Qarabağ separatçıları ilə Ermənistanda mövcud hakimiyyət arasında artan gərginliyin daha təhlükəli mərhəlyə keçə biləcəyinə dair erməni mediasında yenidən həyəcan təbili çalınmaqdadır. Belə görünür ki, Nikol Paşinyan iqtidarını devirmək istəyənlər bu prosesdə indi Qarabağ ermənilərindən daha çox faydalanmağa çalışırlar. Belə bir vaxtda “Past” qəzeti məlumat yayıb ki, Qarabağ separatçılarının keçmiş “müdafiə naziri” Samvel Babayan Ermənistanın yeni hökumətinə qarşı fəaliyyətə başlayıb.
Məlumata görə, Babayan artıq bir aydır İrəvanda və Azərbaycanın işğal altında saxlanan Qarabağ ərazisində görüşlər keçirir: “Bu görüşlər açıq antipaşinyan xarakteri daşıyır. Xüsusilə bu günlərdə Samvel Babayan qarabağlılarla görüşü zamanı Paşinyanı yanlış istiqamətdə danışıqlar aparmaqda ittiham edib. Bu da göstərir ki, Babayan da artıq “torpaqların verilməsi” nəzəriyyəsini irəli sürənlərə qoşulub və özünü Paşinyanın qarşısını ala biləcək yeganə şəxs kimi göstərir. Baş naziri artıq dəfələrlə Samvel Babayanın ciddi başağrısı olacağıyla bağlı xəbərdar ediblər”.
Qeyd edək ki, bundan öncə Babayan qondarma rejimdə baş tutacaq “prezident seçkisi”nə qatılmaq istədiyini açıqlayıb. Belə görünür ki, o, burada yerini möhkəmlədərək daha sonra Paşinyanı postundan aşırmağı düşünür. Məhz bu durumda Paşinyan üçün əsas məsələ Qarabağdan ona gələn təhlükələri neytrallaşdırmaqdır. Bu məqsədlə Paşinyan ilk olaraq Samvel Babayana dəstək verən separatçı rejimin hərbçilərini sıradan çıxarmağa çalışır. İşğal altında olan Qarabağdakı qanunsuz hərbi birləşmənin komandir müavini olan Samvel Karapetyanın vəzifəsindən azad edilməsi bunun ilk nümunələrindən biri sayılır. Prosesi müxalifətçi “deputat” Hayk Xanumyan hərbi elitanın nəsil dəyişməsi kimi dəyərələndirib. Politoloq Aleksandr Kananyan hesab edir ki, Samvel Karapetyanın iştirakı ilə baş verən bütün hadisələr araşdırılmalı, zərurət olduğu halda o, məsuliyyətə cəlb edilməlidir. “Sasna Tsrer” partiyasının həmtəsisçisi Varujan Avetisyan Qarabağda başlanan dəyişiklikləri gecikmiş addım hesab edir. Keçən ilin sonunda qanunsuz hərbi birləşmə komandiri Levon Mnatsakanyan da tutduğu vəzifədən çıxarılaraq aşağı vəzifəyə - “fövqəladə hallar xidmətinə” rəis təyin edildi. Aleksandr Kananyan qeyd edir: “Bunların böyük əksəriyyəti “1 mart” cinayətinin, Laçın qırğınlarının qəhrəmanlarına çevrilmişdi. Ona görə də bu dəyişikliklər inqilabdan bir il sonra “məxməri inqilab” təəssüratı altında yox, çoxdan edilməli idi. Amma Paşinyan həmin şəxslərin onun üçün təhdid olduğunu görüb indi bu addımları atır”.
Digər tərəfdən, Paşinyanı narahat edən bir məsələ də uzun müddətdir Qarabağda olan sabiq prezident Serj Sarksiyanla bağlıdır. Məlumatlara əsasən, Paşinyan Serj Sarksiyanın da Samvel Babayana dəstək verə biləcəyindən ciddi narahatlıq keçirir. “Joxovurd” nəşri yazır ki, hətta bütün bunlara görə Paşinyan aprelin 7-də Hovan kilsəsinin qurulması ilə bağlı Qarabağda keçirilməsi nəzərdə tutulan mərasimə qatılmayacaq. Ermənistanın baş naziri həmin gün “Yerkrapah” təşkilatının qurultayında iştirak edəcəyini açıqlayıb və Qarabağa səfərdən imtinasını da bununla əsaslandırıb. “Joxovurd” nəşri yazır: “Paşinyan Qarabağa gəlməyəcək, yəni “Yerkrapah” təşkilatının qurultayında iştirak edəcək. Amma “Yerkrapah” təşkilatının qurultayını məhz aprelin 7-ə planlaşdırması heç də təsadüfi deyil. Paşinyan Qarabağda özünə getdikcə daha böyük təhlükə hiss edir. Bununla yanaşı, Respublika Partiyasının sədri Serj Sarkisyan da Qarabağa gəlmək barədə təklif alıb. Görünür, Sarksiyan da Paşinyana qarşı oyunların içindədir və baş nazir də bunu bilir”.“İrates” qəzeti isə yazır ki, belə vəziyyətdə ciddi təhdidlər alıtnda olan Nikol Paşinyanın öz komandasından da narazılığı artmağa başlayıb.
Məlumata görə, Paşinyanın komandasından narazılıq səbəblərindən biri də parlamentdə “Mənim Addımım“ bloku üzvləri arasında yaranan gərginlikdir: “Bəzi dəyərləndirmələrə əsasən, Paşinyan hökuməti təkcə hər gün itirdiyi reytinq, iqtisadiyyatın çökməsi, investisiyaların yoxluğu ucbatından yox, həm də parlament ucbatından zəifləyir. Parlamentdə ciddi iş sayəsində hər dəqiqə yeni çoxluq formalaşdırmaq mümkündür. Bu iddialar son zamanlar Edmon Marukyan və erməni oliqarx Hagik Tsarukyanın yaxınlaşması şayiələrindən sonra daha da güclənib. Bu vəziyyətdə Paşinyan üçün zərbə təkcə Qarabağdan yox, həm də Ermənistan daxilindən gələ bilər. Baş nazir bunlara görə çox narahatdır”. Qeyd edək ki, bundan öncə Ermənistan mətbuatı “Mənim Addımım“ blokunun deputatları arasında fikir ayrılığının güclənməsi barədə məlumat yayıb. Mətbuat fikir ayrılığının, xüsusilə “Mülki Müqavilə“ partiyasına üzv deputatlarla partiyaya üzv olmayan deputatlar arasında olduğunu bildirib. Narazılığa əsas səbəb partiya üzvü olmayan deputatların blok rəhbərliyi ilə hesablaşmaq istəməməsidir.
Tahir TAĞIYEV
