Korsika xalqının öz milli kimliyinin bərpa edilməsi, fundamental hüquq və azadlıqlarının təmin olunması istiqamətində mübarizəsinə dəstək məqsədilə Azərbaycan Respublikası Milli Məclisində yeni qrup yaradılıb.
Milli Məclisdən bildirilib ki, dəstək qrupunun məqsədi Korsika xalqının haqlı tələblərinin beynəlxalq ictimaiyyətin diqqətinə çatdırılması, Fransa müstəmləkəçiliyinin dağıdıcı təsirlərinə qarşı mübarizəsi uğrunda beynəlxalq səylərin birləşdirilməsidir.
Qeyd edək ki, bir neçə gün əvvəl Azərbaycanın paytaxtında Bakı Təşəbbüs Qrupunun (BTQ) təşkilatçılığı ilə “Neokolonializm: İnsan Hüquqlarının Pozulması və Ədalətsizlik” adlı beynəlxalq konfrans keçirildi, toplantıda 14 ölkədən, eləcə də Fransanın dənizaşırı əraziləri və Korsikadan olan nümayəndələr iştirak etdi. Tədbirdə diqqət çəkən məqamlardan biri Fransanın müstəmləkəçilik siyasətindən əziyyət çəkən ölkələrin və toplumların olması idi. Əlbəttə, biz burada Korsikanın iştirakını xüsusi vurğulamalıyıq. “Corsica Libera” partiyasının nümayəndəsi Fransua Benedetti Fransanın iç üzünü tamamilə açıb ifşa etdi, Korsikanın 250 ildir müstəqillik uğrunda mübarizə apardığını vurğuladı: "Hazırda Fransanın xarici regionlarla bağlı siyasəti bir qədər dəyişib. Paris müstəqillik ideyasını dəstəkləyir, lakin Korsika xalqının hüquqlarını tanımır”.
O vurğulayırdı ki, Korsika hökuməti təkbaşına qərar qəbul etmək səlahiyyətinə malik olsa da, prefektura veto hüququndan istifadə edə bilər: "Bu yaxınlarda Fransa prezidenti Emmanuel Makron çıxışı zamanı birləşmədən danışdı və "Korsika xalqı" ifadəsini işlətməməyi xahiş etdi. Bu, çox şey ifadə edir".
Xatırladaq ki, Bakı Təşəbbüs Qrupu (BTQ) Azərbaycanın sədrlik etdiyi Qoşulmama Hərəkatının Əlaqələndirmə Bürosunun nazirlər toplantısı çərçivəsində bu il iyulun 6-da Bakıda “Müstəmləkəçiliyin tamamilə aradan qaldırılmasına doğru” adlı konfransın iştirakçıları tərəfindən yaradılıb. BTQ XXI əsrdə hələ də müstəmləkəçilikdən əziyyət çəkən dünyanın müxtəlif bölgələrində yerləşən xalqların azadlıq uğrunda apardıqları mübarizəyə dəstək verir.
Heç şübhəsiz, Fransaya ən böyük zərbə müstəmləkələrinin Bakı konfarnsında vurulmuşdu,
Milli Məclisdə Korsika ilə bağlı qrupun yaradılması isə kolonialist ölkəyə vurulan daha ağır zərbə sayıla bilər.
Milli Məclisdə Korsika xalqına dəstək qrupunun yaradılması Azərbaycanın beynəlxalq miqyasda Fransa müstəmləkəçiliyinin mahiyyətinin ifşa olunmasındakı roluna daha bir sübutdur.
Azərbaycanın Fransanın müstəmləkə siyasətini beynəlxalq alımdə ifşa etməsi nə kimi təsirli mexanizm rolunu oynayacaq?
“İndi Fransa gəlir, gəldiyi üçün də görəcəklərini görsün”
Siyasi şərhçi Azər Həsrət hesab edir ki, bu qrupun yaradılmasının əhəmiyyəti böyükdür və Korsika problemlərinin beynəlxalq müstəvidə genişləndirilməsi üçün çox işlər görülə bilər. A. Həsrət “belə bir deyim var: deyəcəyiniz varsa deyəcəyimiz də var. Fransa uzun illərdir haqsız şəkildə Azərbaycanın üzərinə gəlir, ölkəmizi ermənilərə qarşı etmədiyi hərəkətlərə görə ittiham edir, eyni zamanda Azərbaycan ərazisində erməni bölcülüyünü açıq şəkildə dəstəkləyir, əlavə olaraq da son zamanlar Ermənistana silah satmaqla bağlı razılığa gəlib. Yəni hərbi cəhətdən Ermənistanı gücləndirməyə girişib. Təbii ki, Azərbaycan dövləti də bunun qarşısında boş dayanmamalı idi, Fransanın özünə layiq cavabını verməli idi. Əslində Fransa “şüşədən evdə” yaşadığı halda başqalarına daş atmamalı idi. Yəni Fransanın özünün xirtdəyə kimi bu cür problemlər içində olması şəraitində durub Azərbaycana dəxli olmayan, əsassız ittihamlar irəli sürməsi öz başında çatlamalı idi. Ona görə də düşünürəm ki, Milli Məclisdə belə bir qrupun yaradılması, ümumilikdə Azərbaycan ictimai rəyində bu məsələnin gündəmdə tutulması, əlavə olaraq da Azərbaycanın birbaşa vasitəçiliyi ilə məsələnin beynəlxalq gündəliyə salınması kimi məsələlər Fransaya dərs olmalıdır. Yəni Fransa dövləti və onu idarə edənlər düşünməməlidir ki, iqtisadi, siyasi imkanlarını əldə rəhbər tutaraq Azərbaycan kimi müstəqilliyini yeni qazanmış, yeni demokratiyalara nəyisə diqtə edə bilər”-deyə bildirdi.
A.Həsrətin sözlərinə görə, onlar bizə diqtə etmək istəyirlərsə, biz də onlara göstərəcəyik ki, edə biləcəklərimiz heç də az deyil: “Necə deyərlər, gələcəkləri varsa görəcəkləri də var. İndi Fransa gəlir, gəldiyi üçün də görəcəklərini görsün”.
İradə SARIYEVA
