Son vaxtlar bəzi market və supermarketlərdə vaxtı keçmiş ərzaq məhsullarının satılması barədə şikayətlər artmaqdadır. Bu günlərdə sosial şəbəkələrdə “Araz” supermarketlər şəbəkəsinin Şamil Əzizbəyov küçəsində yerləşən filialında vaxtı keçmiş qida məhsulunun satılması ilə bağlı video paylaşılıb.
Bakupost.az-ın məlumatına görə, videonu paylaşan vətəndaş iddia edir ki, aldığı məhsulun istehlak tarixi keçib və üzərinə saxta yolla son istifadə tarixi əlavə edilib. Məhsulun üzərində onun istifadə müddətinin bu ilin may ayına kimi olduğu göstərilib. Lakin araşdırmalar zamanı bəlli olub ki, məhsulun üzərinə bu məlumat sonradan yapışdırılıb.
“Marketlər həmin malları satışdan çıxarıb anbara toplayırlar və distribütora qaytarırlar, sonra distribütor da…”
Yararlılıq vaxtı keçmiş malların satışa çıxması barədə fikir bildirən Azad İstehlakçılar Birliyinin sədri Eyyub Hüseynov dedi ki, marketlər həmin malları satışdan çıxarıb anbara toplayırlar və distribütora qaytarırlar. Sonra distributor da istehsalçıya qaytarır. İstehsalçı isə onun mümkün qədər dəyişir və yenidən marketlərə göndərir: “Vaxtı keçmiş mallar dükandan birbaşa zibilxanaya getməlidir. Xüsusi bir qurum olmalıdır ki, yararsız malları Qida Təhlükəsizliyi Agentliyi ilə yığışdırıb məhv eləsin. Əgər Qida Təhlükəsizliyi Agentliyi və biznes qurumları istehlakçılara yararlılıq vaxtı keçmiş malları satmaq istəmirlərsə və istəklərində səmimidirlərsə, bu zaman lazım olan proqramı satış şəbəkələrində kompüterlərə yüklətməli və Qida Təhlükəsizliyi Agentliyinin serverinə inteqrasiya etməlidirlər. Qida Təhlükəsizliyi Agentliyində də baxanda bilirlər ki, hansı dükanda vaxtı keçmiş mallar var. Çox təəssüf ki, bu proqramı heç bir yerdə tətbiq etmirlər.
Biz illərdir vaxtı keçmiş malların kütləvi informasiya vasitələrinin iştirakı ilə məhv edilməsini həyata keçirmək istəyirik. Çox az hallarda buna nail olmuşuq. Keçən ilin sonlarında yalnız bir firmanın öz istəyi və Qida Təhlükəsizliyi Agentliyinin iştirakı ilə iki ayda yüz tona yaxın vaxtı keçmiş mal məhv edildi. Sonra bu təşəbbüsə başqa firma da qoşuldu. Lakin onlarla belə firma var və onlar mallarını dəyişirlər. Həmin malları da biz alırıq və sağlamlığımıza böyük ziyan verir. Aptek şəbəkələrində növbəyə dayanmağımız da bunun nəticəsidir.
Bütün bunların qarşısını almaq üçün birinci instehlakçılar diqqətli olmalıdırlar. Yəni istehlakçı belə malları görəndə hərəkət alqoritmi belə olmalıdır. İstehlakçı dükan sahibinə iradını bildirməlidir. Həmin malların satışdan çıxarılmasında özü iştirak etsə, çox yaxşı olar. Eyni zamanda kassa çekini saxlamaq və 1003 qaynar xəttinə zəng etmək vacibdir. Həmçinin Azad İstehlakçılar Birliyinə həmin şəxsin ərizəsi daxil olsa, biz böyük media kompaniyası, eləcə də dövlət orqanları ilə iş aparırıq. Beləliklə də, bunların qarşısını almaq olar. Çox təəssüflər olsun ki, Qida Təhlükəsizliyi Agentliyinin ciddi çatışmayan cəhətlərindən biri mediada gedən informasiyanı izləməməsidir. Mən ictimai şuranın iclasında rəhbərliyə dəfələrlə bunu demişəm. Nə qədər ki, Qida Təhlükəsizliyi Agentliyi ilə media sıx əlaqədə işləmir, vəziyyət belə də davam edəcək”.
Günel CƏLİLOVA
