Müxalif cameədəki qurumların yenidən bir-birinə qarşı ciddi ittihamlar səsləndirdiyini müşahidə edirik. Budəfəki qalmaqalın yaranmasına səbəb Azərbaycanın Avropa İttifaqı yanında və Avropa Şurasında səfiri olmuş, hazırda radikal müxalifət mövqeyindən çıxış edən Arif Məmmədovun ReAL Partiyası haqda verdiyi açıqlaması olub.
Sabiq səfir özünün sosial şəbəkədəki hesabı üzərindən bildirib ki, ReAL hərəkatının nümayəndələri Brüsseldə Avropa diplomatları ilə görüşdə Azərbaycan hökumətinin islahatlarını dəstəkləyib. A.Məmmədov qeyd edib ki, bu barədə ona Avropa İttifaqında işləyən dostu danışıb. Arif Məmmədovun sözlərinə görə, Avropa diplomatları ilə görüşdə ReAL nümayəndələri deyiblər ki, Azərbaycan Prezidenti İlham Əliyev islahatlar aparmaq istəyir, lakin mühafizəkarlar ona mane olur: “Ancaq buna baxmayaraq, dövlət başçısı islahatların anonsunu verib və "böyük siyasi məhbus" qrupunun azad edilməsi bunun başlanğıcı hesab oluna bilər. Həmçinin deyiblər ki, Azərbaycanda mitinq keçirmək cəhdləri ölkədə aparılan islahatları ləngitməyə və mühafizəkarların xeyrinə əlavə arqumentlər verməyə yönəlib. Eyni zamanda, bəzi müxalif qüvvələrin taktikası Azərbaycanı Suriya ssenarisinə gətirə bilər. ReAL təmsilçiləri onu da bildiriblər ki, bu proseslərdə özünəməxsus xətt tutublar, sabitliyi poza biləcək mitinqlər və kütləvi aksiyalar yolunu yox, təşkilatlanmaqla seçkilərə qatılmaq xəttini əsas götürüblər”. Arif Məmmədovun özünü müxalif qüvvə adlandıran ReAL-ın Azərbaycan hökumətinin islahatlarını Avropada təbliğ etdiyinə dair məlumatları böyük qalmaqala səbəb olub. Digər müxaliflər ReAL-ı xəyanətdə və hakimiyyətlə sövdələşmədə ittiham etməyə başlayıblar. Arif Məmmədov Avropa diplomatları ilə görüşmüş ReAL nümayəndələrinin adlarını açıqlamayıb. Lakin mövzuya verilən reaksiyadan sonra məlum olub ki, həmin görüşdə ReAL-ı Natiq Cəfərli ilə Erkin Qədirli təmsil edib. ReAL Partiyasının funksioneri Erkin Qədirli “Facebook” səhifəsində Natiq Cəfərli ilə Brüssel səfəri haqda əhatəli məlumat yayıb. E.Qədirli rəngarəng görüşlər keçirdiyini təsdiqləyib. O bildirib ki, rəsmilərlə görüşlərin arasında Avropa Xarici Çalışmalar Xidmətində (European External Action Service) Azərbaycan, Ermənistan və Belarus üzrə bölümün, eləcə də Qonşuluq və Genişlənmə Danışıqları üzrə Baş İdarənin, yenə də Azərbaycan, Ermənistan və Belarus bölümünün rəhbərliyilə görüşləri olub: “Qarşı tərəf ölkəmizdəki gedişatı çox yaxşı bilir. ReAl Partiyasını da yaxşı tanıyırlar. Örnəyi, bu yaxınlarda İctimai Televiziyada çıxış etdiyimi xatırlatdılar, hərçənd, mən söhbəti onun üzərinə gətirəsi deyildim. Söhbətlərimizin böyük hissəsi Avropa Birliyilə Azərbaycan arasında imzalanması gözlənilən anlaşma haqqında oldu. Avropa məmurları dedilər ki, Azərbaycanın müxalif və sivil toplum çevrələrində bu anlaşmanın imzalanmasını istəməyənlər var. Nə təşkilat adı çəkdilər, nə