Məlum olduğu kimi, Qarabağ məsələsinə görə Avropa dövlətləri Azərbaycan və Ermənistana silah satmırdılar. Hər dəfə silah alınması məsələsi gündəmə gələndə bəyan edirdilər ki, Qarabağ məsələsi həll olunana qədər tərəflərə silah satılmayacaq.
Hətta Avropa dövlətləri tərəflərə müdafiə təyinatlı silahları belə satmaqdan imtina edirdilər. Hesab edirdilər ki, bu, sülh danışıqları prosesinə zərər vuracaq.
Artıq bəlli olduğu kimi, Qarabağ məsələsi həll olundu. İlk olaraq Fransa bu tabunu sındıraraq Ermənistana silah satılmasına rəsmən qərar verdi.
Maraqlıdır, Fransanın bu qərarı Azərbaycana yaxın olan bir sıra ölkələrin - İtaliyanın, Böyük Britaniyanın və digər Avropa ölkələrinin ölkəmizə silah satmalarına yaşıl işıq yandıracaqmı? Ən azından nəzərə almaq lazımdır ki, Azərbaycanla İtaliya arasında hərbi sahədə əməkdaşlıq var.
“Fransa öz müttəfiqi Ermənistana silah satırsa, onlar da müttəfiqi olan Azərbaycana silah satışında məhdudiyyəti götürməlidilər”
Sözügedən məsələ ilə bağlı “Bakı-Xəbər”ə açıqlama verən Demokratik Dəyişim Partiyası Təşkilat Komitəsinin sədri Əli Mustafa buna birmənalı yanaşmadı: “Əvvəla, Fransanın Ermənistanı himayə etməsi yeni məsələ deyil. Fransa Minsk Qrupunun həmsədri olaraq hər zaman Ermənistanın yanında olub və bunları himayə edib. 30 il ərzində Fransa Ermənistanı həm açıq, həm də gizli olaraq dəstəkləyib və hər vasitə ilə status-kvonu saxlamağa çalışıb. Əslində bütün bunların özü Ermənistana kömək idi. Bundan başqa, dünənə qədər Ermənistana silah satmayan Fransa bunu Hindistan üzərindən bir başqa formada həyata keçirirdi. Yəni Hindistanda istehsal olunan Fransa silahları Ermənistana ötürülürdü. Çünki həmin silahlar Fransa-Hindistan birgə müəssisələrində istehsal olunurdu. Əlbəttə ki, Parisin razılığı olmadan Hindistan bunu edə bilməzdi. Ona görə də məsələnin həm də bu tərəfi var. O baxımdan bu, yeni məsələ deyil. O ki qaldı Azərbaycanın digər Avropa ölkələrindən silah almasına, normalda Fransa bu tabunu pozubsa, onada elə bir problem olmamalıdır. Azərbaycanla yaxın əlaqələrə malik İngiltərə və İtaliya ölkəmizə silah satışına start verməlidilər. Əvvəl bəhanə edirdilər ki, tərəflər arasında münaqişə var. İndi artıq bu yoxdur. Hesab edirəm ki, ikili standartlardan, xristian amilindən çıxış etməsələr, o zaman silah satacaqlar. Fikrimcə, Fransa öz müttəfiqi Ermənistana silah satırsa, onlar da müttəfiqi olan Azərbaycana silah satışında məhdudiyyəti götürməlidilər. Düzdür, Azərbaycan silaha olan tələbatını Türkiyə, İsrail və Rusiya hesabına ödəyir. Ancaq müasir Avropa silahlarını da əldə etsək pis olmaz. Bu, ölkəmizin müdafiə potensialını daha da gücləndirəcək. Silah arsenalımız nə qədər müasir və zəngin olsa, bu bir o qədər bizim xeyriizə işləyən faktordur. O üzdən, Avropa ölkələri Azərbaycana yönəlik silah maratoriomunu aradan qaldırmalıdı, bizə yaxın olan Avropa dövlətləri Azərbaycana silah satmalıdır”.
Vidadi ORDAHALLI
