Qabil Hüseynli: “Müxalifət indiki şəkildə birliyini qoruyub saxlasa və birgə hərəkət etsə, müəyyən nəticələri ola bilər”
Gürcüstanın Mərkəzi Seçki Komissiyası (MSK) ölkədə keçirilən prezident seçkilərinin ikinci turunun yekun nəticəsini açıqlayıb. Seçki bülletenlərinin 100 faizinin sayılmasından sonra müstəqil namizəd Salome Zurabişvili səslərin 59,52%-ni, müxalif namizəd Qriqol Vaşadze isə 40,48%-ni toplayıb.
Bununla da Gürcüstanın keçmiş xarici işlər naziri, hakim “Gürcüstan arzusu” partiyasının dəstəklədiyi müstəqil namizəd Salome Zurabişvili növbəti 6 ildə Gürcüstanın ilk qadın prezidenti seçilib. Qeyd edək ki, bu prezident seçkisi Gürcüstanda keçiriləcək sonuncu ümummilli prezident seçkisidir. 2024-cü ildən etibarən prezidenti artıq 300 nəfərdən ibarət seçki kollegiyası seçəcək. Yeni seçilən prezidentin andiçmə mərasimindən sonra qüvvəyə minəcək yeni konstitusiya hökumətin birdəfəlik parlament modelinə keçidini nəzərdə tutur. Beləliklə, yeni konstitusiyaya görə, prezidentin səlahiyyətləri məhdudlaşdıralacaq. Seçkinin nəticələri ilə bağlı müzakirələr davam edir və müxtəlif rəylər səslənir. Məlum olduğu kimi, məğlub namizəd həm də Gürcüstanın eks-prezidenti Mixeil Saakaşvilinin təmsilçisi kimi tanınırdı. Qeyd edək ki, Saakaşvili seçkilərin saxtakarlıqla keçdiyini bəyan edib və xalqı küçələrə çıxıb kütləvi itaətsizlik etməyə çağırıb. Gürcüstandakı seçkinin nəticələrini və gələcəkdə baş verə biləcək prosesləri necə dəyərləndirmək olar?
Politoloq Qabil Hüseynlinin sözlərinə görə, Gürcüstandakı prezident seçkilərinin nəticələri gözlənilməz oldu: “Buna səbəb seçici səslərinin kütləvi şəkildə satın alınmasıdır. İkinci tur öncəsi 600 min adamın banklara olan borcunun ödənilməsi haqqında öhdəlik müqaviləsi bağlandı. Buna təminatı Bidzina İvanaşvili öz üzərinə götürdü. Eyni zamanda, həmin şəxslərlə seçkidə kimə səs verəcəkləri ilə bağlı müqavilə bağlandı və onlara nəzarət olundu. Bu baxımdan seçkinin Seçki Məcəlləsinin tələblərinə uyğun və düzgün keçirildiyini zənn etmirəm. Ümumi görüntü ondan ibarətdir ki, seçki prosesi beynəlxalq standartlara zidd formada keçirilib. Prosesdə puldan, oğru dünyasının adamlarından istifadə edilib. Təhdid yolu ilə insanların müəyyən namizədə səs verməyə vadar edilməsi halları müşahidə olunub. Həmçinin, seçki zamanı karusel, bülletenlərin topa-topa sandığa atılması hallarının olduğunu qeyd edirlər”. Qabil Hüseynlinin Saakaşvilinin tərəfdarlarını küçələrə səsləməsi məsələsinə münasibəti belə oldu: “Ehtimal etmirəm ki, bu, hansısa ciddi nəticələr versin. Amma müxalifət indiki şəkildə birliyini qoruyub saxlasa və birgə hərəkət etsə, müəyyən nəticələri ola bilər. Yox, yenə də pərakəndəlik, bir-birinə qarşılıqlı ittihamlar yolu tutsalar, çətin ki, hədəflərə çatılsın. Gürcüstanda prezidentin səlahiyyətləri azdır. Ona görə də hesab edirəm ki, Azərbaycanla münasibətlər dəyişməyəcək. Gürcüstan bir çox sahədə Azərbaycandan asılı ölkədir. Azərbaycanın Gürcüstan üçün çox böyük əhəmiyyəti var. Gürcüstan bu münasibətləri sadəcə qorunmağa və daha da inkişaf etdirməyə möhtacdır. İki ölkə arasında münasibətlər indiyə qədər normal olub. Hazırkı səviyyədə qalmasının Azərbaycan üçün əhəmiyyətli olacağı qənaətindəyəm”.
Məhəmmədəli QƏRİBLİ
