Məhəmməd Əsədullazadə: “İşğalçı və regionda destruktiv siyasət aparan bu ölkənin təşkilat çərçivəsində səmimi dostluğu mümkün deyil”
Məlum olduğu kimi, İrəvanda keçirilən Qara Dəniz İqtisadi Əməkdaşlıq Təşkilatının (QDİƏT) Parlament Assambleyasının 52-ci iclası çərçivəsində eyni anda təşkilata üzv olan 4 ölkənin nümayəndələri QDİƏT-in yaradılmasının 25 illiyi münasibətilə Ermənistanın təltif etdiyi yubiley medallarından imtina ediblər.
Belə ki, Parlament Assambleyasının ermənistanlı sədri Ara Babloyan iclasın açılış çıxışından sonra bütün üzv dövlətlərin təşkilatdakı milli nümayəndələrinin təltif olunduqlarını bəyan edib. Lakin Babloyanın çıxışından dərhal sonra Gürcüstan, Azərbaycan, Türkiyə və Ukrayna nümayəndələri medallardan imtina ediblər.
Azərbaycan nümayəndə heyətinin sədri Eldar Quliyev bildirib ki, bu postda qısa müddətdir olduğundan, vicdanı bu cür mükafatı qəbul etməyi rəva bilmir. E.Quliyev, eyni zamanda, qeyd edib ki, məsələ siyasətlə bağlı deyil və İrəvanda bunu yaxşı anlayırlar.
Gürcüstan nümayəndə heyətinin üzvü (iclasda heyətin sədri iştirak etmirdi) vurğulayıb ki, nümayəndəliyin sədri bu mükafatı qəbul etməkdən imtina edir və səbəbinin müzakirə olunmamasını xahiş edir. Türkiyə nümayəndə heyətinin sədri də vurğulayıb ki, medalı qəbul etmək şərəfinə malik deyil. Ukrayna nümayəndə heyətinin sədri Çubarov da gürcüstanlı həmkarı kimi İrəvandakı iclasa gəlməyib və yazılı formada medaldan imtina edib.
Bu cür münasibətdən pərt olmuş Babloyan məcburən xatırladıb ki, mükafatlar təkcə sədrlərə yox, həm də əsrin dörddə birini təşkilatda vicdanla işləyən nümayəndə heyətlərinə şamil olunur. Lakin QDİƏT Parlament Assambleyasının Azərbaycandan olan baş katibi Asəf Hacıyev vurğulayıb ki, yaranmış vəziyyəti faciəyə çevirməyə ehtiyac yoxdur. O, həmçinin, qeyd edib ki, Türkiyə nümayəndə heyətinin sədri hələ heç təsdiq olunmayıb.
Ermənistanın uzun illərdir ölkəmizə qarşı işğalçılıq siyasəti apardığını nəzərə alsaq, Azərbaycan nümayəndə heyətinin qərarı tamamilə doğru yanaşmadır. Maraqlıdır, bəs ekspertlər bunu necə dəyərləndirirlər?
Məsələyə münasibət bildirən politoloq Məhəmməd Əsədullazadə buna bir neçə aspektdən yanaşdı: “Qara Dəniz İqtisadi Əməkdaşlıq Təşkilatı region ölkələrinin siyasi-iqtisadi əməkdaşlığını özündə ehtiva edən təşkilatdır. Bu təşkilatda əsas dominant ölkənin Türkiyə olması şübhəsizdir. Sözügedən təşkilat çərçivəsində ölkəmiz Qara dəniz regionu ölkələri ilə sıx əməkdaşlıq edir. Həm iqtisadi, həm də siyasi əməkdaşlıq yüksək səviyyədə saxlanır. Bu təşkilatın üzvü olan Ermənistan təbii ki, ölkəmizin əməkdaşlıq siyahısında deyil. İşğalçı və regionda destruktiv siyasət aparan bu ölkənin təşkilat çərçivəsində səmimi dostluğu mümkün deyil. Türkiyəyə ərazi iddiası irəli sürən, Azərbaycanın 20 faiz ərazilərini işğalda saxlayan bir ölkə ilə təşkilat çərçivəsində əməkdaşlıq mümkün deyil. Ona görə də bu ölkənin medalının qəbul edilməməsi Azərbaycanın prinsipiallığının göstəricisidir. Ümumuiyyətlə, ölkəmizin məhz İrəvanda Ermənistanın işğalçı siyasətinə etiraz olaraq bu medalı qəbul etməməsi Azərbaycanın milli siyasətinin nəticəsidir. Hesab edirəm ki, Ermənistana bu kimi etirazlar mütləq şəkildə bütün təşkilatlarda edilməlidir. Bu gün ölkəmizin regionda artan nüfuzu, siyasi-iqtisadi gücü Ermənistanı izolyasiya edir”.
Vidadi ORDAHALLI
