Ordusunu modern hərbi texnika ilə təchiz etmək məqsədilə Azərbaycan bu gün dünyanın müxtəlif ölkələri ilə sıx əməkdaşlıq münasibətləri yaradır. Hazırda ölkəmiz Rusiya, İsrail, Belarus, Türkiyə və bir sıra digər ölkələrdən hərbi texnikanın idxalını həyata keçirir və bu, düşmən üzərində Azərbaycanın hərbi üstünlüyünü daha da artırır.
Eyni zamanda bu vəziyyət Azərbaycanın hansısa bir idxalçıdan asılı olmamasına imkan verir. Digər tərəfdən, yerli istehsalın artımı da hərbi müstəvidə Azərbaycanın mövqelərini daha güclü hala gətirir.
Bu arada isə bəlli olub ki, Azərbaycan yaxın müttəfiqlərindən biri sayılan Pakistandan da yeni hərbi texnika alışına hazırlıq görür. Xatırladaq ki, Pakistan Azərbaycanın ən yaxın müttəfiqlərindən biridir. Bu ilin aprelində Qarabağda başlayan döyüşlərdə Pakistan hətta öz ordusunu Azərbaycana köməyə göndərməyə hazır olduğunu bəyan etmişdi. Yeni məlumatlara görə, Pakistanın Ticarət və Müdafiə Sənayesi nazirlikləri Azərbaycana yarım milyard dollarlıq müdafiə təyinatlı məhsulların ixracının tezləşdirilməsinə dair birgə fəaliyyət planını təsdiq ediblər. Qeyd olunur ki, qərar İslamabadda ticarət naziri Hurrəm Dəstigirin və müdafiə sənayesi naziri Rana Tanver Hüseynin iştirakı ilə qəbul olunub. Eləcə də qərara alınıb ki, ticarət naziri qarşılıqlı istisadi-ticarət əlaqələrinin genişləndirilməsinə dair məsələləri müzakirə etmək üçün noryabrın sonlarında Bakıya səfər etsin.
Müdafiə sənayesi naziri Rana Tanver Hüseyn deyib ki, Azərbaycan Pakistandan hərbi texnologiya, silahlar və müdafiə təyinatlı digər məhsullar idxal etmək istəyini bildirib. Xatırladaq ki, Pakistan baş naziri Nəvaz Şərif bu yaxınlarda Bakıda səfərdə olub. Səfər zamanı Azərbaycanın Pakistandan silah və hərbi texnologiyalar almasına dair danışıqlar aparılıb. Danışıqlardan sonra keçirilən mətbuat konfransında Prezident İlham Əliyev bəyan edib ki, Azərbaycan və Pakistan silahlı qüvvələrinin birgə hərbi təlimlərinin keçirilməsi, Pakistandan yüksək texnologiyaya əsaslanan silahların alınması və birgə istehsalı məsələlərində anlaşmalar əldə olunub.
Məlumdur ki, Pakistan Asiya regionunda güclü hərbi sənaye kompleksinə malik ölkələrdən biridir. Bu hərbi-sənaye kompleksi Pakistan ordusunun kiçik atıcı silahlardan tutmuş tanklara və artilleriya vasitələrinə, təyyarələrdən tutmuş ballistik raketlərə, ən müxtəlif döyüş sursatlarına qədər praktiki olaraq bütün ehtiyaclarını ödəyə bilir. Azərbaycan üçün isə Paksitanın uzaqmənzilli raketləri və hərbi təyyarələri daha çox maraq doğurur. Çünki Pakistan 2 min kilometrə qədər mənzilli ballistik raketlərə malikdir. Hazırda bu ölkə qitələrarası ballistik raket istehsalı üzərində işləyir. Azərbaycan Pakistandan 750 kilometrlik mənzilli "Şahin-1" ballistik raketlərini almaqda maraqlı tərəf kimi çıxış edir. Pakistanın hərbi sənayesi Çin texnologiyası əsasında 300 kilometrdən 3000 kilometrədək hədəfləri vura bilən ballistik raketlər istehsal edir. Bunlara "Xətf-1", "Xətf-2", "Xətf-1A", "Xətf-4", "Xətf-9" raketləri daxildir. Bundan əlavə, Pakistan hərbi sənayesi "Babur" və "Raad" qanadlı raketləri, yüksək dəqiqlikli H-2 qanadlı raketi istehsal edir.
Digər cəlbedici sahə isə aviasiyadır. Pakistan Fransa istehsalı olan "Miraj" qırıcılarının təmiri və yığılması müəssisəsini yaradıb. Eləcə də Çinlə birlikdə "JF-17 Thunder" qırıcılarının istehsalını həyata keçirir. Azərbaycan neçə vaxtdır ki, bu təyyarələrə maraq göstərir. Bunu cari ilin əvvəlində ölkəmizdə səfərdə olan Pakistan prezidenti Məmnun Hüseyn də təsdiq etmişdi. İndi istisna deyil ki, "JF-17 Thunder" təyyarələri Azərbaycana satılacaq. Qeyd edək ki, "JF-17 Thunder" qırıcı-bombardmançı təyyarələri Pakistan-Çin birgə istehsalıdır. Təyyarənin Çin versiyası "FC-1 Xiaolong" adlanır. Bu təyyarələri 90-cı illərin sonlarında, 2000-ci illərin əvvəllərində Çinin "Chengdu Aircraft Corporation" şirkəti Pakistanın maliyyə dəstəyi ilə işləyib hazırlayıb. İlk sınaq uçuşlarına 2003-cü ildə başlayıb. Təyyarənin ekipajı 1 pilotdan ibarətdir, uzunluğu 15 metr, qanadlarının eni 9.46 metr, hündürlüyü 4.77 metrdir. "JF-17 Thunder" düşmən radarlarından yayınmağa qadirdir, 6,529 kiloqram ağırlığında döyüş sursatı-orta mənzilli raketlər və lazerlə hədəfə yönləndirilən bombalar daşımağa qadirdir. Təyyarələrdə "hava-hava" və "hava-yer" tipli raketlər quraşdırılır. Həmçinin onun qanadlarının altında 23 və ya 30 millimetrlik avtomatik toplar yer alır. Təyyarə Rusiya istehsalı olan mühərriklə təmin olunub, çünki Çin istehsalçıları hələ etibarlı təyyarə mühərrikləri istehsal edə bilmir. Döyüş qabiliyyətinə görə bu təyyarələr Rusiya istehsalı olan "SU-31" təyyarələri və Fransa istehsalı olan "Miraj" qırıcıları ilə müqayisə olunur. Bu qırıcıların ordumuzun ixtiyarında olması isə düşmən üzərində üstünlüyün daha da artması deməkdir.
Tahir TAĞIYEV
