Aprelin 3-də Prezident İlham Əliyevin sərəncamı ilə Azərbaycan Dövlət Dəniz Akademiyasına rektor təyin olunan Heydər Əsədov kimdir?
Sabiq nazirlə bağlı əldə etdiyimiz məlumata görə, Heydər Xanış oğlu Əsədov iqtisadçıdır. O, 1959-cu il oktyabr ayının 24-də Ermənistan SSR-in Qarakilsə rayonunda doğulub. 1978-ci ildə Bakı Sovet Ticarəti Texnikumunun mühasibat uçotu fakültəsini, 1983-cü ildə D.Bünyadzadə adına Azərbaycan Xalq Təsərrüfatı İnstitutunun Uçot-iqtisad fakültəsinin məzunu olub.
1978-1984-cü illərdə institutda oxuduğu illərdə fəhlə, mühasib, böyük mühasib, böyük təftişçi vəzifələrində işləyib. 1983-1992-ci illərdə Azərbaycan Dövlət İqtisad İnstitutunda müəllim, baş müəllim vəzifələrində çalışıb, 1987-ci ildə isə M.V.Lomonosov adına Moskva Dövlət Universitetində namizədlik dissertasiyasını müdafiə edərək iqtisad elmləri namizədi alimlik dərəcəsini alıb.
H.Əsədov 1992-1995-ci illərdə Türkiyənin Mərmərə Universitetinin doktorantı olub.
1995-ci ildə Azərbaycan Respublikası Prezidentinin sərəncamı ilə maliyyə nazirinin müavini təyin edilib, 1996-2007-ci illərdə Maliyyə Nazirliyi yanında Baş Dövlət Xəzinədarlığının baş direktoru, Azərbaycan Respublikası maliyyə nazirinin müavini vəzifələrində işləyib. 17 aprel 2007-ci ildə Azərbaycan Respublikası Milli Məclisinin qərarı ilə Hesablama Palatasının sədri vəzifəsinə təyin edilib. 22 oktyabr 2013-cü ildə isə Prezident İlham Əliyevin sərəncamı ilə Azərbaycan Respublikasının kənd təsərrüfatı naziri vəzifəsinə təyin edilib. O, bu vəzifədə 21 aprel 2018-ci il tarixinə qədər çalışıb. 3 monoqrafiyanın və 30-dan çox elmi əsərin müəllifidir.
2011-ci ildə 2-ci dərəcəli “Vətənə xidmətə görə” ordeninin kavaleri olan rektor hər zaman diqqət mərkəzində olub. Deyək ki, o barəsində ən çox yazılan məmurlardan biri olub. H.Əsədovla bağlı yazılarda onun fəaliyyətinə ən müxtəlif rakurslardan yanaşılıb. Keçmiş nəqliyyat naziri Ziya Məmmədovla quda olan Heydər Əsədov qohumluq əlaqələrinə görə də gündəmdə olub. Məlumdur ki, keçmiş nəqliyyat naziri Z.Məmmədovun oğlu Anar Məmmədov H.Əsədovun qızı ilə ailə qurub. Bundan başqa, onun Dövlət Gömrük Komitəsi sədrinin müavini, general-leytenant Əsgər Abdullayevlə quda olması barədə də mediada məlumatlar yer alıb.
Onu da bildirək ki, mətbuatda 2018-ci ildə ölkəmizdə keçirilən prezident seçkisindən sonra hökumətdə post tutmayan H.Əsədov barədə birmənalı fikirlər yoxdur. Bəziləri onun nazir olduğu dövlərdə həyata keçirdiyi islahatları təqdir edir, bəziləri isə hesab edir ki, nazir işlədiyi dövrdə bu sahə daha pis vəziyyətə düşüb.
H.Əsədovun 5 illik nazirlik dövrünü qiymətləndirən bəzi ekspertlərin qənaətinə görə, bu dövrdə onun başçılıq etdiyi sahə Azərbaycan iqtisadiyyatının ən əsas prioritetlərindən biri olub və onun bu sahənin inkişafı ilə bağlı təklif etdiyi layihələr ölkə rəhbərliyi tərəfindən dəstəklənib. Buna nümunə kimi nazirliyin rayon şöbələrinin yaradılmasına, şöbələrin əksəriyyətinə xüsusi inzibati bina tikilməsinə və s. nail olması göstərilir. Qeyd edilənə görə, H.Əsədov nazir olduğu dövrdə 52 rayon şöbəsi üçün inzibati bina tikilməsini reallaşdıra bilib. Bundan başqa, onun Hökumət Evindəki ofisindən də narazı olduğu barədə fikirlər medianın gündəmində olub. Yazılanlara görə, buna görə də KTN-in mərkəzi aparatına yeni binanın tikintisi üçün fəaliyyətlər həyata keçirilib. 2017-ci ilin mayında binanın layihələndirilməsi, noyabrında isə artıq tikintisi üçün nazirlik tərəfindən tender elan edilmişdi, binanın isə 10 mərtəbəli olması nəzərdə tutulduğu qeyd edilirdi. Çoxsaylı binaların tikintisi ilə yanaşı, H.Əsədov nazir olduğu dövrdə kənd təsərrüfatı sahəsinə külli miqdarda vəsait ayrıldığı və bura yalnız müxtəlif bitkilərin əkini üçün dövlətin verdiyi dotasiyalar deyil, maşın və texnikanın, damazlıq heyvanların, hətta tinglərin alınmasına, çoxsaylı laboratoriyanın qurulmasına sərf olunan yüz milyonlarla manat dövlət vəsaiti aid olduğu da mətbuatda yer alıb.
H.Əsədov nazir vəzifəsindən kənarlaşdırıldıqdan sonra onun ali məktəblərdən birində müəllimlik etməsi barədə də xəbərlər yayılmışdı, lakin sabiq nazir bu xəbəri təkzib edərək heç bir yerdə pedaqoji fəaliyyətlə məşğul olmadığını bildirmişdi. Ötən 1 il ərzində mətbauata öz fəaliyyəti haqqında heç bir məlumat verməyən H.Əsədov haqqında müxtəlif şayiələr də az deyildi. Məsələn, sabiq nazirin vəzifədən kənarlaşdırıldıqdan sonra depressiyaya düşdüyü barədə informasiyalara da mətbuatda rast gəlinirdi.
Azərbaycan Dövlət Dəniz Akademiyasına rektor təyin olunan H.Əsədov təyinatından dərhal sonra mətbuata açıqlama verib. O, açıqlamasında bütün fəaliyyəti boyu olduğu kimi, dövlətə, dövlətçilik ənənələrinə xidmət edəcəyini, “göstərilən etimadı doğrultmaq üçün çalışacağam” deyib.
İradə SARIYEVA
