Xəzər Teyyublu: “Bununla Paşinyan beynəlxalq ictimaiyyətə çatdırmaq istəyir ki, Qarabağ məsələsində güzəştdən söhbət gedə bilməz”
Ermənistanda seçkiqabağı mühit çox gərgindir. Parlamentdə daha çox yer qazanmaq uğrunda aparılan mübarizədə Qarabağ kartından istifadəyə çalışılır. Opponentlər bir-birinə qarşı Dağlıq Qarabağ mövzusunda ittihamlar səsləndirirlər.
Ermənistan Respublikaçılar Partiyasının proporsional siyahısında yer almış David Şahnazaryan jurnalistlərə bildirib ki, Nikol Paşinyan Qarabağ məsələsi üzrə güzəştlər hesabına xaricdən legitimlik dəstəyi almağa səy göstərəcək. Əvvəllər Şahnazaryan və hazırkı baş nazirin vəzifələrini icra edən Nikol Paşinyan müxalifət barrikadalarının eyni tərəfində idilər. Hazırda Şahnazaryan əvvəllər tənqid etdiyi ERP-in siyahısındadır və Paşinyanın ən sərt tənqidçilərindən biridir. Paşinyanın silahdaşı - Qarabağ müharibəsi “veteranı” Sasun Mikaelyanın qalmaqallı bəyanatını şərh edərkən Şahnazaryan ehtimal edib ki, bununla hakimiyyət Qarabağ məsələsində güzəştlər üçün zəmin hazırlayır. Bu halda, Mikaelyanın sözləri “torpağın möhkəmliyini yoxlamaq” cəhdidir.
O hesab edir ki, Paşinyan Qarabağ məsələsi üzrə güzəştlər hesabına xaricdən legitimlik dəstəyi almağa səy göstərəcək: “Orduya məqsədyönlü hücumlar, onu gözdən salmaq cəhdləri də elə bu qəbildəndir. Zabitlərin həbsi, hərbçilərə qarşı çoxsaylı cinayət işləri silahlı qüvvələrin obrazının qaralanmasına yönəldilib”.
D.Şahnazaryan, eyni zamanda, hakimiyyəti amnistiya qərarına görə tənqid edib. Xatırladaq ki, həmin qərarla “Sosna tsrer” silahlı qruplaşmasının üzvləri azadlığa çıxıb və hazırda partiya yaradıblar. Şahnazaryanın fikrincə, bu qrupun üzvlərinin atəş açdığı polis əməkdaşları üçün bundan böyük rəzaləti düşünmək çətindir.
Qeyd edək ki, daha öncə seçkiqabağı mitinqdə S.Mikaelyan bildirib ki, apreldə baş vermiş “məxməri inqilab” Qarabağ müharibəsində qazanılmış qələbədən daha vacibdir. Bu çıxışdan sonra Paşinyan etiraf edib ki, ifadə uğursuz formalaşdırılıb və üzr istəməyə hazırdır. Bütün bu yaşananlar Ermənistan siyasi elitasında Dağlıq Qarabağla bağlı kəskin fikir ayrılığının mövcudluğunun göstəricisi sayıla bilərmi?
Klassik Xalq Cəbhəsi Partiyasının funksioneri Xəzər Teyyublunun fikirincə, Paşinyanın Qarabağı Azərbaycana qaytaracağı ilə bağlı səslənən iddialar inandırıcı görünmür: “Başa düşürük ki, orada ölkə üçün mühüm seçkilərin keçirilməsi gözlənir. Yəni qalib gələn qüvvə ölkənin hakimiyyəti olacaq. Bu səbəbdən də belə populist fikirlər səslənir. Xüsusilə də Dağlıq Qarabağ mövzusu ora üçün də həssas olduğundan, bu cür fikirləri qarşılıqlı olaraq eşidirik. Paşinyanın hakimiyyətə gələndən sonrakı davranışları heç də onun Qarabağ məsələsində asanlıqla güzəştə gedə biləcəyini deməyə əsas vermir. Ancaq belə bir güzəştin olacağını da ümumiyyətlə istisna etmək olmaz. Bunun mümkünlüyü yalnız Azərbaycanın və beynəlxalq qüvvələrin təzyiqi ilə baş tuta bilər. Biz Paşinyanın danışıqlarında, bəyanatlarında Dağlıq Qarabağla bağlı sələflərindən heç də geri qalmayan ritorikaya rast gəlirik. Ancaq Dağlıq Qarabağ mövzusunda onların siyasi qüvvələri arasında kəskin fikir ayrılığının mövcudluğunu görürük. Paşinyanın silahdaşlarından birinin “məxməri inqilab”ın Qarabağ müharibəsində qazanılmış qələbədən daha vacibdir deməsi böyük rezonans doğurdu. Hətta Paşinyan həmin fikrə görə üzrxahlıq etməyə hazır olduğunu da dedi. Ancaq mən düşünmürəm ki, həmin fikirlər təsadüfən və ya bilməyərəkdən səslənib. Bu elə Paşinyanın öz mətbəxində hazırlanıb. Bununla Paşinyan beynəlxalq ictimaiyyətə çatdırmaq istəyir ki, Qarabağ məsələsində güzəştdən söhbət gedə bilməz. İşarə ilə deyir ki, bir sözə belə reaksiya verilirsə, dalını özünüz fikirləşin. Hesab edirəm ki, Ermənistan daxili mühitində Dağlıq Qarabağla bağlı olan fikir ayrılığı bizim üçün yaxşı heç nə vəd etmir. Əksinə, hakimiyyətə daha radikal və millətçi qüvvələr gələcək ki, onlarla da bu məsələni müzakirə etmək daha da qəlizləşəcək. Bir terror təşkilatı elan olunan “Sosna tsrer” hakimiyyətin astanasında dayanıbsa, hansı güzəştlərdən danışa bilərik?”.
Məhəmmədəli QƏRİBLİ
