Elşən Həsənov: “Erməni əsirlər və onların doğmaları Azərbaycanın mövqeyini dəstəkləyirlər”
Bir neçə gün əvvəl Azərbaycan Respublikası Əsir və itkin düşmüş, girov götürülmüş vətəndaşlarla əlaqədar Dövlət Komissiyası erməni hərbi qulluqçusu Armen Eduardoviç Baqdasaryanın müraciətini yaymışdı.
Xatırladaq ki, 24 yaşlı A.Baqdasaryan 26 dekabr 2014-cü ildə Azərbaycan hərbi qulluqçuları tərəfindən Ağdam rayonu ərazisində - qoşunların qarşıdurma xəttində diversiyaya cəhd vaxtı saxlanmışdı. Sonra Ağır Cinayətlər üzrə Gəncə Şəhər Məhkəməsinin qərarı ilə hərbi əsir 15 il müddətinə azadlıqdan məhrum edildi. Bunun ardınca A.Baqdasaryanın Azərbaycan KİV-inə müsahibəsi yayılıb. Erməni əsir verdiyi müsahibədə Nikol Paşinyanı onların taleyinə biganə olmaqda günahlandırıb. O, həmçinin, bildirib ki, Ermənistan hakimiyyəti əsirlərin regional mənsubiyyətinə görə də onlara fərq qoyur və əslən Dağlıq Qarabağdan olanlarla ciddi maraqlanmır: “...Ona görə ki, digərləri Ermənistan ərazisində doğulublar, mən isə keçmiş DQMV-nin paytaxtı Stepanakertdə - indiki Xankəndidə. Ermənistan üçün qarabağlıların heç bir dəyəri yoxdur, biz onlar üçün “Qarabağ eşşəkləriyik”. Əgər Ermənistan məni bu respublikanın vətəndaşı hesab edirsə, onda erməni tərəfi Azərbaycanın müraciətinə müsbət cavab verməli idi.
2016-cı ildən Azərbaycan tərəfi bütün hərbi əsirlərin və girovların “hamının-hamıya” prinsipi üzrə azad edilməsi təşəbbüsü ilə çıxış edir. O zaman “Qarabağ klanı”na rəhbərlik edən Serj Sarkisyan hakimiyyətdə idi. Necə deyərlər, həbsxana insanı dözümlülüyə öyrədir və bu səbəbdən mən səbrlə gözləyirdim. İndi, S.Sarkisyan və komandasının devrildiyi vaxtda mən səlahiyyətli orqanlara mənə kömək göstərilməsi və N.Paşinyana xahişlə müraciət etməyim üçün buraya KİV nümayəndələrinin dəvət edilməsi barədə müraciət etməyə qərar verdim. Əslində, Azərbaycan tərəfi bu müraciəti göndərmək məcburiyyətində deyildi, axı mən onların - Ermənistanda iyirmi ildən çoxdur təcavüzkar ölkə və humanizm göstərməyən tərəf kimi qələmə verilən Azərbaycanın düşməni idim. Əsl həqiqətdə isə Azərbaycan tərəfi mənə qarşı humanizm nümayiş etdirir. Bəs erməni tərəfinin humanizmi harada qaldı? Bunu mənə kim izah edə bilər?”
Göründüyü kimi, erməni əsir Ermənistan hakimiyyətini və xüsusilə də Paşinyanı əslən Qarabağdan olan erməni vətəndaşlarına biganə yanaşmaqda ittiham edib. Onun fikirlərini nə dərəcədə əsaslı saymaq olar?
Ekspert Elşən Həsənov qəzetimizə bildirdi ki, Ermənistanda hər zaman regional münasibətlər gərgin olub: “Həmin ölkə daim mafioz klanlar tərəfindən idarə edilib. Onlarla Dağlıq Qarabağ əsilli ermənilər arasında daim ziddiyyət olub. Ermənistan müstəqillik qazanandan sonra onun idarəçiliyini uzun müddət “Qarabağ klanı” həyata keçirdi. Paşinyanın etdiyi inqilabdan sonra həmin klan hakimiyyətdən salınıb. Hazırda hakimiyyəti yerli ermənilər ələ alıb. Bu baxımdan da əsirin yanaşmasında həqiqət notları sezilə bilər. Amma bunun tam belə olduğunu da söyləyə bilmərik. Çünki ortada məntiq var. Həmin məntiq bizə deyir ki, Ermənistanın bütün hakimiyyətləri öz əsirlərinə və vətəndaşlarına qarşı laqeyddirlər. Müraciəti edən əsir 2014-cü ildən buradadır. Həmin vaxt Ermənistana Sarkisyan rəhbərlik edirdi. Yəni onun yerlisi. Axı onlar da əsirlərin dəyişdirilməsində maraqlı olmayıblar. Bu nəticəyə gəlirik ki, Ermənistanın heç bir hakimiyyətini öz vətəndaşlarının taleyi maraqlandırmayıb. Onlar heç azad vətəndaşlarının da taleyi ilə dərindən maraqlanmırlar. Yalnız var-dövlət və hakimiyyət uğrunda vuruşurlar. Belə olmasaydı, Ermənistan əhalisinin böyük hissəsi ölkəni tərk edib xaricə getməzdi. Bütün bunlara rəğmən, ortada bir mənzərə var. Erməni əsirlər və onların doğmaları Azərbaycanın mövqeyini dəstəkləyirlər. Öz ölkələrinin rəhbərliyindən tələb edirlər ki, əsirlərin dəyişdirilməsi Azərbaycanın irəli sürdüyü təklif əsasında “hamının-hamıya” prinsipi ilə həyata keçirilsin. Mənə elə gəlir ki, bu məsələ Paşinyan üçün əsl başağrısna çevrilə bilər. Yəqin ki, seçkilərdən sonra ondan daha konkret addım atmaq tələb ediləcək. Çünki onun irəli sürdüyü arqumentlər Ermənistan ictimaiyyətini qane edəcək gücdə və təsirdə deyil. Erməni əsirlərin etdikləri müraciətlər də onların ictimaiyyəti üçün təsirsiz ötüşməyəcək”.
Məhəmmədəli QƏRİBLİ
