Qardaş Türkiyədə məlum hərbi çevrilişə cəhddən sonra Qərb ölkələrinin Ankaraya qarşı daha çox ikili standartlardan çıxış etməsi aydın müşahidə olunur. Bu, həm terrora qarşı mübarizədə, həm də Türkiyənin Avropa İttifaqına üzvlük məsələsində özünü qabarıq surətdə büruzə verir.
Belə vəziyyət isə Ankaranın da Qərbə münasibətlərində siyasətinə müəyyən dəyişikliklər etməsinə rəva verir. Türkiyənin baş naziri Binəli Yıldırım da bildirir ki, Avropa İttifaqı Türkiyə və onun düşmənləri arasında seçim etməlidir. Onun sözlərinə görə, Brüssel Ankaranın terror əleyhinə siyasətini dəyişəcəyinə ümid etməməlidir. Baş nazirin bu açıqlamaları Almaniyanın xarici işlər naziri Frank Valter Ştaynmayerin ölkəyə rəsmi səfəri ilə üst-üstə düşüb.
Ştaynmayerin Türkiyə görüşlərində səsləndirdiyi fikirlər isə bir daha Türkiyə ilə Avropa İttifaqı və Almaniya arasında böyük fikir ayrılıqlarının olduğunu üzə çıxarır. Hətta bu fonda birgə mətbuat konfransında Almaniya və Türkiyə xarici işlər nazirləri arasında kəskin söz çəkişməsi olub. Ankarada keçirilən mətbuat konfransında Almaniyanın xarici işlər naziri Türkiyədə FETÖ-çülərin davam edən kütləvi həbsləri və onlara bağlı media qurumları ilə rəftarı kəskin tənqid edib. Bununla belə, nazir deyib ki, Avropa İttifaqı ilə Türkiyə arasında üzvlüyə dair danışıqların dayandırılmasının əleyhinədir və terrorla mübarizədə özünün NATO üzrə müttəfiqini dəstəkləməkdə davam edir. Buna baxmayaraq, elə həmin mətbuat konfransında Türkiyənin xarici işlər naziri Mövlud Çavuşoğlu deyib ki, Ankara Avropa İttifaqına üzvlük məsələsində Brüsselin saymazyana münasibətindən boğaza yığılıb. Çavuşoğlu insan haqlarının vəziyyəti ilə bağlı Türkiyənin ünvanına səsləndirilən tənqidləri qəbul etmədiyini deyib. Ştaynmayer isə bir daha bildirib ki, Türkiyədə kütləvi həbslərin bu gün də dayandırılmaması ciddi narahatlıq doğurur. Çavuşoğlu isə cavabında bir daha deyib ki, Avropa İttifaqı Türkiyəyə ikiüzlü və ikili standartlı münasibətini davam etdirir. Ankaranı narazı salan həm də Almaniyanın terrora bağlı insanların həbsindən belə narahat olmasıdır. Digər tərəfdən bəzi terrorçuların Almaniyada sığınacaq tapması da Ankara tərəfindən xoş qarşılanmır. Ölkə prezidenti Rəcəb Tayyib Ərdoğan bu xüsusda bildirir: "Almaniya işini etibarlı görmür. Terror bumeranq kimi dönüb bir gün Almaniyanı da vuracaq". O, Ştaynmayerin Türkiyəyə səfərini və onunla görüşünü şərh edərək deyib: "Almaniya yanlış oynayır. Qərb hələ də terrora yataq verir. Terrorçuların etdiklərini və onlara verilən dəstəyi görürük. Bir tərəfdən terror qruplaşmasının nümayəndələrinə dözümlə yanaşacaqsınız, digər tərəfdən də terrora qarşı mübarizəni dəstəklədiyinizi deyəcəksiniz. Elə iş olmaz. Bir tərəfdən PKK-ya terrorçu deyirsiniz, digər tərəfdən dolayı, ya birbaşa dəstək verirsiniz. Bu necə dostluq, necə dürüstlükdür? Biz belə bəyanatlardan çox, terrora qarşı mübarizədə əməli fəaliyyətə üstünlük veririk. Almaniyaya terrorla bağlı indiyədək 4 500 dosye təqdim etmişik. Almaniya onlardan yalnız 6-na baxıb". Ərdoğan bildirib ki, Qərb bloku hələ də terrorun başının altına yastıq qoyur. Ərdoğan Avropa Komissiyasının rəsmi Ankaranın vətəndaş cəmiyyəti, insan haqları və söz azadlığı sahələrində apardığı siyasəti tənqid edən bəyanatına da münasibət bildirib. Qeyd edək ki, bəyanatda Türkiyə qanunvericiliyinin Avropa İttifaqı normalarına uyğun olmadığı qeyd edilib. Avropa Parlamentinin rəhbəri Martin Şults isə Türkiyəni müxalifət və jurnalistlərə qarşı siyasəti ilə əlaqədar iqtisadi sanksiyalarla hədələyib. Buna münasibət bildirən Ərdoğan bəyan edib ki, artıq yaranmış vəziyyətdə Türkiyənin Avropa İttifaqına üzv olma məsələsi referenduma çıxarıla bilər: "Qərb deyir ki, biz ölüm hökmünü tətbiq edə bilmərik. Lakin bu xalqın taleyi sizin əlinizdə deyil. Artıq 53 ildir ki, Türkiyəni Avropa İttifaqının qapısında saxlayıblar. Sən, Avropa Parlamentinin rəhbəri, kimsən axı? Siz öz parlamentinizi terror təşkilatlarından təmizləyin, sonra danışarıq. Siz ekstremistlərə kömək edirsiniz, sonra isə Türkiyəni Avropa İttifaqı ilə hədələyirsiniz. Siz gecikmisiniz, gəlin indi hər şeyi həll edək. İlin sonuna qədər gözləyək, sonra yekun qərarın qəbul olunması üçün Türkiyə xalqına müraciət edək". Beləliklə, aydın görünür ki, Qərbin, o cümlədən də Avropa İttifaqının ikili siyasəti Türkiyənin böyük narazılığına səbəb olub. Ankara bu durumda Qərblə əməkdaşlığın davam etdirilməsinin mənasız olduğunu da yaxşı bilir. Bütün bunlar Türkiyənin xarici əlaqələrində yeniliklər edərək onun Rusiya, Çin kimi ölkələrlə daha çox yaxınlaşmasına rəvac verir.
Tahir TAĞIYEV
