Əli Orucov: “Onun seçki təbliğatında əsas yerlərdən birini tutan iqtisadi inkişafla bağlı planları ilk baxışdan qeyri-ciddiliyini açıq şəkildə göstərir”
Ermənistanın baş naziri səlahiyyətlərinin icraçısı Nikol Paşinyan əvvəlcədən dediyi kimi, növbədənkənar parlament seçkilərində hərtərəfli iştirakını təmin etmək üçün məzuniyyət götürdükdən sonra noyabrın 26-dan etibarən təşviqat kampaniyasına start verib.
Erməni KİV-ləri xəbər verirlər ki, rəhbəri olduğu “Mənim addımım” blokunun qələbəsi üçün tərəfdarlarını yenidən küçələrə tökən Paşinyan Araqaçotn əyalətinin Talin şəhərindən seçkiqabağı təşviqat aksiyalarına başlayıb. Paşinyan daha sonra kampaniyanı Maralik və Gümrüdə davam etdirəcəklərini bildirib.
Lakin təşviqat kampaniyasında Paşinyanın çıxışını gülməli edən məqam onun deputatlara yox, özü üçün səs istəməsi olub. O hətta pafoslu sözlərindən də geri qalmayıb: “Xalqın qərarı ilə baş nazir olacağam və xalq mənə etibar etdiyi müddətcə bu postda qalacağam. Əvvəllər sizin səs verdiklərinizin əvəzinə başqaları seçilirdi. Buna görə də Ermənistanda inqilab oldu”.
Paşinyan yenidən erməni xalqına pafoslu vədlər verməyə başlayıb. Bu dəfə o, fantaziyalarında daha da irəli gedərək gələcəkdə məsuliyyətindən asanlıqla boyun qaçıra bilməyəcəyi çox utopik və Ermənistan reallıqları ilə ziddiyyət təşkil edən vədlər verib. Onun sözlərinə görə, gələn il ölkə iqtisadiyyatında sıçrayış gözlənir: “2019-cu ildə Ermənistanda iqtisadi möcüzə olacaq. Əgər hər şey yaxşı getsə, onda 2019-cu ildə iqtisadi inkişafda ani sıçrayış gözlənir, iqtisadiyyatımızın strukturu dəyişəcək. Kiçik sahibkarlıq vergilərdən tamamilə azad ediləcək. Həmçinin, taksi sürücüləri də vergilərdən azad olunacaqlar”.
Məlumat üçün qeyd edək ki, parlamentə seçilmək üçün siyasi partiyaların öz platformalarını bəyan edəcəkləri kampaniya 12 gün davam edəcək. 9 dekabrda isə Ermənistanda növbədənkənar parlament seçkiləri keçiriləcək.
Paşinyanın seçkidə qalib gələcəyi ehtimalı böyükdür. Ən azından, onun ölkədə yaratdığı birtərəfli siyasi konyuktura bu qənaətə gəlməyə əsas verir. Ancaq onun ölkə iqtisadiyyatının güclü inkişaf edəcəyi ilə bağlı verdiyi vədlər isə reallığı əks etdirmir.
Maraqlıdır, bəs ekspertlər Paşinyanın populist vədlərini necə dəyərləndirirlər?
Məsələyə münasibət bildirən AMİP funksioneri Əli Orucovun sözlərinə görə, Paşinyan sadəcə ictimaiyyəti aldadaraq bununla daha çox səs almağa çalışır: “Paşinyan populist çıxışları ilə erməni cəmiyyətini aldadaraq hakimiyyətə gəlsə də, qısa zaman kəsiyində ona olan inam sürətlə azalmağa başladı. O həm də qeyri-stabil siyasətilə də artıq nüfuzunu itirməkdədir. Lakin ermənilərin müəyyən qismi hələ də elə zənn edir ki, o, Ermənistanı düşdüyü ağır böhrandan çıxarıb, onların güzəranını yaxşılaşdıracaq. Onun seçki təbliğatında əsas yerlərdən birini tutan iqtisadi inkişafla bağlı planları ilk baxışdan qeyri-ciddiliyini açıq şəkildə göstərir. Ermənistanın iqtisadiyyatı əsasən Rusiyadan və erməni diasporundan gələn yardımlardan ibarətdir. Korrupsiya və rüşvətxorluq ölkəni ağuşuna götürüb. Rusiyaya tətbiq olunan beynəlxalq sanksiyalar Ermənistan iqtisadiyyatını da tədricən iflic etməkdədir. İqtisadiyyatın sürətli inkişafı üçün Ermənistanda hansısa imkanlar və yaxud da hansısa potensial yoxdur. Ermənistan Cənubi Qafqazdakı transmilli bütün layihələrdən təcrid olunub. Ölkəyə sərmayə cəlb edəcək resurslar və sahələr yoxdur. Belə bir vəziyyətdə iqtisadi inkişafdan danışmaq əlbəttə ki, gülüncdür. Bu, sadəcə olaraq, erməni xalqını aldatmaq və avantüraya çəkməkdir. Ermənistanın iqtisadi inkişafının tək bircə yolu var, işğalçılıq siyasətindən əl çəkmək. Azərbaycanın işğala məruz qalan ərazilərini öz sahibinə qaytarmaq. Paşinyan bunları edərsə, onda iqtisadi inkişafla bağlı verdiyi vədi yerinə yetirmiş ola bilər”.
Vidadi ORDAHALLI
