Qarabağdan İrəvana qaçan separatçılarla Ermənistan hakimiyyəti arasında 800 milyon dollarlıq qarşıdurma yaşanır. Məlum olub ki, işğal dövründə qondarma “artsax” adından istiqrazlar buraxılıb.
Erməni mediası yazır ki, separatçılara təkcə Ermənistan hökuməti maliyyə ayırmırdı, həm də bu istiqrazlar vasitəsilə pul qazanırdılar: “Bu, əsasən Serj Sarkisyanın dövründə olub. Sarkisyan Ermənistanda bankları bu istiqrazları almağa məcbur edib və bu yolla Qarabağa pullar göndərilib. Qarabağda rejim ləğv edildikdən sonra vaxtilə bu istiqrazları alan banklar Ermənistan hakimiyyətindən kompensasiya tələb edirlər. Söhbət təxminən 340 milyard dramdan, yəni 800 milyon dollardan gedir”.
Məlumata görə, ötən həftə Ermənistanın baş nazirinin müavini Mher Qriqoryan və hakim partiyanın bəzi deputatları Mərkəzi Bankın sədri ilə qapalı görüş keçirib: “Onlar pulların qaytarılmasının mümkünlüyünü izah ediblər. Hakimiyyətin fikrincə, Serj Sarkisyan bu yolla pul qazanıb və indiki hakimiyyət bunu ödəmək məcburiyyətində deyil”.
“Bundan sonra separatçılarla Ermənistan rəsmiləri arasında bu yöndə çəkişmələr daha da artacaq”
Məsələ ilə bağlı fikirlərini “Bakı-Xəbər”lə bölüşən millət vəkili Aydın Hüseynov hesab edir ki, məlum qarşıdurma haçansa baş verməli idi: “Çünki işğal dövründə Ermənistanın ovaxtkı rəhbərliyi Qarabağın və Şərqi Zəngəzurun sərvətlərini taladılar. Əsasən də Köçəryan və Sarkisyanın prezidentliyi dövründə, ondan əvvəl onların erməni quldurlarına rəhbərlik etdikləri vaxt bu işlər görüldü. Onlar hesab edirdilər ki, işğal daimi olacaq və onlar da öz dövranlarını davam etdirəcəklər. Təsadüfi deyil ki, Qarabağ hesabına milyonlar qazanan bu səhra komandirləri indi də maliyyə baxımından korluq çəkmirlər. Revanşist düşərgəni təmsil edən bu qüvvələrin Ermənistanda şirkətləri, media şəbəkəsi fəaliyyət göstərir. Vəsaitlərin digər qismini isə xarici banklarda, ölkələrdə dövriyyəyə cəlb ediblər. Əslində bütün bunların sıravi ermənilərə heç bir faydası olmayıb. Çünki zaman-zaman Qarabağ ermənilərinə yardım adı altında xaricdə və Ermənistanda milyonlarla vəsait toplanıb. Bununla bağlı çoxsaylı telemarafonların keçirildiyini yaxşı xatırlayırıq. Ancaq sonralar məlum oldu ki, yığılan milyonların böyük hissəsi təyinatı üzrə xərclənməyib. Bu vəsaitlər Robert Köçəryanın, Serj Sarkisyanın, Seyran Ohanyanın və separatizm hesabına milyonlar qazanan digərlərinin cibinə gedib. Ermənistanda hakimiyyət dəyişəndən sonra bu oğurluqların üstü açıldı. Qarabağ separatçılarına görə bir sıra məsələlərin üstünə getmirdilər. Ancaq Azərbaycanın sentyabrda həyata keçirdiyi lokal xarakterli antiterror tədbirlərindən sonra Qarabağa nəzarəti tam bərpa etməsi bir sıra bu kimi çirkin oyunların üstünü açır. Hələ bu harasıdır?! Bundan sonra separatçılarla Ermənistan rəsmiləri arasında bu yöndə çəkişmələr daha da artacaq”.
Vidadi ORDAHALLI
