Əli Orucov: “Xüsusən də taxıl da daxil olmaqla, ərzaq məhsullarının daşınması bu limandan dayandırılarsa, o zaman ciddi problemlər ortaya çıxa bilər”
Təcavüzkar siyasəti üzündən onillərdir blokada şəraitində yaşayan Ermənistan yeni ildən tam təcrid halına gələ bilər. Buna səbəb bu ölkənin dəniz yolu ilə yük daşınmasına bel bağladığı Qafqaz-Poti-Qafqaz bərə reyslərinin dayandırılmasıdır.
Məsələ ondadır ki, “Cənubi Qafqaz Dəmiryolları” QSC 2018-ci ilin 1 dekabrından etibarən müvəqqəti olaraq Qafqaz-Poti-Qafqaz istiqamətində bərə ilə daşımaları dayandıracaq. Ancaq xəttin nə zaman açılacağı məlum deyil.
Qeyd edək ki, növbəti ilin yanvarından etibarən Gürcüstandan Ermənistana yerüstü vasitələrlə taxıl daşınması qadağan olunacaq. Gürcüstan bu barədə planını oktyabr ayında açıqlayıb. Tiflis eyni qadağanın bərə və dəmir yoluna aid etmək məsələsini də nəzərdən keçirdiyini bildirmişdi.
Maraqlı məqam odur ki, QSC-nin bu addımı növbədənkənar parlament seçkisi və Ermənistan Nəqliyyat Nazirliyi, “Cənubi Qafqaz Dəmiryolları” QSC və Gürcüstan Dəmiryolları İdarəsi arasında əldə olunan razılaşma ərəfəsinə düşür. Belə ki, bu razılaşmaya əsasən, Poti limanından Ermənistana yükdaşımalar üçün tariflərin 52 faiz endirilməsi nəzərdə tutulmuşdu.
Bəzi mənbələr isə “Cənubi Qafqaz Dəmiryolları” QSC-nin bu addımı Ermənistan hökumətinin ona qarşı təzyiqlərinə cavab olaraq atdığını bildiriblər. Belə ki, Paşinyan hakimiyyətə gəldikdən sonra QSC-də geniş yoxlamalar keçirmək üçün imkanlar yaradıb. “Rusiya Dəmiryolları”nın törəmə şirkəti olan “Cənubi Qafqaz Dəmiryolları” hətta vergi pozuntularına yol verməkdə də ittiham olunub. Üstəlik, şirkət hazırkı qərarını qəbul etməzdən az öncə Ermənistan İctimai Xidmətin Tənzimlənməsi Komissiyası tərəfindən 60 min dollar cərimə edilib.
Bütün hallarda, Gürcüstanın məlum qərarı Ermənistana necə təsir edəcək?
Sözügedən məsələ ilə bağlı fikirlərini “Bakı-Xəbər”lə bölüşən AMİP funksioneri Əli Orucovun sözlərinə görə, Ermənistan hakimiyyətinin yürütdüyü işğalçılıq və terror siyasəti uzun illərdir bu ölkəni təcrid vəziyyətinə salıb: “Bu təkcə iqtisadi, ticari və kommunikasiya sahəsində deyil, siyasi cəhətdən də özünü göstərməkdədir. Əvvəllər Ermənistan İran və Gürcüstan vasitəsilə müəyyən daşımaları həyata keçirə bilirdı. Lakin İrana qarşı tətbiq edilən sanksiyalar, ermənilərin Gürcüstana irəli sürdüyü ərazi iddialara görə rəsmi Tiflisin də münasibətlərinin bir qədər soyuması səbəbindən həmin imkanlar da qapadılmaqdadır. Paşinyanın hakimiyyətə gəlişindən sonra Kreml də artıq Ermənistana daha əvvəlki kimi dəstək olmağa həvəs göstərmir. Hətta təzyiqləri də sezmək mümkündür. Dekabr ayının 1-dən Qafqaz-Poti-Qafqaz xətti üzrə bərə yolunun bağlanması isə Ermənistanı daha ağır duruma sala bilər. Çünki xarici aləmlə iqtisadi əlaqələrin qurulması, müxtəlif təyinatlı məhsulların Ermənistana gətirilməsi məhz həmin limanla həyata keçirilirdi. Xüsusən də taxıl da daxil olmaqla, ərzaq məhsullarının daşınması bu limandan dayandırılarsa, o zaman ciddi problemlər ortaya çıxa bilər. Bu isə Ermənistanı aclıq və digər fəlakətlə üz-üzə qoya bilər. Bunları görən Paşinyan hələ də xalqına iqtisadi siçrayışlar barədə yalan vədlər verməkdə, onlara yaxşı gələcək gün haqqında moizələr oxumaqdadır. Halbuki, liman dayanarsa, İran kömək etməsə, Ermənistanda gündəlik tələbat məhsullarını əldə etmək müşkülə çevriləcək”.
Vidadi ORDAHALLI
