Ramil Hüseynov: "Belə olduğu halda, Türkiyənin başqa alternativlərə müraciət etməsi qaçılmaz zərurətə çevrilir"
Son günlər Türkiyə ilə Qərb arasında münasibətlərin kəskinləşməsi açıq şəkildə özünü göstərir. Qərbin Türkiyəyə qarşı qeyri-obyektiv münasibəti artıq adi hala çevrilib. Ancaq əvvəlki illərdən fərqli olaraq rəsmi Ankara bu qeyri-obyektiv münasibəti görməzdən gəlmir.
Əksinə, Türkiyə rəsmiləri Brüsselin istənilən həmləsinə qarşı sərt mövqe ortaya qoyur. Rusiya ilə münasibətlərin yaxşılaşması fonunda "S-400" hava hücumundan müdafiə sisteminin alınması ilə bağlı danışıqların getməsi Qərbdə ciddi qıcıq yaradıb.
Bu baxımdan Avropa Komissiyasının rəhbəri Şultsun Türkiyəyə sanksiya tətbiq edilməsi ilə bağlı hədəsi də cavabsız qalmayıb. Türkiyə prezidenti Ərdoğan ölkəsinin Avropa İttifaqına üzvlüyü ilə bağlı məsələnin referenduma çıxarılmasını təklif edib. Ərdoğanın Avropaya növbəti cavabı Pakistan və Özbəkistan səfərindən qayıdarkən səslənib. Ərdoğan təyyarədə jurnalistlərə verdiyi açıqlamada deyib ki, Türkiyə Şanxay Əməkdaşlıq Təşkilatına üzv olmaqla bağlı məsələyə baxa bilər: "Brekzit" Fransa və İtaliya kimi ölkələrə də yayıla bilər. Belə olan şəraitdə demək olmaz ki, Avropa İttifaqı Türkiyə üçün yeganə variantdır. Niyə görə Türkiyə Şanxay Əməkdaşlıq Təşkilatına üzv olmasın? Mən bu haqda artıq Rusiya prezidenti Putin və Qazaxıstan prezidenti Nazarbayevlə danışmışam. Bu təşkilat bizə daha geniş məkan təqdim edə bilər".
NATO üzvü olan bir ölkənin Rusiya və Çinin geosiyasi maraqlarının təmin olunmasına hesablanan bir təşkilata üzvlüklə bağlı məsələni nəzərdən keçirməsi ciddi siyasi mesaj kimi oxunmalıdır.
Məsələyə münasibət bildirən VİP-in sədr müavini Ramil Hüseynovun sözlərinə görə, yaxın gələcəkdə bunun baş verəcəyi bir qədər real görünmür: "Ola bilsin ki, Ərdoğan bununla siyasi manevr edir. Böyük Britaniyanın Avropa Birliyindən çıxması bu qurumun cəlbediciliyini azaldıb. Təbii ki, AB Türkiyəni öz sıralarına qəbul etsə, qazanacaq. O cümlədən Şanxay Əməkdaşlıq Təşkilatı da bu addımı atsa, qazanacaq. Görünür, bu minvalla Ərdoğan AB-nin Türkiyəyə qarşı olan münasibətini dəyişməyə çalışır. Buna nə dərəcədə nail olacağını isə zaman göstərəcək. Türkiyə ilə Avropa Birliyi arasında ilk saziş 1963-cü ildə imzalanıb. Ankara üzvlüklə bağlı ərizəni 1987-ci ildə təqdim edib. 1999-cu ildə namizəd ölkələr siyahısına salınıb. Üzvlüklə bağlı danışıqlar isə 2005-ci ildə başlayıb. O vaxtdan indiyə qədər tərəflər 35 texniki bənddən, sadəcə, 16-sını razılaşdıra bilib. Ankara təşkilata üzv olmaq üçün həmin bəndlərin hər birini yerinə yetirməlidir. Bu ilin mart ayında tərəflər arasında yeni saziş imzalanıb. Sazişdə Türkiyədən Yunanıstana gizli yolla gedən bütün miqrantların geri qaytarılması, bunun müqabilində AB-nin Türkiyəyə vizasız rejim tətbiq etməsi nəzərdə tutulur. Miqrantlarla bağlı Türkiyəyə 3 milyard dollar yardım edilməsi də sazişdə yer alıb. Ancaq indiyə qədər nə vizasız rejim təmin edilib, nə də vəd olunan yardım. Belə olduğu halda, Türkiyənin başqa alternativlərə müraciət etməsi qaçılmaz zərurətə çevrilir". Vidadi ORDAHALLI
