Abşeron rayonunda məktəblinin dərsə gecikdiyi üçün cəzalandırılması ilə bağlı məlumat yayılıb. Qeyd edilir ki, hadisə rayonun Mehdiabad qəsəbəsində qeydə alınıb.
İddia edilir ki, 4 saylı orta məktəbdə dərsə gecikən şagirdə cəza olaraq müəllimi (xanım) məktəbin döşəməsini sildirib. Növbəti dəfə gecikmə olarsa, ona məktəbin tualetinin də döşəməsini siləcəyi barədə xəbərdarlıq edilib. Şagirdin bacısı iddia edib ki, qardaşı döşəməni silərkən müəllimi videoya da çəkib. Eyni zamanda, müəllim iddia edib ki, şagirdləri belə cəzalandırmaq həmin məktəbin daxili qaydalarıdır.
Dərsə gecikən şagirdi cəzalandırmaq üçün döşəmə sildirmək nə dərəcədə düzgündür? Ümumiyyətlə, dərsə gecikən şagirdi cəzalandırmaq üçün hər məktəbin daxili qaydasımı olur?
4 saylı orta məktəb - Elnurə Cavadzadə: “Hər bir məktəbdə olduğu kimi, bizim məktəbin də daxili qaydaları var”
Məsələ ilə bağlı Mehdiabad qəsəbəsi 4 saylı orta məktəbin direktoru Elnurə Cavadzadə bildirdi ki, şagirdləri bu üsulla cəzalandırmaq məktəbin daxili qaydalarıdır: “Hər bir məktəbdə olduğu kimi, bizim məktəbin də daxili qaydaları var. Yaponiya təhsil sistemində bu cür inzibati tənbeh tədbirləri var. Biz bu qaydalar barədə valideynləri məlumatlandırmışıq. Şagird dərsə bir dəfə, iki dəfə gecikə bilər. Amma artıq bu adət halını alırsa, həmin şagirdə qarşı inzibati tənbeh tədbiri görülməlidir. Həmin şagirdin adı dərsə mütəmadi gecikən şagird kimi dəftərə düşüb. Şagirdlər dərsə gələrkən kafelərə və mağazalara gedirlər. Məktəb bunun qarşısını almaq, şagirdlərin intizamlı olması üçün tənbeh tədbirləri tətbiq edir. Müəllim də şagirdə dəfələrlə xəbərdarlıqdan sonra ona döşəməni silməsini bir inzibati cəza olaraq tətbiq edib. Şagirdin bu an videosunun çəkilməsi iddiası əsassızdır. Onun bacısı da bizim məktəbin şagirdi olub. Bacısı müəllimlə qeyri-etik tərzdə danışaraq onun səsini yazıb. Səsyazmadan başqa heç bir video yoxdur. Şagirdə növbəti dəfə cəza olaraq tualeti təmizləməsi barədə xəbərdarlıq edilməyib”.
Elçin Əfəndi: “Heç kimin ixtiyarı yoxdur ki, şagirdi, hətta tələbə belə dərsə gecikdiyi üçün cəzalandırsın, gecikibsə, qaib yaz”
Təhsil eksperti Elçin Əfəndi bildirdi ki, bəzi müəllim adına layiq olmayanlara görə yaxşı müəllimlər də zərbə alır. Təəssüf ki, qurunun oduna yaş da yanır: "Bakıətrafı məktəblərin birində müəllim şagirdi dərsə gecikdiyi üçün cəzalandırıb. Onun cəza üsulu isə həmin şagirdə döşəmə sildirmək olub. Sanki məktəb deyil, N saylı hərbi hissədir. Müəllim "dembil", şagird isə "maladoy" əsgərdir. Bunları hansı ağılla, hansı əsasla işə götürüblər axı?
Heç kimin ixtiyarı yoxdur ki, şagirdi, hətta tələbə belə dərsə gecikdiyi üçün cəzalandırsın. Gecikibsə, qaib yaz. Əslində isə bu da normal yanaşma deyil. Daha cəza üsulu kimi şagirdi təhqir etmək, döşəmə sildirmək, süpürtdürmək nədir? Biz bullinqə qarşı mübarizə aparırıq, amma müəllim özü bunu edirsə, şagirdin sinif yoldaşlarından nə gözləyək? Sabah o uşaq psixioloji təzyiqə məruz qalmayacaq?”.
Günel CƏLİLOVA
