Pərvanə Mustafayeva: "Abort birmənalı olaraq qız uşaqlarına qarşı "soyqırım" deməkdir"
Azərbaycanda abort sayı ildən-ilə artır. Açıqlanan son hesabata görə, Azərbaycanda 2023-cü ildə 73816 abort qeydə alınıb. Yaş kateqoroyalarına görə, 5-17 yaş üzrə 68, 18-19 yaş üzrə 2528, 20-24 yaş üzrə 12315, 25-29 yaş üzrə 22140, 30-34 yaş üzrə 22306, 35-49 yaş üzrə 14376 abort faktı qeydə alınıb.
Həmçinin bildirilib ki, abortların ümumi sayında dərmanla aparılanların sayı 630, birinci hamiləliyin pozulması ilə nəticələnənlərin sayı isə 2203 olub.
Xatırladaq ki, 2022-ci ildə 58 min abort qeydə alınıb. Onlardan 14 min 900-ü mini abort, 500-ü dərman vasitələri ilə aparılan abortlar olub.
Azərbaycan qanunvericiliyinə görə selektiv abort qadağandır. Bununla belə, həkimlər buna həvəslə və qorxmadan gedirlər. Hazırda aparılan müşahidələr göstərir ki, qadın məsləhətxanaları və doğum evlərində rahat şəkildə abort həyata keçirilir.
"Çox təəssüflər olsun ki, abortların çoxu qeydiyyatsız, qanunsuz şəkildə müxtəlif kabinetlərdə həyata keçirilir"
Həkim ekspert Pərvanə Mustafayeva "Bakı-Xəbər"ə açıqlamasında bildirdi ki, abort ancaq zərurət olduğu halda mümkündür. Yəni uşaq ana bətnində ölərsə, ağır anamoniya, yaxud da talassemiyanın ağır formasına tutularsa, həmin uşağın dünyaya gətirilməsi qətiyyən düzgün deyil. Qalan situasiyalarda isə qeydiyyatı aparılmamış sağlam uşağın abort edilməsi kriminal haldır. Belə abortlar qanundan kənar hadisə olduğu üçün cinayət tərkibi daşımalıdır: "Zərurət olduğu halda da abortu ancaq əlində tibbi sənədi olan həkimlər, mama - ginekoloqlar həyata keçirməlidir. Çox təəssüflər olsun ki, abortların çoxu qeydiyyatsız, qanunsuz şəkildə müxtəlif kabinetlərdə həyata keçirilir".
Həmsöhbətimiz hesab edir ki, abort birmənalı olaraq, qız uşaqlarına qarşı "soyqırım" deməkdir. Onun sözlərinə görə, bir çox ölkələrdə olduğu kimi, Azərbaycanda da abort qanunla qadağan olunmalıdır: "Bizdə ailədə oğlan uşağının dünyaya gəlişini o qədər arzulayırlar ki, qız uşağı olanda məyusluq keçirirlər. Qadınlar hamiləlik vaxtı dölün qız olduğunu bildikdə stressə düşürlər. İnsanların düşüncəsi dəyişməlidir".
Həkim abortun nə səbəbdən artmasına gəlincə bildirdi ki, xanımlar hamiləlikdən qorunma yollarını ciddi qəbul etmir: "Bu haqda məlumat verəndə çoxları bu üsulların gələcəkdə xərçəng yarada biləcəyinə inanır. Qorunma yollarının təhlükəli olduğunu düşünürlər, amma abortu təhlükəli hesab etmirlər. Halbuki, internetdə abortun zərərləri, gələcək fəsadları ilə bağlı saysız-hesabsız məlumatlar var. Abort zamanı həyat üçün təhlükəli qanaxmalar, infeksion xəstəliklər ehtimalı yüksəkdir. Nəinki abort zamanı, hətta abortdan sonra da fəsadlar baş verə bilər. Çox təəssüf ki, statistikada yeniyetmələrin və gənc qadınların da sayı artır. Onlar gənc olduqlarına görə abortun təhlükəsini tam dərk edə bilmirlər. Buna görə də abortdansa, hamiləlikdən qorunmaq lazımdır"
Günel CƏLİLOVA
