Nəzakət Məmmədova: “Bu, Ermənistan diplomatiyasının ənənəvi dəst-xəttidir və mətnin dəyişdirilməsi Paşinyanın dəftərxanasının da bu ənənədən kənara çıxa bilmədiyini göstərdi”
Ermənistan baş nazirinin mətbuat xidməti Nikol Paşinyanın Rusiya Prezidenti Vladimir Putinlə apardığı telefon danışığına dair məlumatını redaktə edib. Erməni KİV-i xəbər verir ki, mətndən Paşinyanın Putini Azərbaycan Prezidenti İlham Əliyevlə ötən həftə Vyanada aparılmış danışıqlar barədə məlumatlandırması barədə cümlə çıxarılıb. Onun əvəzinə mətnin yeni və hazırda hökumətin saytında olan versiyasında “tərəflər bu günlərdə keçirilmiş görüşlərin nəticələrini müzakirə ediblər” ifadəsi yer alıb.
Məlumatın birinci versiyası telefon danışığına dair Kremlin rəsmi saytında yerləşdirilmiş məlumatla üst-üstə düşürdü. Kreml də bildirirdi ki, Ermənistan baş naziri İlham Əliyevlə aparılmış danışıqlar barədə Rusiya Prezidentini məlumatlandırıb.
Paşinyanın mətnin yeni versiyasından bu ifadəni niyə çıxardığı məlum deyil. Amma bəzi erməni KİV-i ehtimal edir ki, məlumatın əvvəlki variantında Ermənistan baş nazirinin Putinə “müəyyən tabeliyi” əks olunurdu və bu da erməni tərəfinin “daha aşağı statusda olmasını” göstərirdi. Paşinyan isə mətni dəyişdirməklə Putinə “tabe olmadığını” nümayiş etdirir və bu variantı Ermənistanın suverenliyi baxımından daha məqbul sayır. Ermənistan KİV-indəki materialların məzmunundan hiss edilir ki, Paşinyanın Putinə etdiyi zəng və bununla bağlı yayılan ilkin məlumata görə baş nazirə ciddi basqılar var. Ermənistanın telefon danışığı ilə bağlı yayılan mətni redaktə etməyə başqa hansı amillər vadar edə bilər?
Politoloq Nəzakət Məmmədova “Bakı-Xəbər”ə bildirdi ki, mətndəki əvvəlki cümlədə Paşinyanın Putini məlumatlandırması Paşinyan haqda Putin qarşısında hesabat verməli olan, özünü Rusiya Prezidentinə yaxın göstərmək, ona xoş gəlmək üçün görüş barədə məlumat verməyi vəzifə borcu bilən siyasətçi təsəvvürü yaradır: “Belə olduğu təqdirdə, Putin və Paşinyan arasında suverenliyə, müstəqil dövlət başçıları arasında bərabərhüquqlu münasibətlərə sığmayan aşkar tabelik münasibətləri nəzərə çarpır. Eyni zamanda, bu, Rusiya Prezidenti Putini də xoşagəlməz vəziyyətdə qoyur. Rusiya Prezidentini danışıqlar barədə məlumatlandırmalı olan səlahiyyətli şəxs Minsk Qrupunun rusiyalı həmsədridir. Münaqişə tərəfi olan, eyni zamanda, guya müstəqil dövlətin rəhbəri olan baş nazir belə etməməlidir”.
N.Məmmədovanın sözlərinə görə, biz Ermənistan bir dövlət kimi yaradılandan bəri ona rəhbərlik etmiş istənilən şəxsin Rusiyadan çəkindiyini bilirik: “Son hadisələr göstərir ki, Paşinyan da istisna deyil. Doğrudur, o, hakimiyyətə gəldikdən sonra bir sıra addımlar atdı və bu, Rusiyanın Ermənistan siyasətinə zidd idi. Lakin son dövrlər Paşinyan tələsdiyini anlayaraq Rusiyaya qarşı əvvəlki kimi radikal deyil və hakimiyyətini itirməmək, Rusiyanın təxribatlarına rəvac verməmək üçün daha çəkingən davranır. Eyni zamanda, görünür, o, seçkilərdə xalqın səsini qazanmaq üçün növbədənkənar parlament seçkilərinədək bir sıra anti-Rusiya addımları atmalı olmuşdu. Lakin 2018-ci il dekabr seçkilərindən sonra istər daxili, istərsə də xarici siyasətdə müəyyən təkamülü müşahidə edirik, o cümlədən, son Vyana görüşünün detalları barədə Putini məlumatlandırması bu qəbildəndir”.
Xanım politoloq hesab edir ki, Paşinyan Putinə qaçaraq məlumat verməklə ona yaxın və səmimi olduğunu sübut etmək, Putinin itirilmiş etimadını qazanmaq niyyətində olub: “ Eyni zamanda, danışıqlar barədə məlumat verməklə məsələni Rusiya Prezidentinə özünə sərf edən şəkildə çatdırmaq, həm də Minsk Qrupunun rusiyalı həmsədri İqor Popovu qabaqlamaq istəyib. Mətndə redaktə də Paşinyanın etdiyi hərəkəti ört-basdır etmək məqsədilə olunub. Bu, Ermənistan diplomatiyasının ənənəvi dəst-xəttidir və mətnin dəyişdirilməsi Paşinyanın dəftərxanasının da bu ənənədən kənara çıxa bilmədiyini göstərdi”.
Məhəmmədəli QƏRİBLİ
