Oktyabrın 23-də Avropa Şurasının İnsan Hüquqları üzrə komissarı Dunya Miyatoviç Bakıda Qərbi Azərbaycan İcması təşkilatının nümayəndələri ilə görüşdə qaçqınların, o cümlədən Ermənistandan qovulmuş azərbaycanlıların qayıdış hüququnun əhəmiyyətini başa düşdüyünü qeyd edib və bu məsələnin həllinin siyasi iradə tələb etdiyini bildirib.
Miyatoviçin Qərbi azərbaycanlılara dəstək verməsi neçə gündür ki, erməni mediasında geniş şəkildə müzakirə edilir, onlar adətən erməniyönlü kommisarın Bakıda məlum ifadəni işlətməsini heç cür ona bağışlamaq istəmirlər.
Bakıda olarkən Miyatoviçə Qərbi azərbaycanlıların indiki Ermənistan ərazisindən qovulması, deportasiya edilməsi faktının çatırılmasını həzm edə bilməyən “Qolos Armeniya” hədyanlar yazıb. Hətta mətbuat orqanı Myatoviçin belə bir fikir söylədiyinə şübhə ilə yanaşır, zənn edirlər ki, xanım komissar bu sözü “işlədə bilməz”, yaxud “işlətməməlidir”.
“Əgər komissar həqiqətən də bunu deyibsə, onda o, açıq şəkildə bu məsələdə Ermənistan rəhbərliyindən “siyasi iradə” gözləyir”. Erməni mətbuatı Miyatoviçi məsələyə birtərəfli yanaşmaqda suçlayır və iddia edirlər ki, guya 1987-1990-cı illərdə Azərbaycandan 470 min erməni” “zorla qovulub” və Miyatoviç onlardan da danışmalı idi. “...komissarı 470 min erməninin hüquqları barədə bir söz deməməkdə ittiham etmək olar”-deyə media yazıb. Söhbətin hansı 470 mindən getdiyi isə bizim üçün də, ermənilərin özləri üçün də qaranlıq və şübhəlidir. Yenə iftira, yenə şərləmə, yenə dezinformasiya – budur ermənizmin mahiyyəti...
“Ermənilərin o kampaniyalarının nə hüquqi, nə siyasi, nə də mənəvi əsası var”
Siyasi elmlər üzrə fəlsəfə doktoru, Beynəlxalq Münasibətlərin Təhlili Mərkəzinin aparıcı məsləhətçisi Mətin Məmmədli “Bakı-Xəbər”ə şərhində bildirdi ki, ermənilər bütün məsələlərdə olduğu kimi, buna da olduqca əsassız, qeyri-rosional yanaşırlar. “Həqiqətən də onlar Azərbaycan ordusunun 19 sentyabrda keçirdiyi antiterror tədbirlərindən sonra Azərbaycan dövlətini tamamilə əsassız olaraq Qarabağda “etnik təmizləmədə” ittiham edirlər. Amma gerçəkdən etnik təmizləməyə, öz vətənlərindən deportasiyaya məruz qalmış azərbaycanlılar haqqında beynəlxalq səviyyədə danışılanda, hansısa beynəlxalq təşkilatın nümayəndəsi mövqe bildirəndə onlar tamamilə özlərindən çıxırlar və həmin şəxsə qarşı kampaniya aparırlar. Yəni bu, ermənilərin ənənəvi yanaşmasıdır, mövqeyidir. Son dövrlərdə də görürük ki, ayrı-ayrı beynəlxalq təşkilatların nümayəndələri obyektiv və nisbətən obyektiv mövqe bildirəndə ona qarşı kampaniya aparılır. Ermənilərin o kampaniyalarının da nə hüquqi, nə siyasi, nə də mənəvi əsası var. Miyatoviç faktı qeyd edib. Həqiqətən də keçən əsrin 80-ci illərinin sonlarında 300 mindən çox azərbaycanlı Ermənistandan çıxarılıb. Ondan əvvəl də bir neçə dəfə azərbaycanlılar indiki Ermənistan ərazindən qovulub, etnik təmizləməyə məruz qalıb. Bu, sonuncu dəfə isə 1988-ci ildə baş verib. Azərbaycanlıların tarixi torpağı olan Qərbi Azərbaycanda bizim maddi-mədəni, mənəvi irsimiz ermənilər tərəfindən dağıdılıb, məhv edilib. Bu gün bu faktla bağlı Azərbaycan haqlı olaraq məsələ qaldıranda nədənsə ermənilər dərhal təşvişə düşüb xalqımıza, dövlətimizə qarşı kampaniyaya başlayırlar”-deyə M.Məmmdəli bildirdi.
M.Məmmədlinin sözlərinə görə, ermənilər gerçəyi görüb qiymətləndirənləri də düşmən elan edirlər. O hesab edir ki, ermənilərin hay-küy kampaniyasının heç bir nəticəsi olmayacaq: “Ermənilərin əsassız hay-küyləri nəticəsiz qalacaq, çünki Miyatoviç beynəlxalq hüquq normalarına uyğun olaraq mövqe nümayiş etdirib. Burada qeyri-adi nəsə yoxdur ki, ermənilər onu nədəsə günahlandırsınlar”.
İradə SARIYEVA
