Roma Papası Fransisk Ermənistanın baş naziri Nikol Paşinyanı Müqəddəs Taxt-Tacın ən yüksək mükafatlarından olan Papa IX Piyin Böyük Xaç Cəngavər ordeni ilə təltif edib. Erməni medisına görə, bu barədə Ermənistan Nazirlər Kabinetinin rəhbərinin mətbuat xidməti məlumat yayıb.
Ordeni diplomatik missiyasını başa vurmuş arxiyepiskop, Roma Papasının Ermənistandakı diplomatik nümayəndəsi Xose Avelina Betankur təqdim edib.
Bildirilir ki, guya orden Paşinyana Ermənistan-Vatikan əlaqələrinin inkişafında maraqlı olduğuna görə verilib.
Qeyd olunur ki, Ermənistan Konstitusiyası erməni xalqının mənəvi həyatında milli kilsə kimi Erməni Apostol Müqəddəs Kilsəsinin müstəsna missiyasını təsbit edir. Eyni zamanda dini qurumların fəaliyyət azadlığı təmin edilir, dini qurumların özləri də dövlətdən ayrıdır.
Papa Paşinyanı ali dini ordenlə niyə təltif etdi?
“Paşinyan onların istədiyi siyasəti həyata keçirir və bu siyasət günü-gündən genişlənir, bu səbəbdən də ona “xidmətlərinə” görə bu kimi ordenlərin verilməsi təəccüblü deyil”
Müstəqil siyasətçi Bədrəddin Quliyev “Bakı-Xəbər”ə şərhində “Paşinyanın Roma Papası tərəfindən belə bir ordenlə təltif edilməsi faktiki olaraq onu göstərir ki, Vatikan, xristian dünyası Rusiya və Ermənistan qarşıdurmasında yeni bir “cəngavər” yaradır. Qərb dünyası Rusiyanın Cənubi Qafqazdan çıxarılmasında və Ermənistanın Rusiyanın təsirindən qoparılıb Avropa ailəsinə qatılmasında maraqlıdır. Papa bu ordeni Paşinyana verməklə antirusiya siyasətinin dərinləşdirilməsində ona dəstək verdiyini ifadə edib. Məqsədlərdən biri Ermənistanı Qərbin forpostuna çevirməkdir. Paşinyan hakimiyyətə gəldiyi gündən katolikos II Qareginlə yola getmir, kilsə ilə araları sərindir. Ermənilərin ortodoks kilsəsinin Rusiyanın təsirindən çıxarılması ayrıca bir məsələdir. Getdikcə erməni kilsəsi Roma katolik kilsəsinə meyl edəcək, ermənilərin kilsəsinin katolikliyə meyli daha da güclənəcək”-deyə bildirdi.
B.Quliyev hesab edir ki, bütün addımlar, təltiflər, xoşgörülü davranışlar Paşinyanın Qərbə daha yaxından meyl etməsindən və bölgədə Rusiyanın təsirini sıfıra endirilməsindən yanadır.
Siyasətçinin fikrincə, Papanın həm Paşinyanı təltif etməsi, həm də bir müddət əvvəl Qarabağdan könüllü gedən ermənilərin “mədəni irsi”nin dərdinə qalmaq cəhdlərinin hamısı erməniləri katolik inancına yönəltməkdir. “Onlar Ukrayanada yeritdikləri din siyasətini Ermənistanda da tətbiq etmək istəyirlər. Yəni Ukrayna əhalisinin yarısı katolik, yarısı isə pravoslavdır. Ermənistan cəmiyyətində də katoliklərin sayının artması, erməni kilsəsinin üzərində Rusiyanın dominantlığının zəiflədilməsi əsas hədəflərdəndir. Çünki Ermənistan cəmiyyətində əsas aparıcı güc erməni Qriqoryan kilsəsidir. Müasir dövrdə Cənubi Qafqazda Rusiyanın əsas aparıcı gücü erməni kilsəsidir, burada erməni katolikosun çox böyük rolu var. O sistemi dağıtmaq istəyirlər. Ümumiyyətlə, dinin Ermənistan cəmiyyətində təsirini dəyişmək və yeni əlaqələr yaratmaq, katolik dünyasının orada sistemlərinin gücləndirmək, katolik icmasının, katolik kilsələrini getdikcə artırmaq, erməni kilsəsini sıxışdırmaq əsas hədəflərdəndir. Bilirsiz ki, erməni kilsəsi qondarma bir qurumdur. Qərb dünyası Paşinyandan öz maraqlarını təmin etmək üçün istifadə edir, ordenin verilməsi də bir tərəfdən onun “xidmətləri”nin qiymətləndirilməsidir. Bu orden həm də ona gələcəkdə erməni kilsəsinə qarşı atacağı addımlara görədir. Qarşıda çox ciddi proseslər baş verəcək.
Xatırladım ki, Qarabağdan könüllü köçüb getmiş ermənilərə görə də Roma Papası Azərbaycanın əleyhinə danışdı. Guya Qarabağda “erməni dini irsi” var və Papa da bununla bağlı mövqe göstərdi. Amma bizim soydaşlarımız Qərbi Azərbayandan deportasiya olunanda, vətəndaşlarımız öz ölkəmizdə qaçqına, məcburi köçkünə çevriləndə, torpaqlarımız işğalda saxlananda, dini-mədəni, tarixi abidələrimiz məhv ediləndə biz Roma Papasının heç bir mövqeyini görmədik. Amma indi bölgədə yeni bir “xristian təəssübkeşi”, Paşinyanın timsalında Rusiyaya qarşı bir “cəngavər” yaradırlar. Ermənistan daxilində gələcəkdə ziddiyyətli proseslərdə Rusiyameyilli qüvvələrlə Qərbyönümlü qüvvələrin qarşıdurması qaçılmazdır”-deyə bildirən B.Quiliyev qeyd etdi ki, Ermənistana gətiriləcək yeni dini sistem nəticəsində erməni katolikosunun, qondarma erməni kilsəsinin geniş səlahiyyətlərinin sıfırlanması gözlənilir: “Ermənistanda erməni kilsəsinin sıfırlanması və mövcud Roma Papa sisteminin qəbul olunması prosesi gedir…”
O vurğuladı ki, tarixən ermənilər kim gücülüdürsə onun yanında yer alıb, bu gün Ermənistanda başlanan katolik kilsəsi ilə erməni Qriqoryan kilsəsinin mübarizəsində də ermənilər Poma Papasını dəstəkləyəcəklər. “Onlar dinlərindən də, milliyyətlərindən də keçə bilərlər. Çünki tarix boyu bütün imperyalara nökərçilik ediblər. Paşinyan onların istədiyi siyasəti həyata keçirir və bu siyasəti günü-gündən genişlənir, bu səbəbdən də ona “xidmətlərinə” görə bu kimi ordenlərin verilməsi təəccüblü deyil”-deyə B.Quliyev qeyd etdi.
B.Quliyev əlavə etdi ki, əgər Paşinyanın apardığı siyasət sülhə, tezliklə sülh müqaviləsinin bağlanmasına xidmət edəcəksə, buna müsbət yanaşarıq, amma bu siyasət nəticəsində Qərbi Cənubi Qafqaza gətirəcəksə, bu qəbuledilməzdir.
İradə SARIYEVA
