal ödənişdən imtina edənlərin liftdən istifadəsi məhdudlaşdırılsın. Lift kodla olarsa, bu şəxslər bu kimi xidmətlərdən yararlana bilməyəcək.
Günel CƏLİLOVA
