Məlum olduğu kimi, “Bioloji Müxtəliflik Mərkəzi” İctimai Birliyi azad edilmiş ərazilərdə minaya düşən heyvanlarla əlaqədar heyvanların müdafiəsi üzrə beynəlxalq təşkilatlara müraciət edib.
Müraciətdə deyilir: “Biz – Azərbaycanın vətəndaş cəmiyyətinin təmsilçiləri olaraq Ermənistanın Cənubi Qafqazın təbiətinə, bioloji müxtəlifliyinə, heyvanlar aləminə qarşı mina terrorunu qəti şəkildə pisləyirik. İlkin məlumatlara görə, 2020-ci ildə Ermənistan Respublikasının işğalından azad edilmiş və 2023-cü ildə Ermənistan silahlı qüvvələrinin qalıqlarından, qeyri-qanuni dəstələrdən təmizlənməklə Azərbaycan Respublikasının suverenliyinin və Konstitusiya quruluşunun bərpa olunduğu ərazilərdə - Qarabağ və Şərqi Zəngəzurda 1.5 milyondan çox mina və partlamamış hərbi sursatın mövcud olması ehtimal olunur. Təəssüf ki, Azərbaycan dünyada mina ilə ən çox çirklənmiş ölkələrdən biridir. Bu günlərdə azad edilmiş ərazilərdə mina qurbanları olan 2 ayının (Ursus arctos) video və fotoları ictimailəşib. Biz bu təsvirlərdən hədsiz dərəcədə sarsılmışıq. Ayılardan birinin minaya düşərək şikəst qalması, digər ayı balasının isə minanı tapdalamaqla ölməsi aydın müşahidə edilib. Təəssüflə qeyd etmək lazımdır, ayı balasının ölümünə səbəb olan mina 2021-ci ildə Ermənistanda istehsal olunub. Bu isə o deməkdir ki, Ermənistan 2020-ci ildə 44 günlük müharibədən sonra da Laçın yolundan sui-istifadə edərək Azərbaycan ərazilərini minalamada davam edib. Yalnız 2023-cü ilin sentyabrında Azərbaycan Ordusunun icra etdiyi lokal xarakterli antiterror tədbirləri ilə Ermənistanın Azərbaycanın suveren ərazilərini minalamasının qarşısını alınıb”.
“Ermənilərin mina terroru antihumanist əməldir, insan “Diqqət, minalı ərazi” lövhəsini görə bilir, amma heyvanlar şüursuzdur, Allahın dilsiz qullarının mina qurbanına çevrilməsi günahdır”
Məlum müraciətlə bağlı fikir bildirən “Yaşil Dünya” Ekoloji Maarifləndirmə İctimai Birliyinin sədri Elman Cəfərli “Bakı-Xəbər”ə açıqlamasında qeyd etdi ki, 30 illik işğal dövründə Ermənistan Azərbaycana külli miqdarda maddi və mənəvi ziyan vurub. Təbii sərvətlərimiz talanıb, mədənlər ekoloji norma və tələblərə uyğun olmayan şəkildə istismar edilib, çaylarımız çirkləndirilib, qiymətlıi meşə zolaqları məhv edilib, nadir ağaclar kəsilib: “Müharibə qanunlarını pozan erməni terrorçuları qadınlara, qocalara və uşaqlara rəhm etməyiblər. Dəfələrlə azərbaycanlılara qarşı etnik soyqırımı həyata keçiriblər. İşğal dönəmində erməni vandalları canlı aləmə, heyvanlara belə rəhm etməyiblər. Ermənilərin yandırdığı meşələrdə canlı aləm, ot örtüyü, münbit torpaq qatı məhv edilib. Təqribi hesablamalara görə, ermənilər Qarabağ və Şərqi Zəngəzurda 1 milyondan çox mina basdırıblar. Torpaqlarımızın mina ilə çirkləndirilməsi prosesi hətta 44 günlük müharibədən sonra da davam edirdi. 2023-cü ilin sentyabrında aparılan lokal antiterror əməliyyatından sonra Qarabağ iqtisadi rayonu tamamilə Azərbaycanın nəzarətinə keçdi. Lakin mina təhlükəsi hələ də qalır. Mina təhlükəsi Qarabağa böyük qayıdışa mane olur. Ermənilərin basdırdığı minalar insanlara, heyvanların həyatına, biomüxtəlifliyə təhlükədir. Ermənilərin mina terroru antihumanist əməldir. İnsan “Diqqət, minalı ərazi” lövhəsini görə bilir. Amma heyvanlar şüursuzdur. Allahın dilsiz qullarının mina qurbanına çevrilməsi günahdır. Bunu edənlər böyük günah işləmiş olurlar. Sosial şəbəkələrdə iki video qarşıma çıxdı. Birində özünə qida axtaran ayağı qopmuş ayı, birində isə minalı ərazidə ölmüş ayı balasının qalıqları görünür. Olduqca ürək ağrıdan mənzərədir. Ona görə də “Bioloji Müxtəliflik Mərkəzi” İctimai Birliyinin yaydığı müraciətə qoşuluram. Heyvanlara qarşı mina terroruna son qoyulmalıdır. Beynəlxalq təşkilatlar ermənilərin bu vandallığını pisləməlidir. Düzdür, onların artıq Azərbaycan ərazisində mina basdırmaq imkanları yoxdur. Amma torpaqlarımızı mina ilə onlar çirkləndirib. Bu yaramaz əmələ görə cavab verməlidirlər. Dünya birliyi buna səssiz qalmamalı, beynəlxalq təşkilatlar Qarabağ ərazilərinin minadan təmizlənməsi prosesinə dəstək verməli, Azərbaycana hər cür yardım göstərməlidir”.
Günel CƏLİLOVA
