Bir neçə gün əvvəl Dövlət İmtahan Mərkəzi tərəfindən buraxılış imtahanı keçirilib. Lakin imtahan başa çatdıqdan sonra abituriyentlərin və repetitorların çoxu sosial şəbəkələrdə müxtəlif şikayətlər paylaşıb. Belə ki, onlar mətnlərin həcminin çox uzun olması, riyaziyyat fənnindən olan sualların çətin həll edilməsi və ana dili ingilisdili olmayan bir ölkə üçün xarici dil suallarının qəlizləşdirilməsi ilə bağlı müxtəlif paylaşımlar edib.
Maraqlıdır, buraxılış imtahanından şagirdlərin razı və narazı qaldığı hansı məqamlar var?
“İmtahandakı test tapşırıqlarında səviyyələr arasında asan, orta, çətin tip modellərə uyğunluq gözlənilməyib”
Təhsil eksperti Kamran Əsədov bildirdi ki, imtahana salınmış bəzi suallar uyğun olmayıb: “Builki imtahanlar iştirakçı sayına görə digərlərindən fərqlənir. Bu il çox sayda abituriyent və şagird buraxılış imtahanına qoşulub. Təhsil Xidmətləri Araşdırma və Təhlil Mərkəzi olaraq imtahanın ilkin nəticələrini təhlil edərkən gördük ki, müəyyən test tapşırıqlarında məzmun baxımından qüsurlar var. Test tapşırıqları ağırlıq dərəcəsinə görə 11-ci sinfin buraxılış imtahanına uyğun deyildi. Bu, daha çox növbəti mərhələyə, blok imtahanlarına salınan sual tipləridir. İmtahan iştirakçılarından heç də hamısının niyyəti ali təhsil müəssisələrinə daxil olmaq deyil. Orta ixtisas təhsil müəssisələrinə, peşə məktəblərinə daxil olmaq istəyənlər də var. Ümumiyyətlə, imtahandakı test tapşırıqlarında səviyyələr arasında asan, orta, çətin tip modellərə uyğunluq gözlənilməyib. Riyaziyyat fənnindən qüsurlu test tapşırıqları vardı. Azərbaycan dilində mətn tipli suallar həddsiz dərəcədə çətin idi və cavab tapmaq çox vaxt tələb edirdi. İmtahan iştirakçıları kontingent baxımından elə də hazırlıqlı deyildi.
Onu da deyim ki, riyaziyyat fənni üzrə sualların ağırlıq səviyyəsi yüksək idi, eyni zamanda bu fəndən təqdim edilmiş suallarda qüsurlarda var idi. Azərbaycan dili fənnindən verilmiş mətn tipli sualların kifayət qədər çox olması vaxt itkisinə səbəb oldu. Həmçinin, ingilis dili fənnində də dinləmə ilə bağlı problem var idi. Həm dinləmə qurğusu, həm də dinləmənin mətni şagirdlər üçün çətin idi. Uşaqların pandemiyadan çıxdığını nəzərə almaq lazım idi. Ümid edirik ki, növbəti imtahanlarda martın 5-də yol verilmiş səhvlər təkrarlanmaz”.
Ekspert hesab edir ki, sualların sadələşdirilməsinə ehtiyac var: “İmtahanda iştirak edənlərin heç də hamısı ixtisaslı mütəxəssis deyil ki, Müəllimlərin İşə Qəbulu ilə müqayisə edək. Orada iştirak edən namizədlərin hamısı ali təhsilli şəxslərdir. Həmin ixtisas üzrə mütəxəssislərdir. Onlar belə tip suallara cavab verməkdə çətinlik çəkirlər. Onlara bir fəndən sual verilir, ancaq buraxılış imtahanında iştirak edən gənclər qısa zaman ərzində üç fərqli fəndən məzmun standartlarını reallaşdırırlar. Hesab edirəm ki, martın 5-də keçirilən imtahan qəliz idi. Müəyyən qədər sadələşdirməyə ehtiyac var".
Günel CƏLİLOVA
