Sosial şəbəkələrdə Azərbaycan Kooperasiya Universitetinin tələbələrinə saqqal qadağasının qoyulduğu barədə məlumat yayılıb.
Bildirilir ki, saqqal saxlayan oğlanlar universitetə buraxılmır. Tələbələrin dediyinə görə, saqqalı olan şəxslər universitetin qapısından geri qaytarılıb.
Azərbaycan Kooperasiya Universiteti - Tamerlan Əkbərov: “Heç bir tələbə geri qaytarılmayıb, sadəcə onlarla maarifləndirici söhbət aparılıb”
Məsələ ilə bağlı Azərbaycan Kooperasiya Universitetin Mətbuat Xidmətinin rəhbəri Tamerlan Əkbərov bildirdi ki, heç bir tələbə geri qaytarılmayıb, sadəcə onlarla maarifləndirici söhbət aparılıb: “Ümumiyyətlə, vizual görünüş xatirinə saxlanılan saqqalla bağlı problem yaratmırıq. Amma rəhbərliyin tapşırığıdır ki, bura ali təhsil ocağıdır və istəyərdik ki, tələbə dərsə səliqəli gəlsin. Sinəyə qədər çatan saqalla gəlməsinlər. Səhər-səhər qapıda onlarla 5 dəqiqə söhbət aparılıb, sonra dərsə buraxılıblar. Dərsdən kənarlaşdırmaq, dərsə buraxılmamaq kimi administrativ tədbir yoxdur. Vizual görünüş üçün kim istəsə saqqal saxlaya bilər. Burada heç bir problem yoxdur”.
Hüseyn Axundov: “Tələbənin buna görə universitetə buraxılmaması yolverilməzdir”
Hüquqşunas Hüseyn Axundov bildirdi ki, insanların seçiminə hörmətlə yanaşılmalıdır. Bu, insanların azadlığı çərçivəsində olan məsələdir. Buna heç kəs müdaxilə edə bilməz. Şəxsi azadlıq aspektindən toxunulmazdır. Bu heç dini məsələ də deyil. Bəzi insanlar var ki, sadəcə saqqal saxlamağı xoşlayır. Tələbənin buna görə universitetə buraxılmaması yolverilməzdir: “Ali təhsil müəssisələrinin vəzifəsi təkcə peşəkar kadrlar yetişdirmək deyil, həm də sözün həqiqi mənasında dövlətinə, millətinə layiqli vətəndaşlar tərbiyə etməkdir. Bu zaman universitetin qarşısına qoyduğu ən böyük vəzifə həm də təlim-tərbiyə işini yerinə yetirməkdir”.
Günel CƏLİLOVA
