Daşdəmir Əliyev: “Baş verənlər bir daha sübut edir ki, Azərbaycan xalqı, onun rəhbərliyi aprel döyüşlərinə, onun qəhrəmanlarına böyük önəm verir” “Heç bir saxta erməni təbliğatı buna kölgə sala bilməz”
Şanlı aprel döyüşləri hər il ölkəmizdə xüsusi olaraq xatırlanır. Böyük qələbəmizin ilk müjdəsini verən həmin qəhrəmanlıq tariximizin 3 illiyi ilə bağlı ölkə rəhbərliyi tərəfindən də sosial şəbəkələr vasitəsilə fəal təbliğatın aparıldığının şahidi olduq.
Prezident İlham Əliyev “Facebook” səhifəsində və “YouTube” kanalında Azərbaycan Ordusunun aprel qələbəsinin üçüncü ildönümü münasibətilə videoçarx paylaşıb. Videoçarxa “Qəhrəmanlarımızla fəxr edirik! APREL 2016” şərhi verilib.
Azərbaycanın Birinci vitse-prezidenti Mehriban Əliyeva də rəsmi “İnstagram” səhifəsində bu barədə yazıb: "Aprel döyüşləri bir daha bütün dünyaya nümayiş etdirdi ki, Azərbaycan dövləti işğalla heç zaman barışmayacaq və Azərbaycan Ordusu lazım olan əməliyyatı uğurla həyata keçirməyə qadirdir. Bu döyüşlər zamanı mərd və cəsarətli Azərbaycan gəncləri, əsgərlərimiz, zabitlərimiz Vətən yolunda qəhrəmanlıq göstərərək şəhid oldular, ömürlərini qurban verdilər. Azərbaycanın ərazi bütövlüyünün bərpası, müstəqilliyi, ölkəmizin daha qüdrətli, daha möhkəm olması yolunda şəhid olmuş bütün insanlara Allah rəhmət eləsin. Onların əziz xatirəsi Azərbaycan xalqının qəlbində daim yaşayacaq".
Görünür, ölkə rəhbərliyinin aprel döyüşlərilə bağlı belə aktiv təbliğatı Ermənistanın rəsmi dairələrini bərk narahat edib. Təsadüfi deyil ki, elə həmin gün Ermənistan Xarici İşlər Nazirliyi adından bəyanat yayıldı. Sırf aprel döyüşlərinə həsr edilən həmin bəyanatda qeyd edilir ki, guya 3 il əvvəl qondarma rejimin hərbçiləri Azərbaycan tərəfinin genişmiqyaslı hücumunun qarşısını almağa müvəffəq oldular. Maraqlıdır ki, Ermənistan XİN bəyanatında Azərbaycanı həmin hadisələr zamanı atəşkəsi pozmaqda günahlandırmağa çalışır və qeyd edir ki, bu fakt Dağlıq Qarabağdakı erməni əhalisi üçün etnik təmizləmə təhlükəsinin hələ də qalmasının sübutudur.
Ermənistan XİN səviyyəsində aprel döyüşləri ilə bağlı verilən bəyanatı Azərbaycan dövlət rəhbərlərinin şanlı tariximizlə bağlı apardığı təbliğata cavab cəhdi kimi qiymətləndirmək olarmı?
Hərbi ekspert Daşdəmir Əliyev “Bakı-Xəbər”ə bildirdi ki, aprel döyüşləri Azərbaycanın işğalla barışmayacağını bir daha sübut etdi: “Hər il bu şanlı döyüşün ildönümü, həmin hadisələr zamanı şəhid olan övladlarımızın xatirəsi xalqımız tərəfindən böyük ehtiramla anılır. Ölkə rəhbərliyinin sosial şəbəkələr vasitəsilə etdiyi paylaşımları izlədim. Hesab edirəm ki, bu faktorun hərbi-vətənpərvərlik hisslərinin daha da qaldırılmasında böyük rolu olacaq. Hər bir zabit, əsgər və gələcəyin əsgəri görür ki, ölkə rəhbərliyi qəhrəmanlığa və konkret olaraq canlarını torpaq yolunda fəda edənlərə hansı dəyəri verir. Təbii ki, Ermənistan siyasi rəhbərliyini bu dərindən narahat edir. Bu səbəbdən də onların XİN səviyyəsində verdiyi bəyanatı cavab xarakterli saya bilərik. Amma böhtanla dolu həmin məzmun Azərbaycanın apardığı təbliğata cavab ola bilməz. Çünki 2016-cı il aprelin əvvəllərində Azərbaycanın ön xətt mövqeləri və yaşayış məntəqələri Ermənistan silahlı qüvvələri tərəfindən intensiv artilleriya atəşinə məruz qalanda ordumuzun bölmələri əks-həmlə ilə təxribatların qarşısını aldılar. Yəni ilk hücumu biz yox, onlar etmişdi. Bu, aprel döyüşləri kimi tarixləşdi. Döyüşlər Azərbaycan Ordusunun qələbəsi ilə nəticələndi. Tərtər rayonunun Talış kəndi ətrafındakı yüksəkliklər, Cəbrayıl rayonunun Lələtəpə yüksəkliyi və bəzi mövqelər düşməndən azad olundu. Aprel döyüşləri nəticəsində Azərbaycan Silahlı Qüvvələri 2000 hektarlıq ərazini azad etdi. Azərbaycan Respublikasının Prezidentinin müvafiq sərəncamları ilə Azərbaycan Silahlı Qüvvələrinin 3 üzvü "Azərbaycanın Milli Qəhrəmanı", 7 üzvü "Azərbaycan Bayrağı" ordeni, 1 üzvü 2-ci dərəcəli və 4 üzvü 3-cü dərəcəli "Vətənə xidmətə görə" ordeni, 19 üzvü "Vətən uğrunda" medalı, 43 üzvü "İgidliyə görə" medalı, 45 üzvü "Hərbi xidmətlərə görə" medalı, 2 üzvü "general-mayor" ali hərbi rütbəsi ilə mükafatlandırılıb. Bu gün baş verənlər bir daha sübut edir ki, Azərbaycan xalqı, onun rəhbərliyi aprel döyüşlərinə, onun qəhrəmanlarına böyük önəm verir. Heç bir saxta erməni təbliğatı buna kölgə sala bilməz”.
Məhəmmədəli QƏRİBLİ
