Elman Nəsirov: “Cənab Prezidentin fikirlərindən çıxan ən böyük məna budur ki, Ermənistan bundan nəticə çıxarsın”
Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev aprelin 2-də Müdafiə Nazirliyinin Xüsusi Təyinatlı Qüvvələrinin “N” saylı hərbi hissəsində hərbi qulluqçularla görüşü zamanı olduqca mühüm əhəmiyyət kəsb edən bəyanatlar səsləndirib.
Prezident aprel döyüşlərində ordumuzun şanlı qələbəsindən də danışıb: "Aprel döyüşlərindən 3 il keçir. Aprel döyüşləri tariximizin şanlı səhifəsidir. Döyüşlər zamanı itkilərimiz də olub, Allah bütün şəhidlərimizə rəhmət eləsin. Yaralı hərbçilərimizin müalicəsi, bərpası üçün dövlət əlindən gələni əsirgəməyib və yaralanmış bütün hərbçilər xoşbəxtlikdən normal həyata qayıtdılar. Onların müalicəsi, bərpası, aktiv həyata qayıtmaları üçün bütün lazımi işlər görülmüşdür...”.
Ölkə başçısı, həmçinin, Ermənistanla müharibənin hələ bitmədiyini xüsusi olaraq vurğulayıb:
"Bu gün Azərbaycan Ordusu uğurla inkişaf edir, ordu quruculuğu prosesi sürətlə gedir, bizim hərbi hissələrimiz yenidən qurulur, yenidən tikilir, ordumuz ən müasir texnika ilə təchiz edilir. Bu da təbiidir, çünki biz müharibə şəraitində yaşayırıq, müharibə hələ bitməyib, müharibənin birinci mərhələsi başa çatıb. Bu gün Azərbaycan Ordusu dünya miqyasında güclü ordular sırasındadır”.
Ölkə başçısının bu fikirləri Ermənistan KİV-i tərəfindən geniş analiz edilir. Xüsusilə də İlham Əliyevin müharibənin hələ bitməməsi, yanız birinci mərhələsinin başa çatması ilə bağlı dediklərini ermənilər özlərinə sərf edən tərzdə yozmağa başlayıblar. Elə bizim özümüz üçün də maraqlıdır. Ölkə başçısı müharibənin yalnız birinci mərhələsinin bitməsi deyəndə nəyi nəzərdə tutub, bunu necə başa düşmək olar?
Millət vəkili, politoloq Elman Nəsirov “Bakı-Xəbər”ə açıqlamasında bildirdi ki, ölkə başçısının həmin fikirlərində böyük məna əks olunub: “Bəli, Prezident aprel döyüşləri ilə bağlı tədbirdə bir daha söylədi ki, həmin hadisə şanlı tariximizin parlaq səhifəsidir. Eyni zamanda, vurğuladı ki, müharibənin yalnız birinci mərhələsi başa çatıb. Bu fikirləri erməni mətbuatı cürbəcür kontekstdən təqdim edir, ən əsası isə öz xeyirlərinə interpretasiya edirlər. Əslində isə bu fikrin əsas məzmunu budur ki, ermənilər heç də müvəqqəti üstünlükləri ilə öyünməsinlər. Bilsinlər ki, onlar heç də müharibəni udmayıblar. Yalnız müharibənin birinci mərhələsi başa çatıb. Bu o deməkdir ki, əgər ermənilər torpaqlarımızı dinc yolla geri qaytarmasalar, heç kim təminat verə bilməz ki, müharibənin ikinci mərhələsi olmayacaq. Bu baxımdan aprel döyüşləri ermənilər üçün bir dərs olmalıdır. 4 günlük döyüşdə bu sübut edildi. Erməni ordusunun yaratdığı məğlubedilməz mif tamamilə darmadağın oldu. Azərbaycan Ordusu göstərdi ki, torpaqlarımız üzərindəki suverenliyi bərpa etmək üçün hər cür gücə malikik. Ən müasir silahlarla silahlanan ordumuzla xalqımızın sıx birliyi var. Məhz bu amilləri bildiyi üçün Ali Baş Komandan belə əminliklə danışır. Cənab Prezidentin fikirlərindən çıxan ən böyük məna budur ki, Ermənistan bundan nəticə çıxarsın. Əks təqdirdə müharibənin növbəti fazası ilə üzləşə bilər”.
Məhəmmədəli QƏRİBLİ