adam. Biz də soruşmağı özümüzə yaraşdırmadıq. Arqumentlərini soruşduq, dedilər ki, bunu istəməyənlərin nəzərində sözügedən anlaşma İlham Əliyevin "diktator hakimiyyətini" gücləndirəcək. ReAl Partiyasının mövqeyini soruşdular. Dedik ki, anlaşmanın tezliklə imzalanmasını istəyirik, bunu ölkəmiz üçün çox önəmli sayırıq. Daha sonra ölkədəki gedişat haqqında soruşdular. Biz danışdıqca gördük ki, söylədiklərimizin çoxunu bilirlər, sadəcə gümanlarını yoxlamaq və bizim mövqeyimizi bilmək istəyirdilər. Biz də yazdıqlarımızı, müsahibələrimizdə danışdıqlarımızı onlara dedik. Yəni, burada uzatmayım, dediklərimizi asanlıqla güman edə bilərsiniz”. E.Qədirli görüşlərdə avropalı diplomatların ReAl Partiyasının planları ilə maraqlandıqlarını yazıb: “İmzatoplama kampaniyamız haqqında danışdıq, layihəmizi (topladığımız imzalarla birlikdə) Milli Məclisə göndərdiyimizi və qanunverici orqanın təşəbbüsümüzə hörmətlə yanaşıldığını söylədik. Parlament seçkilərinə hazırlaşdığımızı, erkən seçkilərin ola biləcəyini dedik. Başqa partiyalarla seçki koalisiyalarına gedə biləcəyimizi soruşdular. Maraqlıdır ki, burada Müsavat Partiyasının adını çəkdilər. Dedik ki, Müsavatla sıx əməkdaşlığımız olmasa da, qarşılıqlı hörmətimiz, orada dostlarımız var. Seçki dönəmi başlayarsa və Müsavat Partiyası seçkiyə getməyə qərar verərsə, onlarla bu mövzuda məsləhətləşmələrə hazır olduğumuzu söylədik. AXCP ilə bağlı heç nə soruşmadılar, biz də heç nə demədik”.
ReAl Partiyası ilə radikal müxalifəti təmsil edən digər qurumlar arasındakı münasibət o qədər də yaxşı deyildi. Təsadüfü deyil ki, bu qalmaqaldan əvvəl pariyanın sədri İlqar Məmmədov sosial şəbəkələr vasitəsilə yazmışdı ki, məhz müxalif dairələr 8 aydır ona qarşı vicdansız kampaniya aparır: "Deyirdim sizə, gedək seçkiyə, görək insanları səslərin müdafiəsinə səfərbər edə bilirikmi. Dediniz ki, yox e, biz meydanlardan birbaşa hakimiyyətə gələcəyik. 8 aydır mənə qarşı vicdansız təbliğat aparırsınız ki, inqilab eləmək istəyirik, İlqar Məmmədov imkan vermir. Yaxşı, "inqilab-inqilab" deyirdiniz, 4 dəfə mitinqə qoyulan qadağa həmin o inqilabınızı haçana qədər ertələdi? Amma qapılarımız yenə də açıqdır, seçki məsələsində əməkdaşlığa hələ də tam hazıram və bir daha dəvət edirəm". Proseslərin təhlili göstərir ki, onsuz da münasibətləri rəvan olmayan müxalif dairələr arasındakı qalmaqalın Brüssel olayından sonra daha da genişlənəcəyi heç bir şübhə doğurmur.
Əslində, biz məsələyə ReAL-dan partiya adından açıqlama almaqda maraqlı idik. Lakin partiya adından bu sualı cavablandıran bir funksioner tapa bilmədiyimiz səbəbindən əsas məsələyə heç də cavab verməyən funksioner mövqeyini onların sosial şəbəkələrdəki hesablarından götürməyə məcbur olduq. Amma real mənzərə ondan ibarətdir ki, Arif Məmmədovun açıqlamasına hələlik ReAL səviyyəsində konkret mövqe ortaya qoyulmayıb.
Məhəmmədəli QƏRİBLİ
