Vüqar Qədirov: “Paşinyanın bu iradına hələ bir müddət əvvəl KTMT səviyyəsində də aydınlıq gətirilib”
Ermənistanda baş nazir səlahiyyətlərini icra edən Nikol Paşinyan yenidən öz müttəfiqlərini hədəfə alıb. Ermənistan mətbuatının verdiyi məlumata görə, Nikol Paşinyan növbədənkənar parlament seçkiləri çərçivəsində “Mənim addımım” blokunun Vanadzordakı təşviqat kampaniyasında çıxışı zamanı deyib ki, hazırda Kollektiv Təhlükəsizlik Müqaviləsi Təşkilatında (KTMT) üzv dövlətlər arasındakı müttəfiqlik münasibətlərinin dəqiqləşdirilməsi ətrafında şiddətli mühakimələr gedir.
Onun sözlərinə görə, bundan sonra İrəvanın həyata keçirərəcəyi xarici siyasətin mahiyyəti müttəfiqlərinin etibarlılığından asılı olacaq. Bu mənada, Paşinyan Ermənistanın KTMT-dəki müttəfiqlərinin (Rusiya, Belarus) Azərbaycanla hərbi əməkdaşlığını ciddi tənqid edib. “Siz bilirsinizmi ki, KTMT-nin bizə (Ermənistana) qarşı və bizim təşkilat qarşısındakı öhdəliklərimiz nədir? Bizə aydın deyil ki, niyə müttəfiqlərimiz düşmən münasibətdə olduğumuz ölkəyə silah satırlar? Bu qəbuledilməzdir və ciddi çağırışdır! Biz öz tərəfdaşlarımızla bu məsələni birbaşa və açıq şəkildə müzakirə etmək fikrindəyik ki, sonra özümüz də necə davranacağımızı bilək. Bilək ki, kimə güvənmək olar, kimə yox”. Göründüyü kimi, Paşinyan öz müttəfiqlərinin Azərbaycana silah satmasından dərin narahatlıq keçirir. Hətta bununla bağlı onları hədələyir də. Bundan əvvəl də Ermənistanın anoloji gileyləri olub, lakin heç bir nəticə verməyib. Paşinyanın Rusiya və Belarusa Azərbaycana silah satmaqla bağlı etdiyi hədə-qorxunun bir faydası ola bilərmi?
Ekspert Vüqar Qədirov qəzetimizə açıqlamasında bildirdi ki, bu, Paşinyanın ilk blefi deyil: “O bundan əvvəl də belə bleflər etmişdi. Hətta Paşinyandan əvvəl də bu mövzuya Putinlə olan mətbuat konfransında bir erməni jurnalist toxundu və Rusiya Prezidentinə sual verdi ki, Moskva Azərbaycana niyə silah satır? Həmin vaxt Putin məsələyə konkret cavab verdi ki, müasir silah bazarında istənilən ölkə praktiki olaraq hər bir silahı ala bilər. Daha dəqiq ifadə etsək, Putin demişdi ki, Azərbaycan kimi zəngin ölkə haradan istəsə, arzuladığı silahı almaq iqtidarındadır. Bundan əlavə, indiki embarqo şəraitində Rusiya bu yolla valyuta əldə etməyi düşünür. Azərbaycan isə onun üçün gözəl müştəridir. Çünki biz müharibə şəraitində yaşadığımız üçün silah tədarükünə böyük ehtiyacımız var. Bu, Rusiyanın daxili işidir və heç kim buna qarışa bilməz. Yadınızdadırsa, hakimiyyətə gəlişinin ilk anlarında Paşinyan Lukaşenko ilə də bu mövzunu müzakirə etdiyini bildirmişdi. Paşinyanın təcrübəsiz siyasətçi olduğu burdan bilinir. O anlamalıdır ki, silah satışı ilə bağlı məsələ ölkələr arasında razılaşdırılır, sonra bu barədə müqavilə bağlanır. Yəni onu bir ayaqüstü söhbətdə və ya hansısa mitinqdə edilən çıxışla ləğv etmək mümkün deyil. Paşinyan xalqa çoxlu vəd verərək hakimiyyətə gəlib. İndi həmin vədləri həyata keçirə bilmir. Xalq isə ondan tələb edir. Buna görə də o, bəzi lazımsız bəyantlarla diqqəti həmin məsələlərdən yayındırmaq istəyir. Xüsusilə də seçkiqabağı təbliğatda belə amillərlə manipulyasiya edir. Bilirsiniz ki, dünyada silah bazarı genişdir. Azərbaycanın məhz Rusiyadan silah almağa üstünlük verməsini şərtləndirən amillərdən biri də Moskvanın bəzi maraqlarını neytrallaşdırmağa hesablanıb. Onsuz da Rusiya ən müasir silahları Ermənistana hədiyyə edir. Bizə isə çox da keyfiyyətli olmayan silahlarını satır. Tutaq ki, Rusiya bizə silah satmasa nə olacaq ki? Əlimizdə olan valyuta ilə istənilən ölkədən silah ala bilərik. Paşinyan Dağlıq Qarabağ məsələsində olduqca sərt mövqe nümayiş etdirir. Əslində, silah satışını gündəmə gətirməklə o həm də Rusiyanı təhdid edir. Azərbaycanın silahlandırılması məsələsində Rusiyanın rolunu önə çəkməklə Rusiyaya qarşı narazılığını əsaslandırmağa çalışır”.
Ekspertin sözlərinə görə, Paşinyanın bu iradına hələ bir müddət əvvəl KTMT səviyyəsində də aydınlıq gətirilib. Kollektiv Təhlükəsizlik Müqaviləsi Təşkilatının sabiq baş katibi Nikolay Bordyuja erməni jurnalistin “Rusiyanın Azərbaycana silah satmasından KTMT nə dərəcədə narahatdır?” sualını cavablandırarkən demişdi ki, Rusiya tərəfindən Azərbaycana silah-sursat satılarkən paritetin qorunması nəzərə alınır, Azərbaycana satılan silahlarla yanaşı, Ermənistana da lazımi qədər silah-sursat göndərilir və satılır: “Bütün bu deyilənlər bir daha sübut edir ki, Paşinyan məntiq xatirinə deyil, populizmə meyllənərək danışır”.
Məhəmmədəli QƏRİBLİ
