Qarabağda separatizmin ləğvindən sonra erməni əhalisinin kütləvi şəkildə Ermənistana qayıtması ətrafında müəmma davam edir: rəsmi Bakı beynəlxalq hüquq və daxili qanunvericiliyə uyğun olaraq, əhalinin təhlükəsizliyi üçün bütün şəraiti yaratmışdı, bunu beynəlxalq təşkilatlar da təsdiq edir; erməni əhalisini bölgədən kütləvi çıxmağa sövq edənin separatçılar və Ermənistan hakimiyyəti olduğu da sirr deyil.
Erməni mediası yazır ki, əhalinin kütləvi çıxışını Ermənistan hakimiyyəti təşkil edib.
Məqsəd Azərbaycana qarşı “etnik təmizləmə”, “deportasiya” kimi iddialar irəli sürmək, “qaçqın” adı altında xarici donorlardan maliyyə yardımı əldə etmək və Bakıya qarşı əllərindən çıxan Qarabağ kartını “Qarabağ erməniləri” kartı ilə əvəzləməkdir. Ermənistan mediasının İrəvan rəhbərliyinin məkrli planını ifşa etməsindən hansı nəticəni çıxara bilərik?
Politoloq Əhəd Məmmədli “Bakı-Xəbər”ə açıqlamasında bildirdi ki, ermənilər səhv yol tutdu, onlar bütün əhalini çıxarmamalı idilər: “Onlar hesab etdilər ki, bunu etnik təmizləmə, genosid, deportasiya adlandıraraq Azərbaycanın üstünə gələ biləcəklər. Amma bu bir müddət danışılacaq, sonra unudulacaq. İtirən ermənilər olacaq. Həm ərazini, həm torpağı itirəcəklər. Ən azı orda qalmaqla, özlərinə bir yaşaylş yeri kimi saxlaya bilərdilər. Bizim maraqlarımıza uyğun olaraq səhv etdilər. Biz də onların qayıtma təhlükəsini nəzərə alaraq, o yerləri qısa müddətdə doldurmalıyıq. Xankəndi, Əsgəran, Xocalı türk əhali tərəfindən doldurulmalıdır. Bundan sonra onlar qayıtmaqdan imtina etməlidirlər. Ermənilərin planlarından narahat olmamalıyıq. Yerlərdə biz öz işimizi görməliyik. Ermənini müdaifə etmək istəyən yenə də edəcək. Biz bunu desək də, deməsək də kim necə istəyir elə də edəcək. Biz beynəlxalq müstəvidə öz təbliğatımızı aparmağa davam etməliyik”.
Bəzi ekspertlər isə diqqəti ona çəkir ki, bu gün Xankəndidə və digər ərazilərdə inzibatı orqanlar yerləşib. Xankəndi həmişə Azərbaycanın olub. Sadəcə, Xankəndiyə qarşı erməni iddiaları olub, Azərbaycan isə bunları rədd edib. Vaxtilə Xankəndidə Azərbaycan SSR-in bayrağı dalğalanırdı. Buradan müəyyən təlaşla çıxmış ermənilər də zaman etibarı ilə geri qayıdacaq. Çıxıb getmiş ermənilərin buradakı əmlakı qorunur. Zaman getdikcə ermənilər hissə-hissə geri qayıda bilər. Onların könüllü şəkildə geri qayıtması indiki zamanda ancaq Azərbaycanın maraqlarına cavab ver. Çünki Azərbaycan artıq Qarabağda tam nəzarətini bərpa edib və mülki strukturlar qurulur. Geri dönən erməni əhalisi artıq Azərbaycana gələcək və Azərbaycan vətəndaşlığını qəbul edəcək. Bu durum Ermənistanla da normal münasibətlər yaradılmasına böyük kömək göstərər. Bizim artıq çəkinəcəyimiz bir hal yoxdur. Biz dövlətik, öz suverenliyimizi bərpa etmişik və erməni vətəndaşların gəlib təhlükəsiz yaşaması bizim dövlətmizi zəiflətməz, əksinə, gücləndirər və Azərbaycanın beynəlxalq nüfuzunu da artırar. Biz savaşlarda qalib gəlməklə erməni irqçi, nasist ideologiyasının hakim olduğu zehniyyəti məhv etmişik. İndi isə erməni vətəndaşlarına da şərait yaratmaqla güclü və xoşgörülü dövlət olduğumuzu nümayiş etdirməliyik.
Məhəmmədəli QƏRİBLİ
