Aqşin Əliyev: “Bu hadisə, eyni zamanda, Ermənistanda stabilliyin, siyasi plüralizmin olmadığının bir göstəricisidir”
İrəvanda rusiyayönümlülərlə qərbyönümlülər arasında toqquşma olub. Ermənistan KİV-inin verdiyi məlumata görə, noyabrın 29-da yüzə yaxın kommunist Ermənistanın sovetləşməsinin 98 illiyini qeyd etmək istəyib. Onlar Respublika meydanı yaxınlığındakı 26 Bakı komissarlarının lideri Stepan Şaumyanın, eləcə də “Qızıl ordu” döyüşçülərinin heykəlləri önünə gül qoymaq istəyiblər. Bu zaman avropayönümlülər onlara hücum ediblər. Tərəfləri ayırmaq üçün əlavə polis qüvvəsi çağırılıb.
Tədbir Ermənistan Kommunist Partiyası tərəfindən təşkil edilibmiş. Onlara Ermənistan Mütərəqqi Kommunist Birliyi Partiyası və Sosialist Yolu Partiyası da qoşulub. Onlar həmin heykəllərin önünə gül dəstəsini bir yerdə qoyublar.
Bir müddət sonra polisin müşahidəsi ilə Ermənistanın Avropaya inteqrasiyası tərəfdarları 102 saylı Rusiya hərbi bazasının ölkədən çıxarılması tələbi ilə əllərində şüarla kommunistlərin yanından yürüşlə keçiblər. Onların əlindəki “Ermənistan azad deyil, işğal olunub!” şüarı yazılan plakatlar kommunistlərin qəzəbinə səbəb olub.
Ermənistan Kommunist Partiyasının rəhbəri həmin hadisədən sonra jurnalistlərə bildirib ki, Ermənistandakı 102-cı bazaya alternativ görmürlər: “Çünki heç bir NATO ölkəsi bizi eyni blokda təmsil olunduqları Türkiyənin təcavüzündən qoruyan deyil. Bu elə onların istəyidir ki, nəyin bahasına olursa-olsun, Ermənistanı Rusiyanın əlindən alsınlar. Biz buna imkan verməyəcəyik”.
Göründüyü kimi, Ermənistan küçələrində, fakitiki olaraq, iki fərqli siyasi qütbün namayəndələri arasındakı münasibətlər küçələrdə aparılan dava-dalaş vasitəsilə aydınlaşdırılıb. Ermənistanda baş verən bu hadisə nəyin əlaməti sayıla bilər?
Ekspert Aqşin Əliyevin sözlərinə görə, belə hadisənin məhz indiki məqamda baş verməsi çox suallara cavab vermiş olur: “Ermənistanda fərqli düşüncədə olan adamlar və ya siyasi partiyalar bundan əvvəl də olub. Onda isə niyə indiyə kimi belə hadisələr baş vermirdi? Bu, Paşinyan hakimiyyətinin Rusiyaya nümayiş etdirdiyi gücdür. Onlar bununla demək istəyirlər ki, bizdəki ictimai rəy Rusiyanı qəbul etmir, hətta sizin hərbi bazanızın belə ölkədən çıxarılmasını tələb edirlər. Fikir versək görərik ki, tədbirində dava salınan kommunustlər olub. Yəni rusiyameyilli həmin qüvvələr öz tədbirlərini keçirərkən başqa qüvvələrin hücumuna məruz qalıblar. Dəqiq deyə bilərik ki, bu, təşkil edilmiş bir aksiya olub. Bununla Paşinyan Rusiyaya demək istəyir ki, hətta Moskvanın ölkədə olan tərəfdarlarını belə döydürməyə qadirdirlər. Bu hadisə, eyni zamanda, Ermənistanda stabilliyin, siyasi plüralizmin olmadığının bir göstəricisidir. Yəqin ki, yaxın gələcəkdə biz Ermənistanda bundan da gərgin siyasi münaqişələrin şahidi olacağıq”.
Məhəmmədəli QƏRİBLİ
